Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Febrëru de 2016

Jehoväta kushishqalla sirwï

Jehoväta kushishqalla sirwï

¿IMATAQ mas kushikïpaq junaq kawënikichö karqan? Wakinqa niyan, casakuyanqan o wamrankuna yurikunqan junaq kanqantam. Peru qampaqqa, bautizakunqëki junaqchi mas precisaq y kushikïpaq junaq karqan. Cristiänu mayikikunaqa llapan shonqïkiwan, voluntänikiwan, yachënikiwan y llapan kallpëkiwan Diosta kuyanqëkita rikar kushikuyarqan (Marcus 12:30).

Awmi bautizakunqëkipita patsëmi, Jehoväta sirwirnin imëpis kushishqalla kawakurqunki. Peru wakin cristiänukunaqa mananam kushikuyannatsu Diosta sirwirnin. ¿Imanir? ¿Y imakunataq yanapamäshun Diosta kushishqalla sirwinapaq? Rikärishun.

¿IMANIRTAQ WAKINKUNAQA JEHOVÄTA SIRWIRNIN KUSHISHQANATSU KAYAN?

Jehovä Diospa Gobiernumpita willakïqa alläpam kushitsimantsik. Porqui Jehovämi änimantsik ichikllachöna mana allikunata Gobiernunwan ushakäratsirnin, kë Patsata juk shumaq huertaman tikratsinampaq kaqta. Sofonïas 1:14 textum kënö nin: “Jehoväpa jatun piñakïnin junaqqa këllachönam”. Tsënö kaptimpis, itsa Jehoväpa jatun piñakïninta alläpa unëna shuyarëkanqantsikta pensashwan. Tsënö pensarqa, manam gänas gänasllatsu Diosta sirwishun y kushikïnintsikpis ushakärinqam (Proverbius 13:12).

Cristiänu mayintsikkunawan tiemputa pasanqantsikmi yanapamantsik, kushishqalla Diosta sirwinapaq. Itsa Jehoväpa testïgun kanapaqqa, yanapamarquntsik Diospa sirweqninkunapa alli portakïninkunata rikanqantsik (1 Pëdru 2:12). Peru mëqan wawqintsik o panintsikpis mana allita ruranqampita congregacionpita qarqushqa kaptinqa, itsa qelanäratsimashwan y hasta kushikïnintsikta oqraratsimashwan.

Jina imëkayoq y mas qellëyoq këta munanqantsikpis qelanäratsimashwanmi. Porqui Satanaspa makinchö këkaq nunakunaqa, mana wananqantsik cösaskunata rantinapaqmi creitsimënintsikta munayan. Peru Jesus kënö ninqanta yarpäshun: “Manam pipis ishcaq patrontaqa sirwinmantsu. Tseno carqa, jucnin patronta cuyarninmi, jucnintaqa mana caqpaq churanqa; jucninta sirwirninmi, jucnintaqa mana cäsonqatsu. Tsemi Diosta cuyecarqa, ama riquesacunata cuyashuntsu” (Mateu 6:24). Satanaspa makinchö këkaq nunakuna munatsikuyanqanta ashita tïrarninqa, manam kushishqatsu Jehoväta sirwishun.

¿IMANIRTAQ JEHOVÄTA KUSHISHQA SIRWISHWAN?

Jehoväta kuyarninqa, manam alläpa sasatanötsu (ajatanötsu) sirwinqantsikta rikantsik (1 Juan 5:3). Jesusmi kënö nirqan: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi. Imeca yugucho noqalla arsuta apaq cuentam qamcunawan  purishun. Noqam qollmi shonqu car y umildi car, llapan nacaquiniquicunapita jamaratsiyashqequi. Noqapa yugoqa manam lasantsu. Yanapayäpteq ancashllam canqa” (Mateu 11:28-30). Rikanqantsiknömi, Diospa rasumpa sirweqninkuna kanqantsikqa alläpa kushitsimantsik. Tsënö këkaptinqa, ¿manatsuraq Jehoväta kushishqa sirwishwan? Kimallata rikärishun (Habacuc 3:18).

Kamakoq y kushishqa Diostam sirwintsik (Hëchus 17:28; 1 Timoteu 1:11). Llapantsikmi musyantsik kawënintsikqa Jehovä qomanqantsikta. Tsëman pensanqantsikmi yanapamantsik, mëtsika watakunapana bautizakushqa këkarpis kushishqalla sirwikänapaq.

Hectorqa yachatsikunampaq kallpachakurninmi sïguin y yarpëninchö imëpis shumaq patsata katsinampaqmi kallpachakun

Hector jutiyoq wawqi pasanqanta rikärishun. Pëqa 40 watakunapam congregacionkunata watukarnin yanapakurqan. Kananqa edäyashqanam, peru Jehovätaqa kushishqallam sirwikan (Salmu 92:12-14). Warminqa alläpam qeshyan, tsëmi Hectorqa unënö yanapakïtaqa puëdinantsu. Peru manam tsërëkurtsu llakishqalla kakun. Warminta mas antsaqta rikarnin llakikurpis y cuidanan mana fäcil kaptimpis, manam Jehoväta kushishqalla sirwitaqa jaqintsu. Jehovä imapaq kamanqanman pensanqanmi yanapan, mas kuyanampaq y shonqupita patsë sirwinampaq. Tsëmi allipa sinchikun yachatsikunampaq y juk shumaq patsata äninqanman yarparänampaq.

