ISHKË WARANQA watanönam pasarishqa Jesus kënö ninqampita: “Ëllïpaq cosëchaqa mëtsikam, peru peonkunaqa wallkaqllam kayan. Tsënö këkaptinqa, cosëchapa Duëñunta rogakuyë cosëchanman peonkunata kachamunampaq” (Lüc. 10:2). Jesus tsënö ninqanqa, Myanmar nacionchö pasakïkanqantam cläru rikätsikun. Tsëchöqa 55 millon nunakunam kayan, peru cäsi 4.200 publicadorkunallam Diospa Gobiernumpitaqa yachatsikïkäyan.

‘Cosëchapa Duëñun’ Jehoväqa mëtsika nacionpita sirweqninkunatam, Myanmarman yachatsikoq ëwayänampaq yanapashqa. ¿Imanirtaq nacionninkunata jaqirïkur ëwakuyänampaq decidiyashqa? ¿Imakunatataq rurayashqa ëwakuyänampaq? ¿Y ima bendicionkunatataq chaskikäyan? Rikärishun.

“ËWAKAYÄMÏ, MAS PRECURSORKUNATAM WANAYÄ”

Japon nacionpita Kazuhïru jutiyoq precursortam atäki qeshya alläpa fuerti tsarïkurqan, tsëmi hospitalman apayarqan. Tsëchömi doctorqa nirqan, ishkë watapa cärruta mana manejanampaq. Kazuhïruqa alläpa llakishqam sientikurqan y kënömi nirqan: “¿Kananqa imataraq rurashaq? Precursor këqa alläpam gustaman y manam jaqita munätsu”. ¿Imatataq rurarqan? Jehovämanmi mañakurqan precursornö yanapakur sïguinampaq.

Kazuhïruwan Mari

Kazuhïrum pasanqanta kënö willakun: “Juk killa pasariptinmi, Myanmarchö yanapakïkaq juk amïgü imapa pasëkanqäta musyarirqan, tsëmi qayaramar kënö nimarqan: ‘Myanmarchöqa mëtsika cärrukunam pasajërukunata puritsir trabajayan y manam kikintsikpa cärruntsik kanan precisantsu. Tsëmi këchöqa precursor këtaqa puëdinki’. Tsëmi doctorta tapurirqä, Myanmarman ëwëta puëdinqäta o manapis. Y pëqa kënömi nimarqan: ‘Atäki qeshyapita musyaq Myanmarpita doctormi Japonchö këkan. Pëtam reqiratsishqëki, Myanmarchö atäki qeshya tsarishuptikiqa pëman atiendikoq ëwanëkipaq’. Tsënömi Jehoväqa mañakunqäta contestëkämurqan”.

Tsëpitanam Kazuhïruqa Myanmar sucursalman qellqarirqan, warminwan precursornö yanapakïta munayanqanta musyatsikunampaq. Pitsqa junaq pasarinqanllachömi, sucursalpita kënö niyämurqan: “Ëwakayämï, mas precursorkunatam wanayä”. Tsënam Kazuhïruwan warmin Mariqa cärrunkunata rantikuriyarqan, tsë nacionman ëwayänampaq documentukunata jorqayarqan y avionwan ëwayänampaq pasäjinkuna rantiyarqan. Y kananqa, Myanmarpa Mandalay  markanchömi sëñas idiömachö kushishqa yanapakïkäyan. Kazuhïrum kënö nin: “Pasayämanqanqa Salmus 37:5 textu rasumpa kanqantam rikätsiyäman, tsëchöqa nin yarpachakïnintsikkunata Jehoväpa makinchö jaqirishqaqa yanapamänapaq kaqtam”.

JEHOVÄMI YANAPAKUN JUK NACIONCHÖ SIRWIYÄNAMPAQ

Myanmar nacionchömi, Jehoväpa testïgunkunaqa juk asamblëata 2014 watachö rurayarqan. Tsëmanqa atska nacionpita Testïgukunatam invitayarqan. Ëwaqkunapita jukqa karqan, Estädus Unïdus nacionpita 34 watayoq Monique jutiyoq panim. Pëmi kënö willakun: “Nacionnïta kutirirqa, Myanmarchö yanapakïta munanqäpitam Jehoväman mañakurqä. Jina teytäkunawampis parlarqämi. Y pëkunaqa pensëkanqä alli kanqantam niyämarqan. Peru ëwanäpaq kaqta manaraq decidirninmi, Jehoväman alläpa mañakurqä y ichik tiempu pasananta shuyararqä”. Imanir Monique tsëta ruranqanta rikärishun.

