Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 6 2016

 QARANCHÖ YACHATSIKÏPITA | PIKUNATAQ CIËLUCHOQA KAWAYAN

Ciëlupaq tukïta niyanqankuna

Ciëlupaq tukïta niyanqankuna

Mëtsikaq nunakunam tapukuyan, ciëlu imanö kanqanta y pikuna tsëchö kawayanqanta, y tsëpaqqa tukïtam nunakuna pensayan. Wakin nunakunaqa pensayan wanushqa kastankuna tsëchö kawayanqantam. Wakinkunanam, ciëluchö imëpis yamë y shumaq kawakï kanqanta y tsëchö angelkunawan wanushqa kastankunapa espïritunkuna kawayanqanta pensayan. Jina wakinkunanam pensayan ciëluchöqa millonyëpayan dioskuna kawayanqanta.

Ciëlupita ni pï mana shamushqa kaptinmi, wakinkunaqa niyan ciëluchö kawakï imanö kanqanqa mana musyëpaq kanqanta. Peru tsëqa manam rasumpatsu, porqui Jesucristuqa manaraq kë Patsaman shamurmi ciëluchö kawashqana karqan. Y tsëtaqa rikätsikurqan, punta cristiänukunapa tiempunchö pushakoq religiösukunata kënö nirninmi: “Ciëlupita[qa] urämurqö, manam kikïpa munënïta ruraqtsu, sinöqa kachamaqnïpa munëninta ruraqmi”. Tsëmi Jesusqa alli musyarnin, apostolninkunata kënö nirqan: “Teytäpa wayinchöqa atska täräna sitiukunam kan” (Juan 6:38; 14:2).

Jesuspa Teytanqa Jehovä Diosmi, y pëqa ciëluchömi këkan (Salmu 83:18). Tsëmi, ciëlu imanö kanqantaqa pëkunalla willamënintsikta puëdiyan. Alläpa espantakïpaq visionkunawanmi Jehoväwan Jesusqa sirweqninkunata rikätsiyarqan ciëlu imanö kanqanta.

Bibliaqa rikätsikunmi nunakuna visionkunachö imakunata rikäyanqanta, y tsëtam kë revistapa qateqnin kaq yachatsikïnin willakun. Tsë yachatsikïpita yachakïkarnin, yarpë ciëluchö imëkapis kanqan kë Patsachö rikanqantsiknö ni yatanqantsiknö mana kanqanta. Tsëmi, Diosqa visionkunata utilizar entienditsimantsik ciëlu imanö kanqanta fäcil-lla entiendinapaq. Këpita yachakunqëkim yanapashunki ciëluchö ‘atska täräna sitiukunachö’ pikuna kawayanqanta musyanëkipaq.