Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 4 2016

 BIBLIAM YANAPASHQA JUKLÄYANA KAWAKUYÄNAMPAQ

Viciütaqa vencirqömi

Viciütaqa vencirqömi
  • YURIKUNQAN WATA: 1953

  • NACIONNIN: AUSTRALIA

  • MAS REQINAPAQ: PORNOGRAFÏAM VICIÜN KARQAN

PUNTA KANQÄ:

1949 watachömi Alemaniapita Australia markata teytä ëwakurqan mïnachö o energïa electrica yarqunqanchö trabäjuta ashirnin. Y Victoria markachömi patsakärirqan, tsëchömi mamänïwan reqinakur casakurirqan. Noqanam 1953 watachö yurikurqä.

Juk ishkë watakuna pasarinqanchönam, mamänïqa Jehoväpa testïgunkunawan Bibliata estudiar qallëkurqan, tsëmi wamra këkar Bibliapita yachakunqäta yarpä. Peru teytätaqa manam ni mëqan religionpis gustaqtsu, maqakoqmi tikrakurirqan y mamänïqa alläpam mantsaq. Peru pakëllapam pëqa estudiar sïguirqan, y yachakunqantaqa alläpam kuyarqan. Teytä wayichö mana kanqan hörakunam, panïtawan noqataqa yachakïkanqanta yachatsiyämaq. Patsa juk shumaq huertaman tikranampaq kaqtam yachatsiyämaq y Biblia ninqannö shumaq portakuyaptïqa kushishqa kawakuyänäpaq kaqtam niyämaq (Salmu 37:10, 29; Isaïas 48:17).

Teytä maqakoq kaptinmi, 18 watayoq këkar wayïpita ëwakurqä. Mamänï Bibliapita yachatsimashqa kaptimpis manam yachakunqänötsu portakoq kä. Tsëpitanam, carbonta jorqayanqan mïnachö electricistanö trabajarqä y 20 watäta cumplirirnam casakurirqä. Casakurinqäpita kima watatam warmi wamräkuna yuririrqan, tsëmi yarpakacharqä kawënïchö ima mas precisaq kanqampita. Musyarqämi Bibliapita yachakïqa familiäta yanapëta puëdinqanta, tsëmi Jehoväpa testïgunkunawan Bibliata estudiar qallëkurqä. Peru warmïtaqa manam gustarqantsu Testïgukunawan yachakunqä. Juk kutim, Testïgukunapa reunionninman ëwaptï nimarqan: Bibliapita yachakïta munarqa, wayïpita ëwakunäpaq kaqta. Y tsëta mana munarmi, Bibliata estudiëta y Testïgukunawan juntakïtapis jaqirirqä. Tsëpitaqa alläpam arrepentikurqä Bibliata estudiëta jaqirinqäpita.

Juk kutim trabajaq mayïkuna pornografïata rikänäpaq inkitayämarqan. Shumaqnö karpis melanëpaqmi karqan, porqui tsëpitaqa jatun jutsata rurashqanömi sientikoq kä. Bibliachö yachakunqäkunapitam yarpaq kä y Dios castigamänampaq kaqtam pensaq kä. Y cada junaq mas y mas tsë rakcha fötukunata rikaranqärëkurmi noqapaqqa juk viciu tikrakurirqan.

Mamänï alli kaqta yachatsimanqankunataqa ichikllapa ichikllapam qonqarirqä. Rikanqämannömi portakoq kä. Parlakïnïqa  pasëpa lluta rakcham karqan, y brömäkunapis rakcham karqan. Pununakï asuntutapis respëtuwannatsu manam rikaq kä, tsëmi warmiyoq këkarpis, juk warmikunawan pununakur kakoq kä. Juk junaq espëjuchö rikäkurirmi kënö nikurqä: “¡Imanö melanëpaqmi kanki!”. Kuyakunäpa rantinmi, melanëpaqtanö rikäkoq kä.

Warmïwanqa rakikäkurirqämi y kawënïpis pasëpa mana allim karqan. Tsëmi llapan shonqüwan Jehoväta mañakurqä. Ishkë chunka watakunana pasarishqa kaptimpis, jukpitam Bibliata estudiar qallëkurqä. Y mamänïqa Jehoväpa testïgunnam karqan y teytäqa wanushqanam karqan.

