WAKINKUNAQA MANAM NIYANMI. Juk doctormi kënö nirqan: “Yanapakïta tarinapaq Biblia utilicëqa, Quïmica cursuta yachatsikunapaq 1920 wata yarqamoq libruta utilicënömi kanman”. Y imamampis asïlla mana creeq nunaqa itsa kënö tapurishunkiman: “¿Unë kaq computadörapa papelnintatsuraq leyinkiman, mushoq computadöra imanö funcionanqanta musyanëkipaq?”. Bibliaqa unë kaqllata yachatsikunqantam wakinkunaqa niyan.

Internetchö imëka yanapakïkuna y consëjukuna imëpis yarqëkämuptinqa, ¿imapaqraq pipis unë kaqllata parlaq librupa yanapakïnintaraq ashinman? Tukï progrämakunachömi, mëtsikaq doctorkuna y hindü religionpa pushakoqninkuna imëkata willakurnin yarqayämun. Y librukunata qellqaqkunapis imëka yanapakïkunatam librunkunachö jorqayämun y atska qellëtam ganayan.

Tsë yanapakïkuna yarqëkämuptinqa, ¿imapaqraq Bibliapa yanapakïninta ashiyanman qellqakanqampita cäsi 2.000 watakuna pasashqa këkaptinqa? Bibliapa consëjunkunata ashiqa, unë librukunata y unë computadörakunapa papelninkunata leyinö kanqantam wakin nunakunaqa niyan. ¿Peru tsëqa rasumpatsuraq? Manam. Ciencia asuntu y tsëllaraq yarqamoq cösaskunaqa rasllam cambiarin, peru ¿nunakuna munayanqanqa cambiashqatsuraq? Manam. Tsëpa rantinqa, nunakunaqa kushishqa kawakïta y següru kawakïtam imëpis munayan; jina alli kawakïta, familiankuna juntu kayänanta y alli amïgukunayoq këtapis.

Unë libru karpis, Bibliaqa tsëkunapaq y maskunapaqmi parlan. Jinamampis, kamakoqnintsik qellqatsishqantam cläru nimantsik. Bibliachöqa kawënintsikpaqmi tukï consëjukuna kan y shamoq tiempuchö imëkapa pasarpis alli tsarakunapaqmi yanapamantsik (2 Timoteu 3:16, 17). Y consëjunkunaqa mana ushakaq karmi imëpis yanapakïkanqalla, tsëtam kikin Biblia nin. Jinamampis “Diospa palabranqa kawaqmi” (Hebrëus 4:12).

¿Bibliapaq tsënö pensayanqanqa rasumpatsuraq? ¿Mananatsuraq kanan witsan yanapakun? ¿O imëkachöpis yanapakoq librutsuraq? Kë revistachömi tsëpa respuestanta tarinki, y kë nümerupita witsëpaqa juk yachatsikïllapitanam parlanqa.