Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 CAPÍTULO 4

¿Pitaq Jesucristu?

¿Pitaq Jesucristu?
  • ¿Imakunatataq cumplinan karqan Jesus?

  • ¿Mëpitataq shamorqan?

  • ¿Imanö nunataq karqan?

1, 2. a) Huk nunapa shutinta musyarirllatsuraq, ¿requimi nishwan? b) ¿Imataq nunakuna Jesuspita niyan?

PATSACHÖQA atskam reqishqa nunakuna kayan. Wakinqa markankunachö, nacionninkunachö y hinantin Patsachömi reqishqa kayan. Huk reqishqa nunapa shutinta musyarerqa manam alleqnam reqï nishwantsu, alleq reqiqa, llapan unë kawëninkunata y imanöpis kanqanta musyëmi.

2 Kë Patsachö Jesus kawashqampita ishkë waranqa watana pasashqa kaptimpis, hinantin Patsachömi pëpitaqa parlëkäyanlla. Tsënö kaptimpis, manam alleqllaqa tanteayantsu pï rasumpëpaqa Jesus kanqanta. Tsëmi wakinqa huk alli nunallam kashqa niyan, y wakinnam huk profëtallam kashqa niyan. Pero wakinkunanam Jesusqa Diosmi y tsëmi adorashwan niyan. ¿Rasumpëpatsuraq tsënö?

3. ¿Imanirtaq alläpa preciso Jehovä Dios y Jesucristu pï kayanqantapis musyanëki?

3 Alläpa precïsom rasumpëpaqa pï Jesus kanqantapis musyanëki. ¿Imanir? “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa”, nishpa Bibliachö nimashqam (Juan 17:3). Awmi, Jehová Diospita y Jesucristupita yachakïqa shumaq Patsachö mana ushakaq kawëmanmi apashunki (Juan 14:6). Hinamampis, kikin Jesucristum imanö kawëta y imanö nuna  mayintsik rikëtapis yachatsikorqan kë Patsachö këkarnin (Juan 13:34, 35). Kë libropa qallanan capïtulochömi Jehová Diospita rasumpëpa kaqta yachakorqontsik. Rikärishun kananqa imata Biblia Jesucristupita yachatsikonqantapis.

DIOS ÄNIKUSHQAN MESIAS

4. ¿Ima ninantaq Mesias y Cristu tïtulokunaqa?

4 Manaraq Jesus yuriptinmi Bibliaqa willakorqan Jehová Dios änikonqan Mesias o Cristu imë shamunantapis. Mesias nishqan tïtuloqa (shamun hebreu idiömapitam) y Cristu tïtuloqa (shamun griegu idiömapitam) kë ishkan palabrakunaqa “Akrashqa” ninanmi. Tsëmi Jehová kachamushqan nunaqa akrashqa kanan karqan  Dios Yaya munanqanta ruramunampaq. Kë libropa wakin capïtulonkunachömi yachakushun, Jehová Dios änikonqankunataqa Mesias cumplimunanta. Hina yachakushunmi, kë tiempochöpis Jesus bendecimënintsikta puëdenqanta. Itsapis wakin nunakunaqa manaraq Jesus yuriptinchi, “¿piraq Mesiasqa kanqa?”, nishpa tapukuyarqan.

5. ¿Imatataq Jesuspa qateqninkuna creiyarqan?

5 Qallanan siglochöqa Jesuspa qateqninkuna creiyarqan Jesus, Jehová änikonqan Mesias kanqantam (Juan 1:41). Huk qateqnin Simón Pedru shutiyoqmi, “qammi Cristo kanki” nishpa nerqan (Mateo 16:16NM). ¿Imanirtaq qateqninkunaqa creiyarqan Jesus rasumpëpa Mesias kanqanta? ¿Y imanirtaq noqantsikpis tsënölla creishwan?

6. ¿Imawantaq tanteatsimantsik, imanöpis Mesiasta alli nunakuna reqiyänampaqqa kikin Jehová Dios yanapanqanta?

