Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 3 2016

 QARANCHÖ YACHATSIKÏPITA | WANUPAKUSHQAKUNAPAQ SHOQAKÏ

¿Imanötaq vencishwan wanupakurnin llakikïta?

¿Imanötaq vencishwan wanupakurnin llakikïta?

Mëtsika consëjukunam kan, peru manam llapantsu yanapakun. Tantiyarinapaq, itsa wakinqa niyan llakikïninkunata mana rikätsikuyänanrëkur mana waqayänampaq, o wakinnam ‘mëyaqpis waqëlla’ niyan. Peru Bibliapa consëjunqa jukläyam, y yachaqkuna niyanqanwampis igualanllam.

Wakin markakunachöqa ollqukuna waqayanqantaqa mana allipam rikäyan. ¿Penqakushwantsuraq wakinkunapa nöpanchö waqëta? Wanupakurnin waqëqa allilla kanqantam wakin doctorkunaqa niyan. Llakikïta vencinapaqqa tiempu pasanqanran yanapakunqa. Peru, llakikurnin waqëta aguantëqa manam yanapakuntsu. Waqëqa allilla kanqanta y ollqukunapis waqayanqantam Bibliaqa willakun. Jesusta pasanqanta yarpë, wanushqakunata kawaritsita puëdikarpis, amïgun Läzaru wanuriptinqa, nunakunapa nöpanchö waqëtaqa manam penqakurqantsu (Juan 11:33-35).

Wanupakur llakikïninkunatam wakinqa piñakïwan höraqa rikätsikuyan, masran illaqpita wanukïkuyaptinnäqa. Höraqa piñashqa sientikunman pipis respetanqan mana pensashpa llutanta imatapis niptinmi. Sudafrica nacionpita Mikim kënö willakun: “14 watayoqllaran karqä teytä wanukunqan witsanqa. Teytäta pampayanqan junaqmi juk pastor nimarqan, alli kaqkunata ciëluchö Dios wanar apakushqa kanqanta. * Tsënö nimanqanqa alläpam piñatsimarqan, porqui teytätaqa noqakunam masqa wanayarqä. Tsëpitaqa 60 watanam pasarishqa, tsënö nimanqanqa kananyaqpis llakitsimanllaran”.

¿Y culpayoq sientikurqa imataraq rurashwan? Pipis wanupakurninqa, itsa kënö pensanman: “Këta o wakta rurashqa kaptïqa, manachi wanunmantsu karqan” nishpa. O plëtushqa karninnäqa itsa masraq culpayoq sientikunman.

Culpayoq o piñashqa sientikurninqa, ama kikikillachö tsënö sientikur kakïtsu. Tsëpa rantinqa, entiendishoqniki amïguïkita willë, pëmi yanapashunki tsënölla mëtsikaqkuna sientikuyanqanta nishurniki. Bibliam nin: “Llapan tiempuchömi rasumpa amïguqa kuyakun. Y llakikï tiempuchö yanapamänapaq yurishqam” (Proverbius 17:17).

Tsë llakikïkunachö mas alli kaq amïguqa Jehovämi. Shonqïkichö imanö sientikunqëkita willë, porqui “Pëqa cuyashunquim” (1 Pëdru 5:7). Tsënö rurarqa rikankim imanö yanapashunqëkita, y ‘allapa espantepaq juclaya shonquta, y yarpetam qoshunqui’ (Filipensis 4:6, 7). Jina Bibliawan Dios shoqashunëkita jaqi. Allim kanman yanapashoqniki textukunata apuntanqëki  y yarpänëkipaq kallpachakunqëkiqa ( recuadruta rikäri). Paqaskunapa japallëki kanqëki höra y punïta mana tarirnin kë yachatsikïkunaman yarpachakunqëkim yanapashunki (Isaïas 57:15).

40 watayoq Jack nunapa warminmi, cancerwan wanurirqan. Höraqa japallanllam sientikun. Peru Diosman mañakunqanmi yanapan. Kënömi nin: “Jehoväwan parlarqa manam japallänatsu sientikü. Höraqa paqaspam riyarï y manam punïtapis puëdïtsu, tsëmi Bibliachö textukunata leyirir y tsëman yarpachakurir, imanö sientinqäta Diosta willarirqa tranquïluna sientikü. Pensënï y shonqüqa yamë këtam taririn y yapëmi punukärï”.

Vanëssapa mamampis alläpa qeshyarmi wanurirqan, peru Diosman mañakunqanmi yanapashqa. Pëmi nin: “Pasëpa llakikunqä hörakunam mana pärëpa waqaq kä y Diospa jutintam mëtsika kuti qayaq kä. Jehoväqa mañakïnïta wiyarqanmi y imëpis yanapamarqanmi”.

Wanupakushqakunata yanapaq doctorkunapis llakishqa sientikoqkunataqa consejayan, wakinkunata yanapayänampaq y markanchö ima rurëllapis kaptinqa yanapakuyänampaqmi. Tsënöpam kushikïta tariyanqa y llakikuyanqanatsu (Hëchus 20:35). Mëtsikaq cristiänukunam wanupakushqa këkarpis, wakinkunata yanapayanqanchö kushikïta tariyashqa (2 Corintius 1:3, 4).

^ par. 5 Tsënö creenciataqa Biblia manam yachatsikuntsu. Tsëpa rantinqa, kima musyatsikïwanmi imanir wanunqantsikta yachatsikun (Eclesiastes 9:11; Juan 8:44; Romänus 5:12).