Cada watam Jehoväta sirwikarnin qelanashqakuna Jesus Wanunqanta Yarpëman shayämun. Pëkunaqa llapan shonqunkunawanmi Jehoväta sirwir qallayarqan, peru Kutikamunëkitam Jehoväqa munan nishqan follëtuchö ninqannömi, imëkakunapa pasarnin qelanäkuriyashqa (Heb 12:1). Pëkunaqa Jehoväpa rikëninchömi alläpa precisaq kayan, porqui Tsurimpa yawarninwanmi rantishqa kayan (Hch 20:28; 1Pë 1:18, 19). ¿Imanötaq pëkunata yanapashwan congregacionman kutiyämunampaq?

Juk mitsikoq oqrakashqa üshankunata asheq cuentam, Jehoväta sirwikarnin qelanashqakunata anciänukunaqa parlapëta procurayan y yanapayan (Lü 15:4-7). Tsëmi rikätsikun Jehoväqa pëkunapaq alläpa yarpachakunqanta (Jer 23:3, 4). Peru manam anciänukunallatsu yanapëta puëdiyan, sinöqa llapantsikmi yanapëta puëdintsik. Alli nuna kanqantsikta y kuyanqantsikta rikätsinapaq imëkata ruranqantsikqa, Jehovätam alläpa kushitsinqa y allipaqmi kanqa (Pr 19:17; Hch 20:35). Tsëqa, cristiänu mayintsikman pensë y raslla yanapëta procurë.

QELANASHQAKUNATA YANAPASHUN NEQ VIDËUTA RIKÄRIYË. TSËPITANA KË TAPUKÏKUNATA RURARÏ:

  • ¿Imatataq Abbey rurarqan juk qelanashqa panita reqirirnin?

  • ¿Imanirtaq qelanashqakunata yanapëta munarqa anciänukunawanraq parlashwan?

  • ¿Imanötaq Abbey alistakurqan Laurata manaraq yapë watukarnin?

  • ¿Imakunata rurartaq Abbeyqa rikätsikurqan; Laurata yanapanqanta, pacienciakoq kanqanta y kuyanqanta?

  • ¿Imatataq yachatsimantsik Lücas 15:8-10 textuchö këkaq Jesuspa igualatsikïnin?

  • ¿Allipaqku karqan Laurata yanapayänampaq tukïnöpa kallpachakuyanqan?