Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 CAPÍTULO 7

Rasumpëpaqa, ¿imataq wanushqakunata shuyaran?

Rasumpëpaqa, ¿imataq wanushqakunata shuyaran?
  • ¿Imanirtaq wanushqakuna kawariyämunanta creintsik?

  • ¿Rasumpëpatsuraq Jehová Diosqa wanushqakunata kawaritsimïta munan?

  • ¿Pikunaraq kawariyämonqa?

1-3. ¿Imataq qatikachëkämantsik, y imanötaq tikrarintsik Biblia yachatsimanqantsikta musyar?

PENSAKURKÏ, qampitapis más kallpayoq y más raslla cörreq chikishoqnikipita safakïkanqëkita o qeshpikikanqëkita. Y tsarïkushurnikiqa ushakätsishunëkita musyankim, wakin amïguïkikunatapis wanutseqta rikashqa kar. Más ras ëwaptikipis taripëkäshunkinam. Mananatsumchi mëpapis ëwëta puëdenkinatsu. Tsëmannam chikishoqnikipitapis más kallpayoq yanapakoq chëkamun salvëkushunëkipaq. ¡Imanö kushikïpaqraq tsëqa kanman!

2 Awmi, qamtapis kë chikikoqnöqa qatikachëkashunkinam. Rasumpëpaqa, llapantsiktam qatikachëkämantsik. Punta capïtulochö yachakonqantsiknöpis, wanïqa chikimaqnintsikmi nishpam Biblia yachatsimantsik. Manam ni mëqantsikpis safëta ni vencita puëdentsiktsu, y kuyanqantsikkunata wanutseqtapis rikarqontsikmi. Pero wanïpita más poderösoqa Jehová Diosmi. Pëmi kuyakoq salvamaqnintsikqa. Y vencita puëdenqantaqa rikätsikushqam, hinamampis chipyëpa ushakätsimunampaqmi änikushqa. Tsëmi Bibliachöqa, “permitïconqa por ultimu wanïpis manana cananpaq”, nimantsik (1 Corintios 15:26). ¡Imanö alli willakïmi këqa!

 3 Yarpakurkushun ichikllapis kë chikikoq imanö hipatsikonqanmam. Tsënöpam, Jehová Dios wanushqakunata kawaritsimunampaq änikonqan willakïta yachakur kushikushun (Isaías 26:19). Pëmi kawaritsimonqa wanushqakunata, këmi tsë shuyaranqantsik resurreccionqa.

KUYË KASTANTSIK WANURIPTIN

4. a) ¿Imachötaq Jehová Dios kuyakoq kanqanta rikätsimantsik? b) ¿Pikunawantaq Jesus alli amigo kayarqan?

4 ¿Imëllaqa huk kuyashqa kastëki o amïguïki wanukushqaku? Kë llakikïqa manam aguantëpaqnötsu, y manam ni ima rurëtapis puëdentsiktsu. Tsë höram Diospa Palabrampa yanapëninta wanantsik (leyi 2 Corintios 1:3, 4). Pero Bibliachöqa, Jehová Dios y Jesus wanïta imanö rikäyanqantapis willamantsikmi. Kuyë amïgon Lazaru wanuriptinmi Jesus alläpa llakïkorqan. Tsëchömi rikätsimantsik Teytannöpis kuyakoq kanqanta (Juan 14:9). Lazaruqa, paninkuna Maria y Martawanmi Betania markachö täräyaq tsëmi Jesusqa Jerusalenta ëwar pëkunata watukaq. Alläpa alli amïgosh kayänaq tsëmi Bibliachöqa, “Jesusqa allapam cuyarqan Martata, nanan Mariata y turin Lazaruta”, nimantsik (Juan 11:5). Pero capítulo 6 nishqanchö rikanqantsiknöpis Lazaruqa wanurerqanmi.

5, 6. a) ¿Imanötaq Lazarupa kastankunata y reqinakushqankunata, waqaqta rikar Jesus tikrarerqan? b) ¿Imanirtaq Jesus alläpa llakikonqanqa animamantsik?

