Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 CAPÍTULO 17

Oracionqa Diosman más witinapaqmi yanapamantsik

Oracionqa Diosman más witinapaqmi yanapamantsik
  • ¿Imanirtaq Diosnintsikman orakushwan?

  • ¿Imataraq rurashwan oracionnintsikta Diosnintsik wiyanampaq?

  • ¿Imanötaq Dios contestamun oracionnintsikkunata?

‘Ciëlotawan patsata Kamaqqa’ mañakïnintsikkuna wiyëtam munan

1, 2. ¿Imanirtaq Diosnintsikman mañakiqa huk shumaq qarë, y imanirtaq Biblia oracionpita yachatsikonqanta musyëta munashwan?

CIËLOCHÖ llapan kamanqanwan igualatsishqaqa, patsaqa uchukllëllam. Awmi, “ciëlochö y patsachö llapan Kamaq” Jehová Diospaqqa, Patsachö llapan markakunaqa baldechö huk gota yakunöllam kayan (Salmo 115:15; Isaías 40:15). Tsënö kaptimpis Bibliaqa nimantsikmi: “Jehová Diosqa Palabranta respetarnin llapan qayakoqninkunapa lädonchömi këkan, respetaqninkunapa munanqantam ruranqa y qayakininkunataqa wiyanqam” nishpa (Salmo 145:18, 19). Kë nenqanman pensakurkï. Llapan puëdeq Kamakoq Diosqa ladontsikchömi këkan y mañakïnintsiktapis wiyamantsikmi llapan shonquntsikwan y “Palabran nenqannö” mañakushqaqa. ¡Imanö shumaqmi Diosman mañakïqa!

2 Jehová Dios mañakïnintsikta wiyamänata munarqa kikin yachatsimanqantsiknömi mañakushwan. Pero oracionpita Biblia yachatsikonqanta mana musyarqa, ¿imanöraq mañakushwan? Jehová Diosman witinapaqmi oracionqa, tsëmi alläpa preciso tsëpita yachakïqa.

 ¿IMANIRTAQ JEHOVÁ DIOSMAN MAÑAKUSHWAN?

3. ¿Imanirtaq alläpa preciso Jehová Diosman mañakïqa?

3 Jehová Diosmi pëman mañakunapaqqa invitëkämantsik. Tsëmi Palabrampis nimantsik: “Ama imapaqpis yarpacachäyëtsu, antis imano ecano carpis, Diosnintsicman ‘Grasias’ nicur mañaquicuyë. Tseno mañacuyaptiquim Jesucristurecur Teyta Diosqa allapa espantepaq juclaya shonquta, y yarpeta qoyashunqui shumaq cawacuyänequipaq”, nishpa (Filipenses 4:6, 7). Y kë shumaq kuyakïllapa llapan Kamaq Gobernantepa invitacionnintaqa kushishqachi chaskikushwan.

4. ¿Imataraq rurankiman Jehová Diospa amïgon kanëkipaq?

4 Imëpis Jehová Diosman mañakorqa masmi reqishun y kuyashun. Rasumpëpa amïgokunaqa manam imatapis wanarllatsu parlapänakuyan, sinöqa kuyanakurmi imë horapis parlapänakuriyan. Y munayanqanta, pensayanqanta, llakikuyanqantapis seguido willanakurmi más amigo tikrayan. Tsënöllam hina Jehová Dioswan parlëpis más amïgon këman chätsimantsik. Jehová Diospita, imanö kanqanta y shamoq tiempopaq Biblia  yachatsikonqantaqa kë libropa yanapakïninwanmi yachakorqonki. Diosqa rasumpëpa kanqantam rikarqonki. Oracionqa yanapashunki ciëlochö Dios Yayëkita shonqipita patsë munanqëkita, y yarparanqëkikunata willanëkipaqmi. Y tsënöpam Jehová Diospa lädonchö këkaqno kanki (Santiagu 4:8QKW).

IMAKUNATATAQ RURANANTSIK

5. ¿Imanötaq musyantsik Jehová Dios llapan oracionta mana wiyanqanta?

5 ¿Llapan oracionkunatatsuraq wiyan Jehová? Profeta Isaiaspa tiemponchö israelitakunatam Jehová nerqan: “Mëtsika mañakayämuptikipis manam wiyätsu; makikikunam yawar ramëpita culpable” nishpa (Isaías 1:15). Tsënömi, Dios Yaya chikenqanta mana haqishqaqa manam mañakïnintsikta wiyantsu. Tsëmi, wiyamänapaqqa pë mandamanqantsikta ruranantsik.