6 Manaraq Jesus shamuptinmi unëpitana Dios Yayapa profëtankuna qellqayarqan profecïakunata, imanö Mesiasta reqiyänampaqpis. Tantearinapaq, qam ëwankiman cärrokuna chäyänan sitiota mana reqenqëki nuna asheq. Tarinëkipaqqa imanö pë kanqantapis musyanëkim. Tsënöllam hina, Mesias ima rurananta, y imakuna pasanantapis qellqatserqan Jehová Dios profëtankunawan. Tsënöpam alli nunakunaqa kë llapan profecïakuna cumplikanqanta rikar reqiyänan karqan pï Mesias kanqantapis.

7. ¿Mëqan ishkë profecïakunataq cumplikarqan Jesuschö?

7 Rikärishun ishkë willakïkunata. Qanchis pachak wata manaraq Jesus yuriptinmi profeta Miqueas qellqarqan, Jehová änikonqan Mesiasqa Judeapa huk taksha markan Belenchömi yurenqa nishpa (Miqueas 5:2). Awmi tsë markachömi yurerqan Jesusqa (Mateo 2:1, 3-9). Huknin willakïqa Daniel 9:25 nenqanmi, pitsqa pachak watakuna pishikaptinmi profeta Daniel qellqarqan, 29 watachö  imanöpis Mesias chämunanta tanteayänampaq. * Kë profecía y wakin profecïakuna cumplikanqanmi, Jesus, Dios Yaya änikonqan Mesias kanqanta rikätsimantsik.

Bautizakurirmi, Jesusqa tikrarerqan Mesias o Cristuman

8, 9. ¿Imanötaq Jesus, Mesias kanqan más alli rikakurerqan bautizakonqan hunaq?

8 Y 29 wata ushanëkaptinnam Jesucristu Mesias kanqan más claro rikakurerqan. Tsë watachömi kikin Jesus mañakorqan Juan Bautistata Jordán mayuchö bauticëkunampaq. Jehová Diosmi, Mesiasta Juan Bautista reqinampaq huk señalta änerqan, y tsë señaltaqa rikarqan Jesusta bauticëkarmi. Tsëtam Biblia willamantsik: “Bautisacurirnam, Jesus yacupita yarqaramorqan. Tse öram sielu quichacärerqan, y Jesusnam riquecorqan Diospa Espiritun imeca palumano jananman urärëcamoqta. Sielupitanam Dios queno nimorqan: —Quemi noqapa cuyë Tsurï. ¡Perecurmi noqa allapa cushicü!— nir” (Mateo 3:16, 17). Tsëta rikärir y wiyarirnam Juanqa musyarerqan Dios Yaya kachamonqan Mesiasqa, Jesus kanqanta (Juan 1:32-34). Tsë hunaqqa, espíritu santom —Diospa kallpan,— pëman ramakäramorqan, tsënöpam Jesusqa, Mesias o Cristuman tikrarerqan, akrashqa Mandakoq y Rey kanampaq (Isaías 55:4).

9 Cumplikashqa Profecïakuna y Jehová Dios nenqanmi, änikonqan Mesiasqa Jesus kanqanta rikätsimantsik. Pero Bibliaqa, Jesuspita ishkë importante tapukïkunatam contestamantsik: Mëpita shamonqanta y imanö nuna kanqantapis.

¿MËPITATAQ JESUS SHAMORQAN?

10. Manaraq Patsaman shamur, ¿mëcho y imanö Jesus kawanqantaraq Biblia yachatsimantsik?

10 Bibliaqa yachatsimantsik, Jesus Patsaman manaraq shamur ciëlochö kawanqantam. Tsëmi, profeta Miqueasqa  Belenchömi Mesias yurenqa nerqanllatsu, sinöqa “qallanan tiempopitam” pëqa kawashqa nerqanmi (Miqueas 5:2). Awmi, Jesusqa manaraq nunanö yurirnin ciëlochö kawanqantam atska kuti willakorqan (leyi Juan 3:13; 6:38, 62; 17:4, 5). Jesusqa huk espïritum ciëlochö karqan y shumaqmi Jehová Dioswan kawakorqan.