5 ¿Imanötaq Jesus tikrarerqan kuyë amïgon wanuriptin? Bibliachöqa, Lazarupa llakishqa kastankuna watukaqmi Jesusqa ëwarqan nimantsikmi. Pëkunata rikärerqa alläpam llakïkorqan, “shonquncho nanatsicur”. Tsëpitanam “waqarqan” (Juan 11:33, 35). ¿Imanirtaq tsëläyaqa llakïkorqan? ¿Manatsuraq kawariramunanta musyarqan? Awmi, kawaritsimunantaqa musyëkarqanmi (Juan 11:3, 4). Tsënö këkaptimpis, wanïqa alläpa llakikïta apamonqantam rikätsikorqan llakikurnin.

6 Jesus selläma llakïkonqanqa yanapamantsikmi. Pëpis y Teytampis wanïta chikiyanqantam rikätsimantsik. Hinamampis, kë chikikoqta ushakätsinampaqqa Jehová Diospa  podernin kanmi. Rikärishun Diospita poderta chaskenqanwan Jesus milagro ruranqanta.

“¡LAZARU, YARQAMÏ!”

7, 8. ¿Imanirtaq wakinqa Lazaru kawarimunanta mana creiyarqantsu, pero imatataq Jesus rurarqan?

7 Lazaruqa uchkushqa machëchömi pampararqan, tsëmi Jesusqa punkun tsaparaq rumita horqayänampaq nerqan. Pero Martaqa manam munarqantsu kichayänanta, chusku hunaqna wanushqa kaptin asyannachi nirnin (Juan 11:39). Nunakunaqa, Lazaru kawarimunanta manam creiyarqantsu.

Lazaru kawarimonqanqa alläpa kushikïpaqmi karqan (Juan 11:38-44)

8 Rumita witiratsiyaptinnam Jesusqa: “¡Lazaru, yarqamï!” nishpa fuertepa qayëkorqan. ¿Imataq tsëpitaqa pasarqan? “Tsë wanushqa nunanam yarqaramorqan.” (Juan 11:43, 44.) Pensakurkï, ¡imanöraq llapan kushïkuyarqan! Paninkunapis, kastankunapis, y reqinakushqankunapis, alleqmi musyayärqan Lazaru wanonqantaqa, pero kananqa yapënam tsë kuyayanqan nunata pëkunawan këkätsiyarqan. Y manash creiriyänaqraqtsu. Kushikïwanshi chaskiriyänaq. ¡Kë milagrowanmi Jesus wanïta vencirerqan!

Eliasqa huk viudapa wawantam kawaritserqan (1 Reyes 17:17-24)

9, 10. a) Lazaruta kawaritsimunampaqqa, ¿pipa poderninta chasqenqantataq rikätsikorqan Jesus? b) ¿Imanötaq yanapamantsik tsë nunakuna kawariyämonqampita Bibliachö leinqantsik?

9 Jesusqa manam kikïllapitam kë milagrota rurä nerqantsu. Manaraq Lazaruta qayarmi, Jehová kawaritsikoq kanqanta mañakïninchö rikätsikorqan (leyi Juan 11:41, 42). Pero manam kë milagrollachötsu Jehová poderninwan yanapakorqan wanushqakunata kawaritsiyämunampaq. Bibliachöqa isqon resurrecciompaqmi parlan. * Alläpa shumaq y kushikïpaqmi këkunapita leir yachakïqa. Hinamampis jövenkunata, awkinkunata, warmikunata, ollqukunata, israelitakunata y mana israelitakunatapis kawaritserqanmi, këqa  yachatsimantsik Diosnintsik llapampaq igual kanqantam. ¡Kë willakïkunachöqa alläpa kushikïtam rikantsik! Awmi, huk warmi wambrata Jesus kawariratsimuptinmi teytankunaqa “espantashqa quedariyarqan” kushikïwan (Marcos 5:42). Tsënöpam mana imëpis qonqayänampaq kushikïninkuna Jehová qorqan.

Apóstol Pedruqa Dorcas shutiyoq huk cristianatam kawaritserqan (Hechos 9:36-42)

10 Awmi, tiempo pasariptenqa Jesus kawariratsimonqan nunakunaqa wanuriyarqanmi. ¿Tsëpenqa ardëllaku kawaritserqan? Manam tsënötsu karqan. Bibliachö tsë willakïkunaqa rikätsimantsik shamoq tiempochö wanushqakuna kawariyämunantam.

KAWARIYAMONQAN WILLAKÏKUNAQA, ¿IMATARAQ YACHATSIMANTSIK?

11. ¿Imanötaq Lazaru kawarimonqan willakï yachatsimantsik, Eclesiastés 9:5 nenqan rasumpëpa kanqanta?