6. Mañakïnintsikta Dios Yaya wiyamänapaqqa, ¿imantsikraq kanman y imanöraq tsëta rikätsikushwan?

6 Dios Yaya wiyamänapaqqa fënintsikmi kanan (leyi Marcos 11:24). Tsëmi apóstol Pabluqa qellqarqan: “Mana fëwanqa manam Diosta kushitsishuntsu, Diosman witeqqa pë rasumpëpa kanqanta y asheqninkunataqa bendicenqantam creinan” (Hebreus 11:6, NM). Rasumpëpa fënintsik kanampaqqa, manam Diosman creïllatsu ni mañakïnintsikta wiyar contestamanqantsikta musyëllatsu. Fënintsiktaqa rurënintsikkunawanmi rikätsikuntsik. Fënintsik kanqanqa rikakunman llapan kawënintsikchömi (Santiagu 2:26, QKW).

7. a) ¿Imanirtaq Jehová Diosta respëtowan parlapashwan? b) ¿Imanötaq shonqupita patsë humilde kënintsikta rikätsikushwan?

7 Hinamampis shonqupita patsë humildadwan mañakunantsiktam Jehová Diosqa munan. Awmi alläpa allim Jehová Diosta humildadwan parlapëqa, ¿imanir? Këman yarpakurkï, nunakuna huk presidentewan  parlarqa alläpa respëtowanmi parlapäyan, autoridadyoq kanqanta musyar. Tsëpita más respëtowanran Jehová Diostanäqa parlapänantsik (Salmo 138:6). Pëllam “llapan puëdeq Diosqa” (Génesis 17:1). Parlakïnintsikmi rikätsikunman humilde y Pëwan mana igual kanqantsikta. Tsënö humilde kënintsikmi shonquntsikpita patsë mañakunapaq yanapamäshun y kutipëkuryan tsëllata mana parlakïkänapaq (Mateo 6:7, 8).

8. ¿Imanötaq mañakonqantsikmannö imatapis rurashwan?

8 Tsëmannam hina, mañakonqantsiknö imatapis ruranantsik Diosnintsik mañakïnintsikta wiyanampaq. “Miquilläcuna cada junaq qoycalläyämë” nishpa Jehová Diosta mañakorqa tarenqantsik trabäjochömi alleq trabajanantsik (Mateo 6:11; 2 Tesalonicenses 3:10). Tsënöllam hina, tentacionkunapita libramänapaq mañakurnenqa, mana allikunapita witikunantsik (Colosenses 3:5). Diosnintsik mañakïnintsikta wiyamänapaq yachakushqa karpis, masran oracionpita tapukïkunata yachakunëki.

ORACIONPITA TAPUKÏKUNA

9. ¿Pimantaq mañakushwan y pipa shutinchö?

9 ¿Pimantaq mañakushwan? Jesusmi qateqninkunata yachatserqan kënö mañakuyänampaq: “Sielucho quecaq Dios Yayalläcuna” nishpa (Mateo 6:9). Tsëmi, mañakunantsik kikin Jehová Diosllaman. Tsënö kaptimpis Pëqa munanmi tsurin Jesucristu ruranqanta valoranata. Capítulo 5 nishqanchö rikanqantsiknömi Diosqa tsurin Jesucristuta mandamorqan kë Patsaman hutsapita y wanïpita salvamänantsikpaq (Juan 3:16; Romanos 5:12). Hinamampis, Mandakoq Sacerdote y Juezmi churarqan (Juan 5:22; Hebreus 6:20). Tsëmi, Jesuspa shutinchö mañakïta Bibliachö yachatsimantsik. Kikin Jesusmi nerqan: “Noqam näni cuenta cä. Rason caqta willacoqmi cä. Jina  caweniquicunapis noqam cä. Y noqaman marcäcurllam pipis Dios Yayaman chäyanqa” nishpa (Juan 14:6). Mañakïnintsik wiyashqa kanampaqqa Jehová Diosllamanmi mañakunantsik Jesuspa shutinchö.

10. ¿Imanö mañakonqantsiktaq más alleqa?

10 ¿Qonqurikïkurllatsuraq mañakushwan? Manam, Jehová Diosqa orakonqantsik hora cuerpontsik o makintsik imanö këkänantapis manam mañamantsiktsu. Tsëmi Bibliachöqa unë nunakuna imanöpis mañakuyanqanta tarintsik: tëkarpis, puktirëkarpis o umpurëkarpis, qonqurirëkarpis, shëkarpis mañakuyarqanmi (1 Crónicas 17:16; Nehemías 8:6; Daniel 6:10; Marcos 11:25). Shonquntsikpita patsë mañakonqantsikmi más alleqa, manam imanöpis cuerpontsik këkanqantsu. Awmi, mëcho këkarpis, trabajëkarpis o ima pasamashqapis, shonquntsikchöqa mañakïkashwanmi. Itsapis mana ni pï mäkunmantsu o wiyanmantsu mañakïkanqantsikta, pero Jehová Diosqa wiyëkämantsikmi (Nehemías 2:1-6).