11. ¿Imanötaq Biblia rikätsimantsik, Jesus, Jehová Diospa más kuyashqa tsurin kanqanta?

11 Jehová Diospa más kuyë tsurinmi Jesusqa, Pëtam llapan kamashqampa puntanta kamarqan, tsëmi Bibliaqa willakun: “Llapan kamashqakunapa punta kaqnin”, nishpa (Colosenses 1:15QKW). * Tsënömi hina ‘jucllella tsurin’ kënin más kuyëta tikratsin (Juan 3:16). Tsëqa kikin Dios Yaya rurashqan ninanmi. Hinamampis pëllam yanaparqan Jehová Dios llapan imëkatapis kamanqanchö (Colosenses 1:16). Hina tsëpitapis “Willakoq” ninmi Bibliaqa (Juan 1:14NM). Tsëqa, Diospa shutinchömi pëqa parlarqan ninanmi. Rasumpëpaqa, papänimpa willakïninkunatachi apaq Diospa wakin tsurinkunaman, angelkunaman y nunakunamampis.

12. Jesusqa manam Dioswan igualtsu, ¿ïmarirtaq tsënö nintsik?

12 Diospa mayor tsurenqa, ¿wakin niyanqannötsuraq kikin Diosnö? Bibliaqa manam tsëtatsu yachatsikun. Punta kaq pärrafochö rikanqantsiknöpis Jesustaqa Diosmi kamarqan. Tsëmi claro këkan Jesuspaqa huk qallanan hunaq kanqan, pero Jehová Diospaqa manam ni qallanan ni ushanan kantsu (Salmo 90:2). Y manam Jesusqa ni ichikllapis Yayan Jehovata igualëta munarqantsu. Bibliaqa clärom yachatsikun, Teytaqa Wambrampa mayornin kanqanta (leyi Juan 14:28; 1 Corintios 11:3). “Llapan puëdeq Diosqa”  kikin Jehová Diosllam (Génesis 17:1). Tsëmi pëtaqa mana ni pipis igualantsu. *

13. “Mana rikakoq Dios rikoqmi” Dios Yayapa tsurenqa ninmi Bibliachöqa, ¿ima ninantaq tsëqa?

13 Jehová Diosqa waranqa kuti waranqëpayan watakunam mayor tsurinwan alli kawakuyarqan, manaraq Patsata ni qoyllurkunata kamar. ¡Imanöraq pëkunaqa kuyanakïkuyarqan! (Juan 3:35; 14:31.) Teytanrikoqmi karqan kë kuyashqa Tsuriqa. Tsëmi Bibliachöqa, “peyqa mana rikakoq Dyospa retratunmi” nin (Colosenses 1:15QKW). Awmi, imanömi wambrakuna teytan rikoqlla imëkachöpis kayan, tsënömi ciëlochö Dios Yayapa Tsurimpis Teytan rikoqlla imëkachöpis karqan.

14. ¿Imanötaq Jehová Diospa hapallan tsurin nunanö yurerqan kë Patsachö?

14 Jehová Diospa hapallan Tsurenqa kikimpa voluntadninwanmi ciëlota haqirir shamorqan Patsaman, nunanö kanampaq. Pero itsapis qamqa tapukunki: “¿Imanötaq huk espíritu këkarnin yurinman nunanö?”, nishpa. Jehová Diosqa huk milagrotam rurarqan. Mayor Tsurimpa kawënintam ciëlochö këkaqta, huk virgen judía María shutiyoqpa pachanman churëkamorqan. Nunapa mana tsurin karmi, pëqa hutsannaq yurerqan, y pëtam Jesus nishpa shutitsiyarqan (Lucas 1:30-35).

¿IMANÖ NUNATAQ KARQAN JESUS?

15. ¿Imanötaq Jehová Diosta más reqishwan, Jesucristupita yachakurnin?