11 Bibliaqa, wanushqakunaqa “manam ni imata musyayantsu”, nishpam yachatsikun, këqa manam ni imata mäkuyantsu, ni mëcho kawëkäyantsu ninanmi. Tsëtaqa Lazarupaq willakïmi rikätsimantsik. Kawariramorqa, ¿cielo imanöpis kanqanta willakorqantsuraq? ¿Rupëkaq infiernopita willakurtsuraq mantsakätsikorqan? Manam tsënötsu willakorqan. Bibliaqa manam tsëta yachatsikuntsu. Lazaruqa “manam ni imatapis mäkorqantsu” chusku hunaq wanushqanchöqa (Eclesiastés 9:5). Rasumpëpaqa punïkaqnollam karqan (Juan 11:11).

12. ¿Imanirtaq rasumpëpa Lazaru kawarimonqantaqa creishwan?

12 Lazaru kawarimonqan willakïqa yachatsimantsik kawarimiqa rasumpëpa kanqantam, y manam cuentollatsu. Jesusqa atska nunakuna rikarëkaptinmi Lazaruta kawariratsimorqan. Jesusta chikeq religiösokunapis manam negayarqantsu. Tsëpa rantenqa, “¿imatataq tse nunata rurecuntsic? ¡Atsca milagrucunatataq rurecun!” nishpam niyarqan (Juan 11:47). Y kawarimushqa nuna rikaq ëwaqkunaqa Jesusmanmi creiriyarqan. Lazaru kawarimonqanmi, Dios, Jesusta kachamonqan prueba karqan. Kë llapan rasumpëpa  kaptinmi Jesusta y Lazarutapis wanutsita munayarqan tsë chikikoq mana alli religiösokuna.

13. ¿Imanirtaq wanushqakunata Jehová shäritsimunanta creintsik?

13 Kawariyämunanman creiqa, ¿lluta creikïllatsuraq? Manam lluta creenciallatsu, kikin Jesusmi ‘Parlashqäcunata wanushqacuna wiyarirnin cawariyämonqa’ nishpa änikorqan (Juan 5:28). Jehová Diosqa llapan kawëyoqta kamaqmi, ¿tsëtsuraq creishwantsu yapë wanushqakunata kawaritsimunanman? Pero imanö kaptimpis tsëqa Jehová Diospa yarpënimpitam. ¿Kuyë wanushqa kastantsikkunata yarpëta puëdentsuraq? Këman yarpakurkï: ¡Diosnintsikqa tsëtsika qoyllurkunapa shutintapis reqinmi! (Isaías 40:26.) Tsëmi Jehová Diosqa llapan wanushqa kastantsikkuna imanö kayanqantapis yarpëta puëden, hinamampis kawaritsimïtam munan.

14, 15. Job nenqannö, Jehová Diosqa, ¿wanushqakuna kawaritsimïta munantsuraq?

14 Pero, ¿Jehová Diosnintsikqa wanushqakunata kawaritsimïta rasumpëpatsuraq munan? Bibliachöqa, Pëqa kawaritsimïta munanmi nishpam yachatsimantsik. Diospa sirveqnin Job shutiyoq nunam tapukorqan: “Huk nuna [...] wanurerqa, ¿yapë kawarimita puëdenmantsuraq?”, nishpa. Jobqa pamparanqanchö Dios yarpanqanyaq shuyaränantam parlarqan. Tsëmi Jehová Diosta nerqan: “Qammi qayaramanki, y noqam contestashqëki. Makikiwan ruranqëkitaqa munankim” kawaritsimïta (Job 14:13-15).

15 Tsëman pensakurkï, wanushqakuna kawaritsimïtam Jehová Diosqa munan. ¿Jehová Dios kawaritsimïta munanqan musyëqa manaku kushitsimantsik? Pero ¿imanötaq tsë shamoq kawarimiqa kanqa? ¿Pikunataq, y mëchöraq kawariyämonqa?

JEHOVÁ DIOSPA YARPËNINCHÖ KËKAQ LLAPAN WANUSHQAKUNA

16. ¿Imanö kawakïchöraq kayanqa kawarimoqkuna?