Moniquewan Lï

Kënömi willakun: “Jesusqa qateqninkunatam nirqan gastukunata alleq rikäyänampaq, tsëmi kënö tapukurqä: ‘¿Qellënïqa tinkunqatsuraq yanapakoq ëwanäpaq? ¿Alläpa mana trabajashllapa tsë nacionchö mantenikïta puëdishaqtsuraq?’”. Moniqueqa cuentatam qokurirqan, Myanmar nacionta yanapakoq ëwanampaq qellënin mana tinkunqanta. Tsëqa, ¿imatataq rurarqan tsë nacionman ëwanampaq? (Lüc. 14:28).

Jina kënömi willakun: “Juk junaqmi patrönä qayamarqan parlayänäpaq. Y noqaqa alläpam mantsakarqä, porqui trabäjupita qarqamänampaq kaqtam pensarqä. Peru alli trabajanqäpita agradecikurnin qellëta qoyämänampaq kaqtam nimarqan y qoyämarqanmi. Y tsë qellëqa wanëkanqä tinkum karqan”.

Moniqueqa 2014 wata diciembri killapitam, Myanmar nacionchö yanapakïkan. ¿Imanötaq sientikun tsëchö yanapakurnin? Kënömi nin: “Alläpa kushishqam këkä. Y kimaqtam Bibliapita yachëkätsï. Jukqa 67 watayoq warmim, y wayinman chaptïqa alläpa kushishqam waqupäraman. Diospa jutin Jehovä kanqanta musyarirqa waqarirqanmi. Y kënömi nimarqan: ‘Kananraqmi Diospa jutinta musyarï. Y noqapita mas jövinllaraq këkarnimpis, mana musyanqätam yachatsimarqunki’. Waqanqanta rikarninqa noqapis waqarirqämi. Tsënö pasakunqankunata rikarninmi, Diospita yachatsikoqkuna alläpa mana kayanqan sitiukunachö yachatsikurnin, alläpa kushishqa sientikü”. Moniqueqa, tsëllaran Diospa Gobiernumpita Yachatsikoqkunapaq Escuëlaman ëwashqa.

Jina 2013 watachö yarqamoq Anuario de los testigos de Jehová nishqan libruchömi, Myanmar nacionpaq willakun. Tsëta leyirninmi, wakin Testïgukunaqa Myanmarta yanapakoq ëwakuyarqan. Asiapita 30 watayoqnö jutiyoq paniqa llapan tiempunwanmi trabajaq, peru Myanmarpaq willakïta Anuariochö leyirirqa tsëman ëwakunampaqmi pensarirqan. Kënömi nin: “2014 watachö Yangon markachö rurayanqan asamblëaman ëwarmi, chïnu idiömachö yanapakïkaq juk parëjata reqirirqä. Tsëmi noqapis tsë idiömata yacharnin, Myanmar nacionman ëwakïta decidirirqä. Tsëchömi Moniquewan reqinakuyarqä, y Mandalay markachö juntu yanapakuyänäpaqmi decidiyarqä. Jehovä yanapayämaptinmi, juk escuëlachö profesöranö trabayänäpaq trabäjuta tariyarqä y wayitapis tsë amänullachömi tariyarqä. Alläpa achachaptimpis kushishqam yanapakïkä. Myanmarchö nunakunaqa kuyakoqmi kayan y Bibliapita yachatsishqapis shumaqmi wiyakuyan. Tsëchö yachatsikuyanqätaqa Jehovä bendicikämunmi. Segürum këkä, Mandalay markachö yanapakunäta Jehovä munanqantaqa”.

