Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

 QARANCHÖ YACHATSIKÏPITA | WANUPAKUSHQAKUNAPAQ SHOQAKÏ

¿Imanöraq shoqashwan?

¿Imanöraq shoqashwan?

Wanupakushqata yanapëta mana puëdir, ¿imëllapis mana alli sientikurqunkiku? Itsa tsë höraqa imallatapis nita o rurëta puëdinkitsu y upällalla kakunki. Peru yanapëtaqa puëdinkim.

Höraqa pëkunawan kanqantsik y “alläpam llakikü” nirinqantsikmi alliqa kanman. Wakin markakunachöqa, waqupar (makallar) o saludarmi rikätsiyan pëkunaman yarpachakuyanqanta. Wanupakushqa parlapäshïnikita munaptinqa alleq wiyari. O itsa yanaparishwan, mikïta rurëchö, wamrankunata cuidëchö o pëkuna munayaptinqa pampayänampaq patsätsipakïchö. Tsëkunam masqa yanaparinqa.

Itsa tiempuwanqa, kawëkar allita rurayanqampita yarpärir wanushqa kastankunapaq, parlarita munayanqa. Tsënö parlakuriqa alläpa allim kanman, hasta wanupakushqa këkarpis kushikuriyanmanmi. Tsëmi pasarqan Pam jutiyoq warmita, joqta watanam pasarishqa qowan Lan wanunqampita. Pëmi nin: “Qowä allikunata ruranqankunapitam willayäman, tsëtaqa manam musyarqäpistsu, tsëta wiyëqa alläpam kushitsiman”.

 Wakin doctorkuna niyanqannöpis, wanupakushqakunaqa tsë junaqkunallam yanapakïta chaskiyan, peru tiempu pasariptinqa amïgunkunapis rurëninkunachö kakurmi pëkunapita y wanayanqankunapita qonqariyan. Tsëmi, pëkunawan imëpis parlëta tïrë. * Mëtsika watana pasashqa kaptimpis, imanö sientikuyanqampita pillawampis parlaritaqa alläpam agradecikuyan.

Japonpita Kaöriman pensari, maman wanurinqanllachömi, 15 killakunallata mayor kaq nanampis wanurirqan, tsëqa alläpam llakitsirqan. Peru amïgunkunam seguïdu yanapayarqan. Mayorna yanasan Ritsükum, imëka wamrantanö wätanampaq nirqan. Kaörim nin: “Wätamänampaq kaqta pensëqa manam gustamarqantsu. Porqui mamaqa jukllëllam, mamänïwanqa manam pipis igualanmantsu. Peru shumaq tratamaptinmi, Ritsükutaqa alläpa yachanärirqä, y mamä cuentam tikrarirqan. Cada semänam Diospita yachatsikoq yarquyaq kayä, y iglesiäkunamampis ëwayaq kayä. Mikïnïmi apamoq, cartata y tarjëtakunatam qellqapämaq. Ritsükuqa alläpam yanapamarqan”.

Kaöripa maman wanunqampitaqa 12 watanam pasarishqa. Kananqa, vecïnunkunata Bibliapita yachatsiyänampaqmi qowanwan tiempunkunata utilizäyan. Kaörim kënö nin: “Mamä cuenta Ritsükuqa kananyaqpis noqaman yarpachakïkanllam. Wayïman kutirqa pëtaraqmi watukarï, y pëwan karinqäqa alläpam kushitsiman”.

Chipri nacionpita Poli jutiyoq Jehoväpa testïgumpis wakinkunapa yanapakïnintam chaskishqa. Qowan Sozosqa alläpa kuyakoq y alli yanapakoqmi karqan. Iglesianchö teytannaqkunata y viudakunatam wayinman invitaq mikuyänampaq y juk rätu shumaq pasariyänampaq (Santiägu 1:27). Peru llakikïpaqqa, 53 watayoq këkarmi, cancerwan wanurirqan. Warminmi nin: “Imëpis mana jaqikoq yanaqïtam oqrarirqö, pëwanqa 33 watam juntu kawayarqö”.

Wanupakushqakunata tukïnöpa yanapanëkipaq kallpachakï.

Qowanta pamparirmi, Poliqa Canadä nacionpa ëwakurqan, 15 watayoq wamran Danielwan. Tsëchömi Jehoväpa testïgunkunawan juntakar qallëkuyarqan. Polim nin: “Tsë iglesiäkunachö cristiänu mayïkunaqa manam musyayarqantsu imakunapa pasayanqäta. Peru shumaq palabrankunawan y tukïnöpam yanapayämarqan. ¡Tsëqa alläpam wamräta yanaparqan, porqui teytantaqa alläpam wanaq! Tsë iglesiäkunachö dirigeq cristiänukunaqa alläpam Danielpaq yarpachakuyaq. Alli amïgukunawan pelötata pukllar kushishqa pasariyänampaqmi invitayaq”. Kanan witsanqa Danielwan mamanqa kushishqam kawayan.

Rikanqantsiknöpis, wanupakushqakunataqa imëkata rurarmi yanapëta puëdintsik. Shamoq tiempuchö shumaq kawanapaq kaqta yachatsimarnintsikmi Bibliaqa shoqamantsik. Tsëpaq parlaq yachatsikïta qateqnin kaqchö rikäri.

^ par. 6 Wakinkunaqa wanupakushqakunata yanapayänanrëkurmi, tsë fëchata apuntayan tsënöpa tsë tiempuchö shoqayänampaq.