11. Kikintsikpaq mañakurnenqa, ¿imakunatataq mañakushwan?

11 Mañakïnintsikchö, ¿imakunapaqtaq parlashwan? Tsëtam Biblia contestamantsik: Jehová Dios “munashqanno imatapis mañacush[qaqa], wiyamäshunmi”, nishpa (1 Juan 5:14). Tsëmi Diospa voluntadnimpaqnö kaptenqa imëkatapis mañakunantsik. Pero, ¿yarparënintsikkuna willanata munantsuraq? ¡Awmi! Jehová Diosman mañakïqa kuyashqa amïgowan parlaqnömi. Tsëmi ‘shonquntsikta mashtashwan pëman’, tsëqa llapan yarparënintsikkunata shonquntsikpita patsë willëmi (Salmo 62:8). Hinamampis alli kaqta ruranapaqmi santo espïritunta mañakunantsik (Lucas 11:13). Tsënöllam hina, alleq pensëkur imatapis ruranapaq y problëmakuna chämuptin alleq tsarakunapaq rogakunantsik (Santiagu 1:5). Y hutsaman ishkirirpis Cristupa  sacrificionman fëta churarmi perdonëkamänata mañakushwan (Efesios 1:3, 7). Pero manam kikintsikllapaqtsu mañakunantsik, sinöqa familiantsikkunapaq, cristiano mayintsikkunapaq y hukkunapaqpis mañakunantsikmi (Hechos 12:5; Colosenses 4:12).

12. ¿Imanötaq mañakïnintsikkunachö rikätsikushwan ciëlochö Teytantsikpa munënin más preciso kanqanta?

12 Mañakïnintsikchö Jehová Diospaq kaqtaqa puntamanmi churashwan. Kuyakïnimpitawan llapan qomanqantsikpitam shonquntsikpita patsë agradecikurnin alabashwan (1 Crónicas 29:10-13). Jesusmi mañakïta yachatsikorqan, tsëtaqa tarintsik Mateo 6:9-13 nishqanchömi (leyi). Tsëchömi Diosnintsikpa shutin santificashqa kananta yachatsimantsik, tsëqa limpio o sagradotanö rikë ninanmi. Tsëpitanam, Diospa Reinon shamur voluntadnin Patsachöpis ciëlochönö rurakëkunanta mañakunantsik. Këta alleq tanteashqaqa, Jehová Diospa munënimpaqran Jesus parlarqan, tsëpitaran kikintsikpaq mañakunataqa. Tsëmi, Jehová Diospa voluntadninta puntaman mañakïnintsikchö churarqa, rikätsikushun kikintsikpa munënintsikllaman mana yarparanqantsikta.

13. ¿Ëka tiempo oracionnintsik kanantataq Bibliachö willamantsik?

13 ¿Ëka tiempotaq kanman oracionnintsik? Atskaqpaq o kikintsikllapaq mañakïnintsikkuna ëka tiempo kanantapis Bibliachöqa manam nimantsiktsu. Mikunapaq ichiklla mañakonqantsiknö o shonquntsikpita patsë Jehová Diosta llapanta willanapaq mañakonqantsiknöpis kanmanmi (1 Samuel 1:12, 15). Pero santotukur, y nunakuna rikäyänanllapaq mana ushëpa orakoqkunataqa Jesus condenarqanmi (Lucas 20:46, 47). Tsënö mañakïkunaqa manam Jehová Diosta gustantsu. Shonquntsikpita mañakïmi más alleqa. Tsëmi mañakïnintsik hatumpis o ichikpis wananqantsikmannö kanman.

Imë hora mañakushqapis Dios Yayaqa wiyëkämantsikmi

14. ¿Bibliachö “imëpis mañakïkayë” nerqa imatataq yachatsimantsik, y ima bendicionkunatataq chaskishun?

 14 ¿Ëka kutiraq mañakushwan? Bibliam contestamantsik: Diosmanqa “mañacuyë”, “imepis mañaquicayë” “mana qonqeta”, nirnin (Mateo 26:41; Romanos 12:12; 1 Tesalonicenses 5:17). Këqa manam ampïrinkipis y warärinkipis orakïkarlla ninantsu. Sinöqa llapan hunaqkunam Jehová Diosman orakushwan alli kënimpita agradecikunapaq y allipa pushëkamänapaq, yanapëkamänapaq y kallpanta qoykamänapaqpis. ¡Këqa huk bendicionmi! Jehová Diosqa, munanqantsik hora y ëka kutipis mañakunatam permitimantsik. Tsëmi, ciëlochö Teytantsikwan parlëta kuyarqa, tiempota horqashun imë horapis Pëwan parlanapaq.

