Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 3 2016

 QARANCHÖ YACHATSIKÏPITA | WANUPAKUSHQAKUNAPAQ SHOQAKÏ

¿Waqanqantsikqa allitsuraq?

¿Waqanqantsikqa allitsuraq?

¿Imëllaqa qeshyarqunkiku? Itsa raslla kachakärir qonqarirqëki. Peru, wanupakur llakikïqa jukläyam. Juk doctormi juk librunchö kënö willakun: “Manam ni imawampis tsë llakikïtaqa rasllaqa ushakätsintsiktsu. [...] Peru tiempuwan y wakinkunapa yanapakïninwanmi, tsë llakikïqa ichikllapa ichikllapa ushakanqa”.

Warmin Sära wanuriptin Abrahan imata ruranqanta rikärishun. Bibliaqa nin, Abrahan llakikunqanta y alläpa waqanqantam, tsëmi rikätsikun wanupakur llakikïninta vencinampaqqa tiempuraq pasanqanta. * Jacobtapis tsënöllam pasarqan. Pëtaqa creitsiyarqan wamran Josëta mikukoq animal mikukurkushqantam, tsëmi “mëtsika junaqkuna” llakishqalla kakurqan y manam ni familiankunapis shoqëta puëdiyarqantsu. Watakuna pasariptimpis, Josëpaqqa llakishqallam këkarqan (Genesis 23:2; 37:34, 35; 42:36; 45:28).

Abranqa alläpam waqëkurqan warmin Sära wanuriptin.

Kanan witsampis, familiankuna y amïgunkuna wanuyaptinmi mëtsikaq tsënölla llakikuyan. Tsëtam qateqnin willakïkunachö rikärishun.

  • 60 watayoq Gailmi kënö nin: “Qowä Roberqa, 9 de juliu 2008 watam juk accidentichö wanukurqan. Tsë qoyaqa imëpis pasanqannöllam pasakurqan, desayünuta upurirmi, ‘alläpam kuyaq’ nir despidinakuyarqä. Tsë pasakunqampitaqa joqta watapitapis masnam pasarishqa, peru qowä wanukunqampitaqa llakishqallaran këkä. Manachi imëpis qonqashaqtsu”.

  • 84 watayoq Etienne nunam kënö nin: “Kuyashqa warmï wanukunqampita 18 watana pasashqa kaptimpis, alläpam llakï y lädüchö mana këkanqanqa alläpam sufritsiman. Imatapis shumaqta rikarqa, pëtam yarpärï, imanöraq tsëta rikarnin kushikunman karqan”.

Rasumpam, pïnintsik wanukuptin llakikunqantsikqa manam rasllaqa pasarintsu. Cada nunam wanupakurnin llakikïninkunata jukläyapayan sientiyan. Tsëmi imanöpis llakikuyanqantaqa juzgashwantsu. Jina manam llakikïnintsikta, ‘penqapäyämanqachi’ nir pakashwantsu. Peru, ¿imallapis yanapamashwantsuraq llakikïnintsikchö?

^ par. 4 Abrahanpa tsurin Isaacpis, mamam wanuriptinmi, atska tiempupa llakikurqan. “Pëkunapita yachakushun” neq yachatsikïchö leyinqantsiknöpis, maman wanunqampita kima wata pasarishqanchöpis Isaacqa llakishqallaran këkarqan (Genesis 24:67).