¿IMANÖTAQ BIBLIA YANAPAMASHQA JUKLÄYANA TIKRANÄPAQ?

Mana alli kawënïwan Biblia yachatsikunqanqa alläpa jukläyam karqan. Tsëmi alli concienciayoq kawakunäpaq decidïdu këkarqä. Paqwëmi churapakarqä parlënïta y geniüta cambianäpaq. Jinamampis, rakcha kawakïnïta, apuestakuna rurëta, machakïta y emprësa trabajanqächö suwakïtapis jaqirirqämi.

Trabajaq mayïkunaqa manam entiendiyaqtsu imanir cambiëta alläpa munanqäta. Kima watapam mana alli ruranqäkunaman ishkitsiyämëta munayarqan. Tsëman ishkiriptï, piñakurkuptï o llutata parlaptïqa, kushikurninmi kënö niyaq: “¡Ajä, unë amïguntsik kutiramun!”. ¡Imanömi llakïkoq kä tsëta niyämaptin! Mana väleqnömi sientikoq kä.

Trabäjüchöqa llapankunam pornografïata rikaräkuyaq, unë noqapis ruranqänöllam cada rätu trabajaq mayïkuna computadörapa o imprimirirpis rakcha fötukunata rikätsinakuyaq. Tsë llapanta vencinäpaqmi kallpachakoq kä, peru pëkunaqa imëkanöpapis ishkitsimëtam munëkuyaq. Bibliapita yachatsimanqan Testïgutam yanapamänampaq mañakurqä y pëqa shumaqmi wiyamarqan shonqupita patsë willanqä höra. Tsë viciüta vencinapaq yanapamaq textukunatam leyipämarqan, y Jehoväpa yanapakïninta imëpis mañakunäpaqmi animamarqan (Salmu 119:37).

Juk junaqmi llapan trabajaq mayïkunata juntëkur, cervëza upyëpita cuidakïkaq ishkë trabajaq mayïkunata cervëzan qoyänampaq nirqä. Llapanmi mantsakar kënö niyarqan: “¡Ama tsëtaqa niyämëtsu! ¡Kë nunakunaqa viciunkunata jaqiyänampaqmi kallpachakïkäyan!”. Tsënam nirqä: “Noqapis viciütam jaqita munä”. Tsëmi, tsë junaqpita patsë pornografïa viciüta jaqita munanqäta entiendiriyarqan y manam tsëman ishkitsimëta tïrayarqannatsu.

Jehovä yanapamaptinmi tiempuwanqa viciüta jaqirirqä. 1999 watachönam Jehoväpa testïgunnö bautizakurirqä. Jehovätam alläpa agradecikü jukpita shumaq y kushishqa kawakunäpaq yanapamanqampita.

Kananqa entiendïnam unëpa noqata gustamanqankunata, Jehovä imanir chikinqanta. Juk kuyakoq teytanömi, pornografïa imaman chätsikunqampita tsapämëta munarqan. Rasumpa kaqllatam Proverbius 3:5, 6 textuqa nin: “Llapan shonqïkiwan Jehoväman markäkï, y kikikipa yachënikillamanqa ama markäkïtsu. Llapan kawënikichö pëta yarpë, tsëqa llapan rurënikitam altsaramunqa”. Bibliapa yachatsikïninqa imëkapitam tsapämashqa, y viciüta jaqinäpaqpis yanapamashqam (Salmu 1:1-3).

¿IMAKUNACHÖTAQ YANAPAMASHQA?

Unëqa kikïta melanäkoqmi kä, peru kananqa kuyakïnï kutikashqam y shonqüchöpis allim sientikü. Kananqa rakchakunata manam rikaränatsu, Jehovä perdonamanqanta y yanapamanqantam sientï. 2000 watachömi alläpa kuyanëpaq Karolin jutiyoq Testïguwan casakurqä. Pëpis noqanöllam Jehoväta alläpa kuyan. Wayïchöqa alli pasakïchömi kawakuyä. Alläpam kushikuyä juk limpiu y kuyakoq markachö kayanqäpita.