Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 2 2017

 QARANCHÖ YACHATSIKÏPITA | ¿CHASKIKUNKITSURAQ DIOSPA MAS VALORYOQ QARËNINTA?

¿Imanötaq Diosnintsik qarashunqëkipita agradecikunkiman?

¿Imanötaq Diosnintsik qarashunqëkipita agradecikunkiman?

“Cristu kuyayämanqanmi obligayäman, [...] llapankunapaqmi wanurqan, tsënöpa kawaqkunaqa kikinkunapaq manana kawayänampaq, sinöqa pëkunarëkur wanushqa y sharkatsishqa kaqpaqna kawayänampaq” (2 Corintius 5:14, 15).

JUK alläpa valoryoq qarëta chaskirirqa, alläpam agradecikïta munantsik. Llakikïpaq y mana jampiyoq qeshyankunapita chunka nunakunata kachakäratsirmi, Jesusqa agradecikï alläpa precisanqanta nirqan. Kachakätsinqan chunka nunakunapitaqa jukllëllam “Diosta sinchipa alabarnin kutirqan”. Tsëmi Jesusqa kënö nirqan: “¿Chunkanmi kachakäyashqa aw? Tsëqa, ¿mëtaq isqun kaqkunaqa?” (Lücas 17:12-17). Kë pasakunqanmi yachatsimantsik, wakinkuna noqantsikpaq rurayanqanta raslla qonqarita puëdinqantsikta.

Rikärinqantsiknöpis, jutsantsikrëkur Jesucristu wanunqanqa imawampis mana igualaq qarëmi. Awmi, Dios qaramanqantsik qarëqa manam imawampis igualantsu. Tsëqa, ¿imanötaq agradecïdu kanqantsikta rikätsikushwan?

  • Qarakoq kaqtam alleq reqinëki. Jesus wanunqanrëkur imëyaqpis kawakïta chaskiyänampaqqa,  juk precisaq rurëtaran nunakuna rurayänan. Jesusmi Teytanman kënö mañakurqan: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki, y qam kachamunqëki Jesucristuta reqikäyanqan” (Juan 17:3). Wamra kanqëki witsanchö juk nuna kawënikita salvamunqanta musyarirqa, ¿manatsuraq mas reqita, y imanir salvashunqëkita tapurita munankiman? Jesuspa wanïninwan kawënintsikta salvamushqa karninmi, Jehoväqa alleq reqinantsikta y amïgun kanantsikta munan. Tsëmi Bibliaqa kënö consejakun: “Diosman witiyë, y pëqa qamkunamanmi witimunqa” (Santiägu 4:8).

  • Jutsantsikrëkur Jesus wanunqanman markäkï. “Tsuriman markäkunqanta rikätsikoq kaqqa, imëyaqpis kawakïtam chaskin” (Juan 3:36). ¿Imanötaq markäkoq kanqantsikta rikätsikuntsik? Jesus noqantsikrëkur wanunqanman markäkunqantsiktaqa rurënintsikkunawanmi rikätsikuntsik (Santiägu 2:17). Juk qarë noqantsikpana kanampaqqa chaskikunantsikmi. Tsënöllam, Jesus wanunqan qarëta chaskikunqantsiktapis rikätsikunantsik. Tsëpaqqa Diosnintsik munanqannö kawakunapaqmi yachakunantsik y yachakunqantsikmannömi kawanantsik. * Jina perdonëkamänapaq y alli concienciata qomänapaqmi Diosman mañakunantsik. Y shamoq tiempuchö yamë, següru y alli kawayänampaq kaqman chipyëpa markäkurninmi Diosmanqa witinantsik (Hebrëus 11:1).

  • Jesus Wanunqanta Yarpëman ëwë. Jutsantsikrëkur wanunqanta mana qonqëkunapaqmi, Jesusqa cada watachö yarpänapaq patsätsirqan. Tsëmi kënö nirqan: “Këta rurar sïguiyë noqata yarpäyämarnï” (Lücas 22:19). Kë wataqa martis 11 de abril Inti (Rupay) jeqarkuptinmi, Jehoväpa testïgunkunaqa Jesuspa wanïninta yarpäyäshaq. Tsë reunionqa juk höranöllam kanqa, tsëchömi Jesuspa wanïnin ima ninan kanqanta, y kanan y shamoq tiempuchö imanö yanapamanqantsikta yachatsikayämunqa. Qanyan wataqa Jesus Wanunqanta Yarpëman 20 millonnö nunakunam entëru Patsachö ëwayarqan. Tsëmi Diosnintsikpa alläpa valoryoq qarënimpita agradecikunapaq, tsë reunionman shamunëkipaq invitarilläyaq.

^ par. 7 Diosta mas alleq reqinëkipaq y pëman witinëkipaqqa, Palabran Bibliapita yachakunqëkim yanapashunki. Jehoväpa testïgunkunata mañakuri Bibliapita yachatsiyäshunëkipaq o Internetchö päginäkunaman yëkuri jw.org.