Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 5 2016

 BIBLIAM YANAPASHQA JUKLÄYANA KAWAKUYÄNAMPAQ

Alläpa maqakoq y piñakoqmi karqä

Alläpa maqakoq y piñakoqmi karqä
  • YURIKUNQAN WATA: 1974

  • NACIONNIN: MËXICU

  • MAS REQINAPAQ: PELYAKUNAMANMI MËTIKOQ Y ALLÄPA MAQAKOQMI KARQAN

PUNTA KANQÄ:

Mëxicu nacionpa Ciudad Mante markanchömi yurikurqä. Tsëchö täraqkunaqa alläpa yanapakoq y qarakoqmi kayan. Tsënö kaptimpis, alläpa wanutsinakï kaptinmi tsë markaqa alläpa peligrösu karqan.

Kimam wawqïkuna. Teytäkunaqa iglesia catölicachömi bautizayämarqan, y tsë parroquiapa cörunchömi cantarqä. Diospa munënintam rurëta munarqä, porqui Dios juzgamar infiernuchö rupatsimänantaqa mantsarqämi.

Pitsqa watayoq këkaptïmi teytäqa jaqirayämarqan. Tsëqa alläpam llakitsimarqan. Llapäkunam alläpa kuyayaq kayä, tsëmi ëwakunqantaqa entiendiyarqätsu. Tsë witsampita patsëmi, mamänïqa atska hörakuna trabajar qallëkurqan chuskökunata manteniyämänampaq.

Mamänï trabajanqanyaqmi, escuëlaman mana ëwanäpaq y mayor chölukunawan juntakunäpaq provechakoq kä. Pëkunawanmi lluta parlakïta, cigärru shoqïta, suwakïta, y pelyëta yachakurqä. Wakinkunata dominëmi gustamaq, jinamampis, boxëu nishqanta, karätita y armakunata utilicëtam yachakurqä. Alläpa maqakoq jövinmanmi tikrarirqä. Illapanakïchöqa imëpis këkaqmi kä, tsëmi atska kuti jitarëkaqta y yawartsëkaqta cällikunachö jaqirayämaq, y wanushqatanam pensayaq. ¡Mamänïqa alläpam sufreq tsënöta rikämar y seguïdum hospitalman apakarëkämaq!

16 watayoq këkaptïmi, unë witsan amïgü Jorgi watukayämarqan. Jehoväpa testïgunmi tikrashqa karqan, y Bibliachö yachakunqankunapitam willapäyämarqan. Bibliataqa manam imëpis leyishqatsu karqä y alläpam gustamarqan Diospa jutinta y munënimpita yachakï. Bibliapita yachatsiyämänampaqmi Jorgiqa nirayämarqan y llapäkunam äniriyarqä.

¿IMANÖTAQ BIBLIA YANAPAMASHQA JUKLÄYANA TIKRANÄPAQ?

Infiernuchö Dios mana castigakunqanta Bibliachö musyarirqa, alläpam kushikurqä (Salmu 146:4; Eclesiastes 9:5). Tsëpita witsëpaqa, wamrankunapaq alli kaqta munaq y kuyakoq Teytatanönam Diosta rikar qallëkurqä.

 Bibliapita yachakunqämannömi cuentata qokur qallëkurqä portakïnïta cambianä precisanqanta. Alläpa piñakoq kënïta vencinäpaqqa humildim kanä karqan. 1 Corintius 15:33 textuchö këkaq willakïmi alläpa yanapamarqan, tsëchömi nin mana alli amïgukunaqa mana alliman chätsikuyanqanta. Tsëmi cambiëta munarqa, mana alli amïgükunawan juntakunänatsu karqan. Y tsëtam rurarqä. Tsëmi Jehoväpa testïgunkunachö alli amïgukunata ashir qallëkurqä, pëkunaqa Biblia yachatsikunqannömi problëmankunata shumaq altsayaq.

