Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 3 2016

 BIBLIAM YANAPASHQA JUKLÄYANA KAWAKUYÄNAMPAQ

Warmikunata y kawënïtapis respetëtam yachakurqö

Warmikunata y kawënïtapis respetëtam yachakurqö
  • YURIKUNQAN WATA: 1960

  • NACIONNIN: FRANCIA

  • MAS REQINAPAQ: DROGADICTU, MAQAKOQ Y WARMIKUNATA MANA RESPETAQMI KARQÄ

PUNTA KANQÄ:

Francia nacionpa Mulhouse markanchömi yurikurqä, y winarqä pelyalla kanqan reqishqa sitiuchömi. Wamra kanqäman yarpaptïqa, täranqächö familiapura pelyakunallatam yarpä. Familiächöqa ollqukuna manam warmita respetayaqtsu y mana kaqpaqmi churayaq. Y cocinakoqlla, qowanta y wamrankunata atiendeqlla kanampaq kaqtam niyäq.

Wamra kanqa witsanqa manam fäciltsu kashqa. 10 watayoq këkaptïmi, machakoqlla kanqanrëkur teytä wanukurqan. Tsëpita 5 wata pasariptinmi mayor kaq wawqï kikin wanutsikurirqan y juk familia pelyayanqanchö juk nunata wanutseqtam rikarqä, tsëtaqa manam qonqëta puëdirqätsu. Wakin familiäkunam kuchïlluta y illapata utilicëta y pelyëtapis yachatsiyämarqan. Problëmallata asheq jövinmanmi tikrarirqä y tatuäjitam rurakurqä entëru cuerpüchö y paqwë machakoqmi tikrarirqä.

16 watayoq këkarqa, juk junaqllachömi 10 a 15 botëllayaq cervëzata upoq kä y drögakunata shoqurmi qallëkurqä. Tsë viciükunata rantinäpaqqa suwakoqmi kä y chatärratam rantikoq kä. Y 17 watayoqllaraq këkarmi carcelchöqa llawirashqana karqä. 18 kutim suwakunqärëkur y pelyanqärëkur carcelchö llawirarqä.

20 watayoq këkarqa mas peorkunamanmi charqä. Cada junaqmi marihuänapita 20 cigärruta shoqoq kä y tukï mana alli drögakunatapis. Tsërëkurmi atska kutipa cäsi wanurqä. Y drögata rantikur qallëkurmi, imëpis illapäwan pureq kä. Juk kutichöqa, juk nunatam illaparirqä, peru bälaqa corrëampa hebïllanllamanmi chëkurqan. 24 watayoq këkaptïmi mamänï wanurirqan, tsëmi mas mana alli tikrakurirqä. Nunakunaqa rikäramarllam mantsakäyaq, y tsëmi cällichöqa juk lädupa ëwakuyaq. Cada semäna ushëmi pelyanqärëkur carcelman llawiyämaq o manaqa hospitalkunaman apayämaq herïdäkunata jirayämunampaq.

28 watayoq këkarmi casakurirqä, y warmïtaqa insultar y maqarmi ushaq kä. Manam pëwan tiemputa pasaqtsu kä, suwakurir imëka aläjakunata qonqälla alli kanqantam pensaq kä. Peru tsënö këkäyaptïmi, warmïqa Jehoväpa testïgunkunawan Bibliapita yachakur qallëkurqan. Juk kuti estudiarirllam, cigärru shoqïta jaqirirqan  y mananam suwakunqä qellëta chaskimarqannatsu y suwakurir qaranqä aläjakunatapis kutïkatsimarqanmi. Manam Bibliapita yachakunanta munarqätsu. Alläpa piñakurmi, cigärrupa qoshninwampis qaqllanman pükapoq kä y jukkunapa nöpanchöpis penqakatseqmi kä.