Jehoväqa noqantsikrëkur wanunampaqmi tsurinta kachamurqan. Bibliam kënö nin: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Jesus noqantsikrëkur wanunqanman markäkushqaqa, Diosmi jutsantsikpita perdonamäshun y mana wanushpa kawakïtam qomäshun. Tsëpitam alläpa agradecïdu këkantsik. Y agradecïdu kanqantsikqa Jehoväta kushishqa sirwinapaqmi yanapamäshun.

Jesusqa kapunqanllawan kawarninmi, atska watapana Jehoväta alläpa kushishqa sirwirqan

Mexicupita Jesus jutiyoq wawqim willakun unëqa alläpa trabajanqanta. Höraqa hasta mas hörakunam trabajaq mas qellëta ganananrëkur. Tsënö këkarmi Jehoväta reqirirqan y yachakurirqanmi jukllëlla tsurinta noqantsikrëkur wanunampaq kachamunqanta. Jehovällatana sirwita munarmi bautizakunampaq änikurirqan. Jina 28 watapana tsë emprësallachö trabajëkarpis, tsë trabäjutaqa jaqirirqanmi. Tsënömi Jesusqa qallarqan Jehoväta sirwirnin kushishqa kawakïta.

Jehoväta sirweqkunaqa kawënintsikchö limpium kantsik. ¿Yarpankiku Jehoväta manaraq reqiptiki kawëniki imanö kanqanta? Apostol Pablum Römachö cristiänukunata yarpätsirqan unëqa “jutsapa esclabun” kayanqanta, peru tsëpitaqa  ‘allicuna rurepa esclabunna’ kayanqanta. Y tsënöna kawakurnin mana wanushpa kawakïta shuyarëta puëdiyanqanta (Romänus 6:17-22). Noqantsikpis Jehoväpa mandakïninkunatam wiyakuntsik, tsëmi mana allikunata ruranqantsikpitaqa sufrintsiknatsu. ¿Manaku tsëpitaqa alläpa kushikuntsik?

Jaimiqa segürum këkan Jehoväta sirwir qallanqan witsampita kawëninchö mas kushishqa kanqanta

Jaime jutiyoq wawqi Testïgu manaraq karnin imanö kanqanta rikärishun. Pëqa pelyëta yachaq nunam karqan. Jina Diosmampis manam creeqtsu, sinöqa imëkapis kikinlla yurinqanmanmi creeq. Reunionkunaman ëwar qallëkurmi, cristiänu pura alläpa kuyanakuyanqanta rikar alläpa espantakurqan. Tsëmi, kawëninchö cambiukunata ruranampaq decidirirqan, peru Jehovätam mañakurqan pëman creinampaq yanapëkunampaq. Kënömi nin: “Ichikllapa ichikllapam Dios alläpa kuyakoq y ankupäkoq kanqanta yachakur qallëkurqä”. Diosta wiyakunqanqa kawëninchö imëkapita tsapanqantam nin. Jina ninmi: “Kawënïta mana cambiashqa karqa, itsa wakin pelyaq mayïkunanö wanushqana käman karqan”. Segürum këkan Jehoväta sirwir qallanqan witsampita kawëninchö mas kushishqa kanqanta.

AMA QELANÄSHUNTSU

Mana alli nunakunapa ushakëninta shuyaranqantsikyaqqa, Dios nimanqantsiktam rurëkänantsik y mana wanushpa kawakïtam shuyarëkänantsik. Tsëmi Gälatas 6:8, 9 textu consejakunqanta wiyakunantsik, kënömi nin: “Ama qelanäshuntsu allicuna rureta, y mana utinashpa rurarqa, tiempunchomi allita cosechashun”. Jehoväpa yanapakïninta ashishun y “jatun sufrimientu” witsan imëkatapis aguantanapaq kallpachakïta yachakushun y Diosta kushishqalla sirwirnin sïguishun (Apocalipsis 7:9, 13, 14; Santiägu 1:2-4).

Alli tsarakurninqa, segürum këkantsik Jehovä bendicimänapaq kaqta. Porqui Jehoväqa musyanmi kuyarnin imëkatapis ruranqantsikta. Kushikïwan sirwirninqa, Davidnömi kënö nishun: “Imëpis nöpämanmi Jehoväta churarqö. Derëchächömi pëqa këkan, y manam ishkinätsiyämanqatsu. Tsëmi shonqüchu alläpa kushikü” (Salmu 16:8, 9).