15. ¿Imanirtaq atskaqchö o hapallantsiklla mañakïkarpis “amén” nishpa ushashwan?

15 ¿Imanirtaq “amén” nishpa ushashwan? Tsëqa, “tsënö katsun”, “awmi” ninanmi. Kënö “amén” nishpa mañakïnintsikkunata atskaqchö o kikintsiklla këkar ushanantsikpaqqa Bibliachömi tarintsik (1 Crónicas 16:36; Salmo 41:13). Kikintsiklla mañakïkar “amén” nishpa usharnenqa shonquntsikpita mañakonqantsiktam rikätsikuntsik. Y atskaqchö këkar (upällallapa o sinchipa) “amén” nerqa, wiyanqantsik oracionwan acuerdo kanqantsiktam rikätsikuntsik (1 Corintios 14:16).

¿IMANÖTAQ MAÑAKÏNINTSIKKUNATA DIOS CONTESTAMANTSIK?

16. ¿Imamantaq confiakushwan Diosnintsikman mañakorqa?

16 ¿Rasumpëpatsuraq Jehová Dios oracionnintsikkunata contestamantsik? ¡Awmi, contestamantsikmi! Waranqëpayan nunakunapa ‘mañakïnintsikkuna wiyaq’ Diosnintsik contestamanqantsiktam confiakunantsik (Salmo 65:2). Tukïnöpam contestamanqantsik chämunman.

17. ¿Imanötaq musyantsik angelninkunawan y sirveqnin nunakunawan Dios oracionnintsikkunata contestamanqantsikta?

 17 Oracionnintsiktaqa contestamantsik angelninkunawan y sirveqnin nunakunawanmi (Hebreus 1:13, 14). Bibliapita alleq yachakuyänampaq orakoq nunakunam Jehová Diospa sirveqninkunapa visïtanta chaskiyashqa, Dios Yaya oracionninkunata contestaptin. Kënö pasanqankunam, alli willakïkunataqa angelkuna dirigiyanqanta rikätsikuyan (Apocalipsis 14:6). Tsënöllam  hina, imatapis wanashqaqa cristiano mayintsikkunawan Jehová Dios yanapëkatsimantsik (Proverbios 12:25; Santiagu 2:16).

Jehová Diosqa oracionnintsikta contestamashwan cristiano mayintsikta yanapamänapaq kachamurmi

18. ¿Imanötaq Jehová Dios santo espïritunwan y Palabran Bibliawan mañakïnintsikkunata contestamantsik?

18 Santo espïritunwan y Palabran Bibliawampis Jehová Diosqa oracionnintsikta contestamantsikmi. Problëmantsikkunata altsanapaq mañakushqaqa santo espïritunwanmi yanapëkamäshun (2 Corintios 4:7). Ima rurënintsikkunatapis alli pensëkur ruranapaqnam yanapamantsik Palabran Bibliawan. Tsëpaqqa itsa Bibliapita yachakïkar o kë librotanö huk publicacionkunata leikar taririshwan. Hinamampis reunionkunachö o kuyakoq ancianokunam Bibliachö Jehová mandamanqantsikta yarpätsimantsik (Gálatas 6:1).

19. ¿Imataraq yarpashwan Dios Yaya mañakïnintsikta mana contestamoqnö kaptin?

19 Itsa hora höraqa, rastsu mañakïnintsikkunata contestaramashwan, pero tsëqa contestamënintsikta manam puëdentsu ninantsu manam. Jehová Diosqa imë hora contestamänatapis musyakunmi. Pëqa wananqantsikta, y kikintsikpitapis más allita ruramunantam musyan. Tsëmi ‘mañaquicanata’, ‘ashicanata’, ‘tacaquicanata’ permitin (Lucas 11:5-10). Tsënö rurarmi  fënintsik kanqanta y rasumpëpa wananqantsikta rikätsikuntsik. Hinamampis kikintsikqa itsa makushwantsu Jehová Dios contestamanqantsikta. Problëmantsikkunata altsamunampaq mañakushqaqa itsapis ushakäratsimunmantsu, pero kallpantsikmi qomashwan aguantanapaq (leyi Filipenses 4:13).

20. ¿Imanirtaq ichikllapaqqa rikashwantsu kë shumaq mañakï qarëta?

20 Kë llapan Kamaq Jehová Diostam alläpa agradecikuntsik Pë munanqannö llapantsik mañakoqkunapa lädontsikchö këkanqanta (leyi Salmo 145:18). Kë alläpa väleq qarëtaqa ama ichikllapaqqa rikëtsu. Tsënö rurarqa kushikushunmi, mañakïkuna Wiyaq Jehová Diospa lädonman más witinantsikta musyar.