Juk paqasmi machashqa këkar wayïkunata kayëkurqä. Warmïmi salvayämarqan noqata y 5 watayoq warmi wamräta. Machashqa kënï pasariptinqa ruranqäpita alläpa mana allim sientikurqä. Dios manana perdonamänampaq kaqtam pensarqä, porqui yarparqämi infiernuchö mana allikunaqa rupayänampaq kaqta juk cüra yachatsikunqanta. Hasta doctornïpis, “qamtaqa mananam pipis salvëta puëdishunkinatsu” nimarqanmi.

¿IMANÖTAQ BIBLIA YANAPAMASHQA JUKLÄYANA TIKRANÄPAQ?

Wayïta kayëkunqäpitam, suegrüpa wayinman täraq ëwakuyarqä. Testïgukunam shayämurqan warmï watukaq y noqam tapurqä, ¿jutsäkunapita Dios perdonamanqatsuraq? nishpa. Bibliachömi 1 Corintius 6:9-11 textuta leyirayäpamarqan. Tsëchöqa mana alli portakïkunata Dios chikinqantam rikätsikun y kënöpis ninmi: ‘Tseno llutan ruraqmi waquinniquicunaqa puntataqa cacuyarqequi’. Tsëno ninqanmi cambianäpaq valorta qomarqan. Dios kuyamanqanta rikätsiyämänampaqmi Testïgukunaqa 1 Juan 4:8 textuta leyipäyämarqan. Tsëmi alläpa animamarqan y semänachö ishkë kutim Bibliapita yachakur y reunionkunaman ëwar qallëkurqä. Imëpis Jehovämanmi mañakoq kä.

Juk killallatam drögatawan alcoholta jaqirirqä. Peru cuerpuqa alläpam mañamaq, tsëmi alläpa feyukunata suëñur punïtapis puëdeqtsu kä, peqa nanë, calambrikuna y maskunam tsarimaq. Peru Jehovä yanapëkämanqanta y kallpata qomanqantam sienteq kä. Apostol Pablutanömi pasamarqan, pëqa Dios yanapanqampaqmi kënö nirqan: “Imëpis yanapamaqnï yanapamaptinmi imëkapaqpis kallpä kan” (Filipensis 4:13, NM). Tiempuwanqa cigärru shoqïta jaqirirqämi (2 Corintius 7:1).

Manam noqallatatsu Bibliaqa yanapamarqan, sinöqa familiachö kawënïkunachöpis yanapayämarqanmi. “Por favor” y “payllä” nirmi warmitapis respëtuwan parlapar qallëkurqä. Y warmi wamräwanmi mas tiemputa pasar qallëkurqä. Juk wata Bibliata estudiarirnam warmï ruranqannö, Jehoväpa testïgun kanäpaq bautizakurirqä.

¿IMAKUNACHÖTAQ YANAPAMASHQA?

Bibliapa yachatsikïninmi wanïpita salvamashqa. Drögakunarëkur o pelyakunachö karpis wanushqana kanapaq kaqtam mana Testïgu kaq familiäkunapis niyäman.

Casädukunapaq, teytakunapaq Biblia yachatsikunqanta cäsukur qallëkuyaptïmi, kawënïkunaqa alläpa cambiashqa (Efesius 5:25; 6:4). Juntum imëkatapis rurar qallayarqä. Manam warmï, cocinallachö kanantatsu shuyarä, tsëpa rantinqa Diospita yachatsikunampaqmi tiempunta utilizan, y gustamanmi pëta yanapë. Y pënam yanapaman iglesiäkunachö cristiänu mayikunata yanapar cumplinäpaq.

Diospa kuyakïnin y llakipäkïninmi kawënïta chipyëpa cambiashqa. Shonqupita patsëmi munä, kawëninkunata mana altsëta puëdeqnö sientikoqkunata Jehoväpita parlapëta, porqui noqapis pëkunanömi karqä. Musyämi Bibliapa yanapakïninwan pï mëpis kawëninta altsëta puëdinqanta. Noqataqa yachatsimashqam ollqutapis warmitapis respëtuwan tratanäpaq, y kawënïtapis respetanäpaq.