JEHOVÄQA MAÑAKUYANQANTAM WIYARQAN

Juk markakunachö yanapakïkaqkunaqa, clärum rikäyashqa mañakuyanqanta Jehovä contestamunqanta. Jumpei jutiyoq wawqi y warmin Naöqa 30 watapitapis masyoqnam kayan, nacionninkuna Japonchöqa  sëñas idiömachö yanapakïkäyarqan. Tsëpitanam Myanmar nacionta ëwakuyarqan. ¿Imanirtaq ëwakuyarqan? Jumpei wawqim kënö willakun: “Warmïwanqa juk nacionkunachömi imëpis yanapakïta munayarqä. Sëñas congregacionchö yanapakïkäyaptïmi, juk wawqi Myanmarta yanapakoq ëwakurqan. Tsëmi noqakunapis qellënïkuna alläpa mana këkaptimpis, 2010 wata mäyu killachö ëwakuyarqä. Myanmarchö wawqikuna y panikunaqa alläpa shumaqmi chaskiyämarqan”. ¿Imanötaq kananqa këkäyan? Jumpei wawqim kënö nin: “Nunakunaqa alläpam Diospita wiyakïta munayan. Sëñas idiömachö sordukunata videukunata rikätsiyaptïqa alläpam kushikuyan. Y këman ëwakayämunqäpitaqa, alläpa kushishqam këkäyä”.

Naöwan Jumpei

¿Imatataq Jumpeiwan warmin Naöqa rurayashqa gastukunapaq pishipakurnin? Jumpeim kënö nin: “Qellënïkunaqa kima watallapaqmi tinkurqan, y shamoq wata wayi arrienduta pagakuyänäpaqqa manam karqannatsu. Tsëmi Jehoväman alläpa mañakuyarqä. Y mana shuyaräyanqämi pasakurirqan, ¡juk tiempupa precursor especialnö yanapakuyänäpaqmi invitayämarqan! Jehovämanmi alläpa confiakuyarqä, y pëqa imëpis cuidayämashqam”. Jumpeiqa warminwanmi, Diospa Gobiernumpita Yachatsikoqkunapaq Escuëlaman ëwayashqa.

JEHOVÄMI MËTSIKAQTA YANAPAN

Simöniqa 43 watayoqmi y Italia nacionpitam, y warmin Annanam 37 watayoq y Nuëva Zelanda nacionpitam. Pëkunaqa Myanmar naciontam yanapakoq ëwakuyashqa. ¿Imanirtaq ëwakïta decidiyarqan? Annam kënö nin: “Myanmar nacionpaq parlaq 2013 wata Anuario libruta leyiyanqämi yanapayämashqa”. Simöninam kënö nin: “Myanmarchö këqa alläpa kushikïpaqmi. Manam alläpa trabajanä precisantsu, tsëmi Diospita yachatsikunäpaq mas tiempü kan. Yachatsikoqkunata mas wanayanqan markakunachö yanapakushqa, Jehovä imanö cuidamanqantsikta rikëqa alläpa kushikïpaqmi” (Sal. 121:5). Y Annanam kënö nin: “Kanannöqa manam imëpis kushishqa karqötsu. Y manam imapaqpis alläpa yarpachakütsu y qowäwampis mas juntu kayä. Jinamampis, atska amïgukunayoqmi kayä. Y nunakunaqa Testïgukunata allim chaskiyan, y wiyakïtapis alläpam munayan”. ¿Imanirtaq Annaqa tsënö nin?

Simöniwan Anna

Kënömi willakun: “Juk junaqmi universidächö estudiëkaq shipashta mercäduchö Diospita parlapärirqä. Y yapë tinkuyänäpaqmi quedayarqä. Tsë kaq kutipaqqa, juk amïgantam pushamurqan. Y yapë kaqchönam, mas amïgankunata pushamurqan. Y kananqa pitsqaqtanam Bibliapita yachëkätsï”. Y Simöninam kënö nin: “Diospita yachatsiyanqä nunakunaqa alläpa allim kayan, y atska tapukïkunatam rurayäman. Diospita yachakïtaqa alläpam munayan, peru manam tiempükuna tinkuntsu llapankunata yachatsiyänäpaqqa”.