15 Kë Patsachö këkar Jesus ruranqankuna y parlanqankunam yanapamantsik pëta más alleq reqinapaq. Y përëkurmi Jehová Diosnintsiktapis más reqita puëdentsik. ¿Imanöpa? Yarpë, Yayan rikoqllam Diospa Tsurenqa. Tsëmi huk discïpulonta nerqan: “Noqata ricamarnïqa  Dios Yayatapis ricashqam” nishpa (Juan 14:9). Bibliapa chusku libronkuna,—Mateo, Marcos, Lucas y Juan—, Evangelio nishpa reqenqantsikchömi tarintsik atska yachatsikïkunata Jesuspa kawënimpita, ruranqankunapita, y imanö kanqampitapis.

16. ¿Imataq karqan Jesuspa principal yachatsikïnin?

16 Jesustaqa “Yachatsikoq” nishpam reqiyaq (Juan 1:38; 13:13). ¿Imatataq yachatsikoq? Reinopita ‘alli willakïkunatam’ yachatsikoq, Diospa Gobiernompita alli noticiakunata willapäkoq ninanmi këqa. Kë gobiernoqa ciëlopita patsëmi gobernamonqa hinantin Patsaman, y atska bendicionkunatam apamonqa Dios Yayaman fiel kaqkunapaqqa (Mateo 4:23). ¿Pipataq kë yachatsikïqa karqan? Kikin Jesucristum, Jehová Diospaq parlarnin nerqan: “Manam quiquï munanqäcunatatsu yachatsicü, sinoqa cachamaqnï parlashqancunatam”, nishpa (Juan 7:16). Dios Yayaqa, Reinopita alli willakïkunata nunakuna wiyayänantam munan, y tsëtam Jesus musyarqan. Kë gobiernopita y ima ruramunantapis masqa yachakurishun capítulo 8 nishqanchömi.

17. ¿Mëchötaq Jesus yachatsikoq, y imanir-raq tsëläya tsënö rurarqan?

17 ¿Mëchötaq Jesusqa yachatsikoq? Më tsëchöpis, nunakuna tarenqanchöqa yachatsikoqllam: Markakunachöpis, chacrakunachöpis, qatukuyanqankunachöpis y wayikunachöpis. Jesusqa manam pëman ëwayänantatsu shuyaraq, kikinmi nunakuna asheq ëwaq (Marcos 6:56; Lucas 19:5, 6). ¿Imanir-raq tsëläyaqa willapäkoq y yachatsikoq ëwaq? Teytampa voluntadnin kaptinmi Jesusqa llapanta cumplerqan (Juan 8:28, 29). Pero hinamampis nunakunata kuyarmi pëqa llapanta ruraq (leyi Mateo 9:35, 36). Tsë tiempo nunakunataqa, mandakoq religiösokunam Diospita y rasumpa munëninta yachatsiyänan karqan, pero manam tsënötsu rurayarqan. Imanö kashqa kaptimpis, Jesusqa Yayampa  Reinompita nunakuna wiyë wanayanqantam musyaq.

18. ¿Jesuspa imanö kënintaq más gustashunki?

18 Jesusqa llakipäkoq, kuyakoq, alli shonquyoq nunam karqan. Pëqa shumaqllapam nunakunata rikaq, wambrakunapis kushishqam witipäyaq (Marcos 10:13-16). Manam wakinllatatsu pëqa kuyaq. Hinamampis hutsakunata, y mana alli rurëkunataqa chikeqmi (Mateo 21:12, 13). Tiemponchöqa alläpa mana allipam warmikunata rikäyaq, pero pëqa alläpa respëtowanmi rikarqan (Juan 4:9, 27). Jesusqa Rasumpëpam humilde karqan. Huk kutinäqa apostolninkunapa chakinkunatapis paqaraporqanmi, y tsëtaqa sirvientekunallam rurayaq.

Jesusqa më tsëchöpis nuna kanqanchöqa willapäkoqmi

19. ¿Imanötaq Jesus rikätsimantsik llakenqanta?