Juk mas yanapakïqa Romänus 12:17-19 textum karqan, tsëchömi kënö nin: “Pipis mana allicunata rurayäshuptiqui, ama qamqa pepaq mana allitaqa ruranquitsu; antis allicunata rureta tirayë llapan nunacunapa nopancho. [...] ‘Noqam rurenincunamanno nunacunata jusgar castigashaq’”. Tiempunchö Jehovälla llapanta altsamunampaq kaqta cuentata qokunäpaqmi, kë textu yanapamarqan. Y tiempuwanmi maqakoq kënïta jaqirirqä.

Paqaspa wayïman juk kuti kutikaptï pasamanqantaqa manam imëpis qonqashaqtsu. Pandillërukunam maqayämarqan. Tsë maqayämaq grüpupa mandakoqninmi waqtächö kutëkamarqan y, “¡mä kanan defendikï!” nirmi sinchipa qallapämarqan. Tsë höram geniüta tsaränäpaq Jehoväman mañakurirqä. Noqapis defendikïtam munarqä, peru tsëpa rantinmi qeshpir ëwakurqä. Waräninnam tsë maqayämaq grüpupa mandakoqninwan tinkurirqä, peru kë kaq kutichöqa japallanllam këkarqan. Pëta rikäriptïmi cölerawan yawarnï puwarirqan, y vengakïtam munarqä. Tsë höram Jehoväman yapë mañakurirqä geniüta tsaränäpaq. Alläpam espantakurqä noqa kaqman witiramur, kënö niramanqampita: “Perdonëkamë rurayanqaqpita. Rasumpa kaqchöqa, qamnö këtam munä. Noqapis Bibliapita yachakïtam munä”. ¡Allipaqraq geniüta tsararqä! Tsërëkurmi pëpis Bibliapita yachakur qallëkurqan.

Familiä Bibliapita yachakïta jaqiriyanqanmi alläpa llakitsimarqan. Peru noqaqa yachakur sïguinäpaqmi decidïdu këkarqä y manam ni pï, ni imapis michämanmantsu karqan. Diospa markanwan juntakurlla llakikïnïta vencinäpaq y rasumpa kaq familiata tarinäpaq kaqtam musyarqä. Portakïnïta cambiarmi sïguirqä, y Jehoväpa testïgunnömi 1991 watachö bautizakurirqä.

¿IMAKUNACHÖTAQ YANAPAMASHQA?

Noqaqa alläpa dominakoq, piñakoq y maqakoqmi karqä, peru Diospa Palabranmi kawënïta cambiashqa. Kananqa, Bibliachö këkaq willakïpita llapankunata parlapänäpaqmi tiempüta utilizä. Y alläpa kushishqam, 23 watakunapana llapan tiempüwan Jehoväta sirwikä.

Juk tiempupam Jehoväpa testïgunkunapa Mëxicu sucursalninchö yanapakurqä. Tsëchömi reqirirqä, alläpa häbil Claudia jutiyoq juk shipashta, y 1999 watachömi casakuriyarqä. Jehovätam imëpis agradecikü alläpa markäkoq yanaqita qomanqampita.

Ishkäkunam Mëxicu nacionpa sëñas idiöma congregacioninchö juk tiempupa yanapakuyarqä, y tsëchömi wakin sordukuna Jehoväta reqiyänampaq yanapakuyarqä. Tiempuwannam, Belice nacionman yachatsikoq ëwayänäpaq nirayämarqan. Kapayämanqanllawan kë nacionchö kawarpis, kushishqam kawayä. ¡Manam imawampis kë kawakïnïkunataqa cambiayämantsu!

Tiempuwanqa, Bibliapita yapë yachakurmi mamänïqa qallëkurqan y bautizakurirqanmi. Mayor kaq wawqï, warmin y wamrankunapis Jehoväpa testïgunmi kayan. Jinamampis, unë witsan Diospita yachatsinqä amïgükunam kananqa Jehoväta sirwiyan.

Wakin familiäkunaqa maqakoq kayanqanrëkurmi wanuyashqa. Pëkunanöllachi noqapis ushäman karqan kawënïta mana cambiashqa karqa. Jehovätam alläpa agradecikü pëta y markanta reqinäpaq permitimanqampita, y Biblia yachatsikunqannö kawanäpaq alläpa kuyakïwan y pacienciawan yachatsimanqampita.