Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 APÉNDICE

¿Pitaq arcángel Miguelqa?

¿Pitaq arcángel Miguelqa?

BIBLIACHÖQA wallka textokunallachömi qayan huk angelta Miguel nishpa. Pero tsë textokunachöqa imatapis rurëkaqllatam rikätsimantsik. Daniel librochömi rikätsimantsik mana alli angelkunawan maqanakïkaqta, Judas librochönam pleitïkan Diablowan, y Apocalipsischönam Satanaswan y demonionkunawan guerrata rurëkan. Imëpis Jehová Diospa autoridadnintam defendin, y Diospa chikeqninkunawanmi pelean. Tsënöpam shutinta reqitsikun, shutinqa “¿Pitaq Diosnö?” ninanmi. Pero ¿pitaq Miguelqa?

Yarpärishun, wakin nunakunapaqa manam hukllëllatsu shutinkuna kan. Wakinllatapis rikärishun, Jacobqa atska wambrayoq nunam karqan, y Israel nishpapis reqiyaqmi, y apóstol Pedrutapis reqiyaq Simón nishpam (Génesis 49:1, 2; Mateo 10:2). Tsënöllam hina, Bibliaqa rikätsimantsik Patsaman manaraq shamur y ciëloman kutirirpis, Jesuslla, Miguel shutita chaskenqanta. ¿Imanirtaq tsënö nintsik? Rikärishun Biblia nenqanta.

 Arcángel. Diospa Palabranqa rikätsikun Migueltam ‘arcangeltanö’ (Judas 9). Këqa “angelkunapa pushaqnin y mandaqnin” ninanmi. Bibliachöqa rikantsik Miguel-llata arcángel nishpa qayanqantam, tsëwanqa tanteatsimantsik hukllëlla kanqantam. Awmi Bibliachöqa manam atskaqpaqnöqa “arcangelkuna” nintsu, sinöqa hukllëllapaqmi parlan “arcángel” nishpa. Hinamampis arcángel ruranqanta rurëkarmi Jesus yurin Bibliata leishqaqa. Tsënömi Jesus ruramunantaqa rikantsik 1 Tesalonicenses 4:16QKW, nishqanchö: “Kikin Señormi mandakoq boswan, arkangel boswan i Dyospa tronpëtanwan syelupita urämonqa”, nishpa. Kë textochöqa clärom rikätsimantsik arcángel vozwanqa kikin Señor Jesus parlamunanta. Këwanmi rikätsimantsik kikin Jesus arcángel Miguel kanqanta.

Mandakoq. Bibliachömi willamantsik: “Miguelmi anjelnincunawan tsë culebrata maqayarqan. Tsënollam jina tse culebrapis anjelnincunawan ticrapuyarqan Miguelta” nishpa (Apocalipsis 12:7). Këchöqa alleqmi rikätsimantsik Miguelqa fiel angelkunapa Mandaqnin kanqanta. Tsëtam kë libro Apocalipsis rikätsimantsik (Apocalipsis 19:14-16). Y Apóstol Pablopis, “Teytantsic Jesucristu” y “puedeq anjelnincunawan” nishpam parlan (2 Tesalonicenses 1:7). Tsënömi, Bibliaqa willamantsik Miguelpitawan ‘angelninkunapita’ y Jesuspita ‘angelninkunapitapis’ (Mateo 13:41; 16:27; 24:31; 1 Pedru 3:22). Diospa Palabranchöqa, angelkunaqa huk ejercitolla kayanqantam willamantsik, manam ishkë ejército kayanqantatsu. Tsëmi, alleq claro tantearintsik ciëlochö gobernëkaq Jesuslla, Miguel kanqanta. *

^ par. 1 Miguel shutiwan Diospa Tsurin reqishqa kanqampitaqa maslla yachakunki, Perspicacia para comprender las Escrituras vol. 2 nishqan libropa, 386, 387 päginankunachömi, kë librotaqa Jehovapa testigonkunam rurayämushqa.