19 Nunakuna hipaqta rikarmi Jesusqa alläpa llakïkorqan, tsëmi milagrokunata rurar pëkunata kachakätserqan Diospa poderninwan (Mateo 14:14). Huk kutim leprayoq  nuna ashirir: “Munarnenqa cachaquecatsillämë”, nerqan. Kikimpa shonqunchömi Jesusqa mäkurerqan kë nunapa nanëninta. Tsëmi makinwan yatëkurnin: “Munämi, cachacänequita” nirerqan. Y ¡kë qeshyaq nunaqa kachakärerqanmi! (Marcos 1:40-42.) ¡Imanöraq kë nunaqa kushikïkorqan!

WANONQANYAQMI FIEL KARQAN

20, 21. Jesusqa yachatsimarqontsik llapan shonquntsikwan Diosta wiyakunapaqmi, ¿imanirtaq tsëtaqa nintsik?

20 Jesusmi yachatsimarqontsik llapan shonquntsikwan Diosta wiyakunapaq. Llapan kawëninchömi Jesusqa Teytanman fiel karqan, sufrikarpis, y chikikäyaptimpis. Manam Satanaspa tentacionninman ishkerqantsu (Mateo 4:1-11). Huk tiempochöqa manam kikimpa kastankunapis pëman creiyarqantsu, “locuyäcurishqam”, niyarqanmi (Marcos 3:21). Tsënö nikäyaptimpis manam Diospita willapäkïtaqa haqerqantsu. Chikeqninkuna maqëkäyaptin, y  qayapëkäyaptimpis, manam tikraporqantsu (1 Pedru 2:21-23).

21 Jesusqa fielmi karqan wanïninyaq, chikeqninkuna hipatsipa wanïkätsiyaptimpis (leyi Filipenses 2:8). Pensakurkï, llapan sufrenqanman. Pëqa aguantananmi karqan, autoridadkuna presoyänanta, mana rasumpa kaqta parlaq testigokuna acusayänanta, y mana alli juezkuna condenayänanta, nunakuna asipäyänanta, y soldädokuna maqayänantapis. Y wanurinampaq qeruchö clavarëkarnam: “Llapannam cumplicärishqa” nerqan (Juan 19:30). Kima hunaq pasariptinnam Teytan kawariratsimorqan huk espïritutanö (1 Pedru 3:18). Tsëpitanam semänakunallatana ciëlota kutikorqan, y “Diospa ladunman ewashqa pewanna juntu mandacuyänanpaq”, tsëchönam shuyararqan Reinota chaskinampaq (Hebreus 10:12, 13).

22. Wanïninyaq fiel këninwanqa, ¿ima bendicionkunataraq Jesus apamorqan?

22 Wanïninyaq fiel këninwanqa, ¿ima bendicionkunataraq Jesus apamorqan? Wanïnenqa apamorqan kë Patsachö mana wanushpa kawanapaq bendiciontam, qallananchö Jehová munanqantanö. Jesuspa wanïnin kë änikïta cumplitsimunantaqa qateqnin capïtulochönam rikäshun.

^ par. 7 Profëta Daniel qellqanqan profecïa Jesuschö cumplikanqantaqa “Mesias chämunantam profeta Daniel qellqarqan” nishqan apendicichö këkaq yachatsikïchömi tarinki.

^ par. 11 Jehová Diostaqa, Yaya nintsik Kamakoq kaptinmi (Isaías 64:8). Jesustanam Diospa tsurin nintsik, kikin Dios kamashqa kaptin. Tsëmi wakin espïritukunata y Adantapis Diospa tsurin nintsik (Job 1:6; Lucas 3:38QKW).

^ par. 12 Jesus Jehovä Dioswan igual mana kanqantaqa “Dios Yayapita, Tsuripita, y santu espïritupita rasumpëpa yachatsikïkuna” nishqan apendicichö këkaq yachatsikïchömi tarinki.