Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 6 2017

 LEYEQKUNA MUSYËTA MUNAYANQAN

¿Cristiänukunaqa Navidäta celebrayanmantsuraq?

¿Cristiänukunaqa Navidäta celebrayanmantsuraq?

Entëru Patsachö millonyëpayan nunakunam, Navidächöqa Jesucristupa cumpleäñunta celebrëkäyanqanta pensayan. Peru ¿imëllaqa Jesuspa qateqninkuna y apostolninkuna Navidäta celebrayarqantsuraq? Y ¿musyankiku cumpleäñu celebrëpaq Biblia imata yachatsikunqanta? Këkunapita musyanqantsikmi yanapamäshun, cristiänukunaqa Navidäta celebranapaq kaqta o mana celebranapaq kaqtapis.

Bibliachöqa manam willakuntsu, Jesuspa o Diospa sirweqninkunapa cumpleäñunkunata celebrayanqantaqa. Diospa Palabranchöqa willakun ishkaq nunakunalla cumpleäñunkunata celebrayanqantam, y pëkunaqa manam Diosta sirwiyaqtsu. Jinamampis, tsë celebrayanqankunaqa mana allichömi usharqan (Genesis 40:20; Marcus 6:21). Encyclopædia Britannica nishqan libru willakunqannömi, “cumpleäñu celebrë mana alli costumbri” kaptin, apostolkuna kawayanqan witsanchö cristiänukunaqa celebrëta munayarqantsu.

¿Imëtaq Jesus yurirqan?

Bibliaqa manam willakuntsu, imë junaqchö Jesus yurinqanta. Diccionario de historia de la Iglesia nishqanmi kënö willakun: “Manam unë willakïkunachöqa ni imapis rikätsikuntsu, imë junaqchö y ima killachö Jesus yurinqantaqa”. Awmi, cumpleäñunta celebrayänanta munarqa imë junaq yurinqanta musyayänampaqchi, Jesusqa qateqninkunata cläru willanman karqan.

Jinamampis, Bibliachöqa manam nintsu Jesus ni qateqninkuna Navidäta celebrayanqantaqa. New Catholic Encyclopedia libru ninqannömi, Röma nunakuna utilizäyanqan calendariuchö Navidä celebracionqa puntata yurirqan, y willakïninqa itsapis 336 watapita karqan. Tsëqa Bibliata qellqar ushayanqampita y Jesucristu kë Patsaman shamunqampita atska pachak watakuna pasarishqanchönam karqan. Tsëmi, Cyclopedia de McClintock y Strong libruqa, Navidäta celebrayänampaq Diosnintsik mana mandakunqanta ni Mushoq Testamentuchöpis mana willakunqanta nin. *

¿Ima precisaq junaqta yarpäyänampaqtaq Jesusqa qateqninkunata mandarqan?

Jesusqa juk Alli Yachatsikoqmi karqan, pëqa qateqninkunatam imata rurayänampaq kaqta cläru nirqan, y Bibliachömi tsë ninqankunaqa këkan. Peru Navidäta celebrayänampaqqa, manam imëpis nirqantsu. Imanömi juk profesorqa ninqannölla alumnunkuna rurayänanta shuyaran, tsënöllam Jesuspis Diospa Palabranchö “qellqashqa këkaqkunapita mastaqa” mana rurayänampaq qateqninkunata nirqan (1 Corintius 4:6).

Tsënö kaptimpis, apostolkuna kawayanqan witsanchö cristiänukunaqa, juk precisaq junaqtam imëpis yarpäyänan karqan. Tsëqa Jesus Wanunqanta Yarpë junaqmi karqan. Tsë junaqta imë y imanö celebrayänampaq kaqtam, Jesusqa qateqninkunata nirqan. Imanö rurayänampaq kaq y imë junaqchö rurayänampaq ninqankunaqa, Bibliachömi cläru willakïkan (Lücas 22:7, 19; 1 Corintius 11:25).

Këchö rikärinqantsiknöpis, Navidäqa Jesus yurinqan junaqta celebrë kanqantam pensayan. Peru punta cristiänukunaqa, manam tsë mana alli costumbrita celebrayaqtsu. Jinamampis, Bibliaqa manam yachatsikuntsu Jesus ni wakin nunakunapis Navidäta celebrayanqantaqa. Tsëkunarëkurmi, entëru Patsachö cristiänukunaqa Navidäta mana celebrayänampaq decidiyashqa.

^ par. 6 Navidä celebracion mëpita shamunqanta masllata musyëta munarqa, 2014 wata 1 de diciembri killa Täpakoq revistapa “Leyeqkuna musyëta munayanqan: ¿Mana alliku Navidäta celebrë?” nishqan yachatsikïninta leyiri; jina jw.org päginachöpis këkanmi.