16 Bibliachö resurreccionkunapita willakïkunaqa yachatsimantsik  shamoq tiempokunachö pasanantam. Kë Patsachö unë kawarimoqkunaqa yapëmi kastankunawan kushishqa täräyarqan. Y tsëpitapis más alliran kanqa shamoq tiempochöqa. Capítulo 3 nishqanchö rikanqantsiknömi, Dios Yayaqa huk shumaq paraïsoman Patsa tikrananta munan. Tsënam, kawarimoqkunaqa manana rikäyanqanatsu guerrakunata, qeshyakunata, y mana allikunatapis. Tsëpa rantenqa mana wanushpam kë Patsachö kawayanqa kushishqa.

17. ¿Ëkaqraq kawariyämonqa?

17 ¿Pikunataq kawariyämonqa? ‘Parlashqäcunata wanushqacuna wiyarirnin cawariyämonqa’ nerqanmi Jesusqa (Juan 5:28, 29). Tsënöllam hina: “lamar entregarqan peychow keykaq wanushqakunata; i waniypis i Adispis entregarqan peychow keykaq wanushqakunata”, nimantsik Apocalipsis 20:13QKW. Y “Adis” nishqanqa, llapan wanoqkuna ëwayanqan sepultüram. (“¿Imataq Seol y Hades ninanqa?” nishqan apendicichö këkaq yachatsikïta rikäri.) Tsë panteonkunachöqa tsëtsika wanushqakuna kawarirayämuptin mananam ni pï kanqanatsu. Tsëmi apóstol Pablupis nerqan: ‘Alli ruraqtapis y mana alli ruraqtapis Teyta Dios cawaritsimonqam’, nishpa (Hechos 24:15). ¿Ima ninantaq këqa?

Paraïsochöqa llapan wanushqakunam kawarirayämonqa y kuyashqa kastankunawanmi kushishqa tinkuriyanqa

18. ¿Pikunataq alli ruraq shärimoqkunachö këkäyan, y imanötaq tsë kawariyämunan qamta yanapashunki?

18 Jesus kë Patsaman manaraq shamuptin ‘alli ruraq’ nunakunaqa kayan Noe, Abrahán, Sara, Moisés, Rut, Ester, y maspis kayanmi. Hebreus capítulo 11 nishqanchömi kë fëyoq nunakunapaqpis y warmikunapaqpis parlan. Pero tsë ‘alli ruraqkunachöqa’, kë tiempontsikchö Jehová Diosta servikar wanoq nunakunapis kayanmi. Resurrección shuyëqa wanukï mantsëpitapis libranmi nunakunata (Hebreus 2:15).

19. ¿Pikunataq tsë ‘mana alli ruraqkuna’ kayan, y Jehová Diosqa imapaqraq tiempon qonqa?

19 Waranqa kuti waranqëpayanmi nunakuna Jehová Diostaqa reqiyashqatsu pëpa voluntadninta rurayänampaq. ¿Imataq pëkunawanqa pasanqa? Jehová Diosqa manam qonqanqatsu palabranta mana reqir ‘mana alli ruraqkunataqa’.  Dios Yayaqa pëta reqir serviyänampaqmi kë kawarimoqkunata tiempon qonqa. Waranqa wata pasanqanyaqmi wanushqakuna kawariyämonqa, kë Patsachö Jehová Dios fiel sirveqkunawanmi juntakäyanqa. Alläpa shumaq tiempom kanqa, tsëtam Juicio Hunaq nin Bibliachöqa. *

20. ¿Imataq Gehenaqa, y pikunataq tsëmanqa ëwayan?

20 ¿Llapan wanushqa nunakunam shäriyämonqa ninantsuraq këqa? Manam. Bibliaqa, wakinkunaqa “Gehena” nishqanchömi këkäyan ninmi (Lucas 12:5NM). Unë Jerusalen markapa, ayakuna y basura kayakuyänan sitiom karqan, tsë Gehena nishqanqa, tsëpitam tsë shutiqa shamun. ¿Ima ayakunataraq judiokuna tsëmanqa hitayaq? Mana allikunata, mana pampakë ni kawari mereceqkunallatam tsëmanqa hitayaq. Tsëmi Gehenaqa, chipyëpa ushakë ninan. Y kë wanushqakunataqa Jesusmi Juzganqa, pero Jehová Diosmi hatun juezqa (Hechos 10:42). Y Diosqa manam ni imëpis kawaritsimonqatsu mana wiyakï munaq mana alli nunakunataqa.