Sachïuwan Mizuhu

¿Imatataq wakinkunaqa rurayarqan Myanmar nacionman manaraq ëwakurnin? Japonpita Mizuhu panim kënö nin: “Qowä Sachïuwanqa Diospita yachatsikoqkunata mas wanayanqan sitiukunaman yachatsikoq ëwëtam munayarqä, peru manam  musyayarqätsu mëta ëwayänäpaq kaqta. ¿Imataq yanapayämarqan? 2013 wata Anuario libruchö willakïkunata leyiyanqämi. Tsëmi Myanmarman yanapakoq ëwayänäpaq pensar qallëkuyarqä”. Jina Sachïum kënö nin: “Puntataqa tsë nacion imanö kanqanta musyapakoqmi ëwëta munayarqä. Tsëmi Myanmarpa mas precisaq Yangon markanchö juk semäna kayarqä. Tsëta rurayanqämi yanapayämarqan, tsë nacionman yanapakoq ëwakuyänäpaq”.

¿JUK NACIONKUNAMAN YANAPAKOQ ËWËTA MUNANKIMANTSURAQ?

Jane, Danïca, Rodney y Jordan

Australia nacionpita Rodney y warmin Janeqa, 50 watayoqnömi kayan. Pëkunaqa Jordan y Danïca wamrankunawanmi, 2010 watapita patsë Myanmarchö yanapakïkäyan. Rodneymi kënö willakun: “Tsë nacionchö nunakunaqa alläpam Diospita yachakïta munayan. Tsëmi juk familiakunatapis invitarï, Diospita yachatsikoqkunata mas wanayanqan markakunachö yanapakuyänampaq”. ¿Imanirtaq tsënö nin? Kikinmi kënö entienditsikun: “Këchö bendicionkunata chaskiyanqäwanqa manam imapis igualantsu. Mëtsikaq jövinkunam telëfunullapaq, cärrullapaq, trabäjullapaq y juk cösaskunallapaq yarparäkuyan. Peru wamräkunaqa, Diospita yachatsikuyänampaqmi Bibliapita shumaq yachakuyan y tsë nacionchö parlayanqan idiömatapis. Jina reunionkunachö parlakuyänampaqmi shumaq yachakuyan. Pëkunaqa mas precisaq kaq rurëkunachömi ocupädu këkäyan”.

Öliverwan Anna

Öliverqa 37 watayoqmi y Estädus Unïduspitam. Juk nacionkunachö yanapakï imanir alläpa alli kanqantam, pëqa kënö nin: “Imëka jananchö kawakïta jaqirir, juk markakunachö Jehoväta sirwirninqa atska bendicionkunatam chaskirqö. Kananqa masmi Jehoväman markäkü, y ima pasakuptimpis Jehovä yanapamänampaq kaqmanmi mas confiakü. Mana reqinqä wawqikunawan y panikunawan yanapakurmi rikarqö, Diospa Gobiernunlla imëkapitapis mas precisaq kanqanta”. Öliverwan warmin Annaqa, chïnu idiömata parlaq nunakunatam Diospita yachatsir sïguikäyan.

Trazel

Australia nacionpita 52 watayoq Trazel jutiyoq paniqa, 2004 watapita patsëmi Myanmarchö yanapakïkan. Pëmi kënö nin: “Llapan puëdeq kaqkunatam nï, Diospita yachatsikoqkunata mas wanayanqan markakunachö yanapakuyänampaq. Pëta sirwinapaq kallpachakushqaqa, Jehoväqa alläpa bendicimanqantsiktam cuenta qokurqö. Manam imëpis pensarqätsu kanannö alläpa kushishqa kawanäpaq kaqtaqa, këmi rasumpa alli kawakïqa”.

Qampis, ¿puëdinkimantsuraq Diospita yachatsikoqkunata mas wanayanqan markakunachö yanapakïta? Kë willakïchö wawqikuna y panikuna niyanqankuna tsëta rurayänëkipaq yanapariyäshunëkitam munayä. Tsënö markakunachö yanapakïkaqkuna, “Myanmar nacionman yanapayämaq shayämi” nimaqnintsik cuentam invitaramantsik.