CIËLOTA ËWAYÄNAMPAQ KAWARIMOQKUNA

21, 22. a) ¿Imanö hukläya kawarimïtaq kan? b) ¿Pitaq puntataqa espïritunö kawarimorqan?

21 Hukläya kawarimi kanqantapis Bibliaqa yachatsikunmi. Ciëlochö espïritunö kawayänampaqmi kë resurreccionqa. Dios Yayapa palabranchöqa, Jesucristulla kënö resucitanqantam willamantsik.

22 Jesucristutaqa nunanö kawëkaptinmi wanutsiyarqan, pero Jehová Diosqa manam pamparëkaqtatsu fiel tsurinta haqirerqan (Salmo 16:10; Hechos 13:34, 35). Kawariratsimorqanmi, pero manam nunatanötsu. Tsëmi apóstol Pedruqa nerqan: Cristuqa “eytsachow rasonpa wanushqa keykar, espirituchowqa kawarishqa”, nishpa (1 Pedru 3:18QKW). ¡Imanö hatun milagrom! Jesusqa yapëmi huk poderoso  espïritunö kawarqan (leyi 1 Corintios 15:3-6). Pëmi puntata espïrituchö resurrecciontaqa chaskerqan. Pero manam pëllatsu tsënö resucitänan karqan (Juan 3:13).

23, 24. ¿Pikunataq y ëkaqtaq ciëloman ëwaqkuna kayan?

23 Ciëlota kutikunampaq ichikllana pishikanqanta musyarmi, Jesusqa qateqninkunata nerqan: “ewä, qamkunapaq sityu alistaqmi”, nishpa (Juan 14:2QKW). Y “wallcalla” nishpam qayarqan ciëloman ëwaqpaq kaqkunataqa (Lucas 12:32). ¿Ëkaqraq wallkaqlla fiel cristianokunaqa kayan? Apóstol Juanmi Apocalipsis 14:1 nishqanchö contestamantsik: “Tsepitanam yape ñuquircur riquecorqä ‘Sion’ nishqan jirca janancho Achcas [Jesucristu] shëcaqta. Pewan juntum quecayarqan juc pachac chuscu chunca chuscu waranqa (144.000) nunacuna. Tse nunacunapa urcuncunachomi Achcaspa y Papänin Dios Yayapa jutincuna escribirëcarqan”, nishpa.

24 Kë 144.000 cristianokunatam —y tsë rurinchö Jesucristupa fiel apostolninkunatawan—, Dios Yaya kawaritsin Ciëlochö kawayänampaq. ¿Imëraq kë resurrección kanan karqan? Apóstol Pabluqa qellqarqan, Cristu Gobernar qallëkamonqan tiempochömi tsë resurreccionqa kanqa nishpam (1 Corintios 15:23). Capítulo 9 nishqanchönam rikäshun tsë tiempochö kanan kawëkanqantsikta. Tsë 144.000 ciëloman ëwaqpaq kaqkunapitaqa ichikllanam kayan. Wanurerqa, tsë hörallanam kawarirayämonqa ciëlochö kawayänampaq (1 Corintios 15:51-55). Pero ciëloman mana ëwaqpaq kaqkunaqa alläpa atskaqmi kayan, y kë Patsa paraïsoman tikrariptin tsëchö kawarimïtam shuyaräyan.

25. ¿Imatataq qateqnin capïtulochö yachakushun?

25 Jehová Dios chipyëpa chikimaqnintsik wanïta ushakätsimunanmanqa confiakunkimanmi (leyi Isaías 25:8). Pero itsapis tapukunkiman: “¿Imataraq ciëlopaq kawarimoqkunaqa tsëchö rurayanqa?”, nishpa. Pëkunaqa ciëlopita patsë Jesuswan gobernamoqkunam kayanqa. Qateqnin capïtulochömi kë gobiernopitaqa más yachakushun.

^ par. 9 Wakin resurreccionkunapita willakïqa këkäyan kë textokunachömi: 1 Reyes 17:17-24; 2 Reyes 4:32-37; 13:20, 21; Mateo 28:5-7; Lucas 7:11-17; 8:40-56, y Hechos 9:36-42 y 20:7-12.

^ par. 19 Kë juiciu junaqpita y nunakunata Jehovä imanö juzganantapis “¿Imataq Juicio Hunaqqa?” nishqan apendicichö këkaq yachatsikïta rikäri.