Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 APÉNDICE

¿Imataq Juicio Hunaqqa?

¿Imataq Juicio Hunaqqa?

¿IMANÖ Juicio Hunaq kanantataq pensanki? Dios nöpanman hukllëllapayan almankuna ëwarnin hutsankunapita juzgado kayänantam atska nunakuna pensayan. Hinamampis, ciëloman wakin ewkuyänanta y wakin ninawan rupaq ëwayänantapis pensayanmi. Tsënö kaptimpis, Bibliaqa rikätsimantsik Juicio Hunaqqa hukläya kanantam, manam mantsakëpaq hunaqtsu, sinöqa llapan altsakänan y kushikïpaq hunaqmi kanqa.

Apocalipsis 20:11, 12QKW, nishqanchömi imanö Juicio Hunaq kanantapis apóstol Juan qellqarqan: “I rikarqä juk jatun yulaq trönuta i tseychow teykaqta, nowpanpitam eyqikuyarqan patsa i syelu, i manam ima sityu karqantsu peykunapaq. I rikarqä wanushqakunata, jatusaqkunata i ichikkunata, Dyospa [“tronopa”, NM] nowpanchow sheykayaqta; i librukunanam kichakashqa kayarqan, i juk libru kichashqa karqan, tseymi kawey libru; i wanushqakuna jusgashqa kayarqan librukunachow qellqashqa kosaskunapa, rureyninkunamannow” nishpa. ¿Pitaq tsë trönochö tëkaq Juezqa?

Rikanqantsiknöpis, Jehová Diosmi nunakunapa Hatun Juezninqa. Tsënö karpis, hukpa makinchömi nunakunata juzguëtaqa haqirishqa. Hechos 17:31 nishqanchömi apóstol Pablu willamantsik: “Diosmi sitashqa juc junaqta, enteru munducho nunacunata rurayanqanmanno acrashqan nunatawan jusgatsinanpaq”. Y tsë akrashqa Juez nunaqa, Jesucristom (Juan 5:22). Pero, ¿imëraq tsë Juicio Hunaq qallanqa y ëka tiemporaq kanqa?

Satanaspa mana alli nunankunata Armagedón nishqanchö Dios ushakäratsimuptinmi, tsë Juicio Hunaqqa qallëkonqa nimantsikmi Apocalipsis librochö (Apocalipsis 16:14, 16; 19:19–20:3). * Tsë Armagedón nishqan guerra pasariptinnam, Satanastawan  demonionkunata uchkuman hitarkur wichqarenqa tsëchö waranqa wata kayanampaq. Tsëyaqnam, 144.000 ciëlochö gobernayänampaq akrashqakuna, nunakunata juzgayanqa y “Jesucristuwan waranqa wata mandacuyan[qa]” (Apocalipsis 14:1-3; 20:1-4; Romanos 8:17). Rikanqantsiknömi Juicio Hunaqqa waranqa wata kanqa y manam huk hunaqllatsu.

Tsë waranqa watam Jesucristu “cuentata mañanqa cawecaqcunata y wanushqacunata” (2 Timoteo 4:1). “Cawecaqcunata” nerqa, “mana yupetapis puedipaq mantsaquepaq alli shuyni” nunakunapaqmi parlan, këkunaqa Armagedón nishqan guerrapita kawëkar pasaqkunam kayan (Apocalipsis 7:9-17). Hina apóstol Juanqa rikarqan “wanushqakunata [...], Dyospa [“tronopa”, NM] nowpanchow sheykayaqta” cuentata qoyänampaq. Jesus änikonqannömi ‘wanushqacunaqa’ Cristo parlashqanta “wiyarirnin” kawariyämonqa (Juan 5:28, 29; Hechos 24:15). Y cuentata qoyanqan höraqa, ¿imataraq Juez rikanqa?

Apóstol Juan rikanqan visionchömi ‘librukuna kichakashqa kayarqan’ y “wanushqakuna jusgashqa kayarqan librukunachow qellqashqa kosaskunapa, rureyninkunamannow” (Apocalipsis 20:12). Kë librokunachöqa, ¿unë rurëninkunatsuraq qellqarëkarqan? Manam. Kë juiciochöqa manaraq wanur rurayanqankunatatsu manam juzgan. ¿Imanöpataq këtaqa musyantsik? Kikin Bibliachömi willamantsik, “wanushqana kaqqa hutsapita justifikashqanam”, nishpa (Romanos 6:7QKW). Tsë kawarimoqkunaqa hutsannaqnam kawariyämonqa. Tsënöpam, tsë librochö qellqarëkaqqa shamoq tiempopaq yachatsikïkuna. Kawarimoqkuna y Armagedón nishqanta kawëkar pasaqkunapis, Diospa mushoq mandamientonkunatam wiyakuyänan, mana wanushpa kawëta munarqa. Kë librochömi waranqa watapaq Jehová Diospa mushoq mandamientokuna këkanqa. Tsë Juicio Hunaq tiempochö rurayanqampitam juzgado kayanqa.

Tsë tiempochömi, waranqëpayan nunakunapaq kanqa huk alli tiempo, Diospa voluntadninta yachakuyänampaq y rurayänampaq. Tsëpaqqa Diospa voluntadnimpita yachatsikïqa hinantin Patsapam kanqa. Y “justiciatam yachakuyan[qa] patsachö llapan täraq nunakuna” (Isaías 26:9). Tsënö kaptimpis manam llapan nunakunatsu Diospa voluntadnin rurëta munayanqa. Tsemi, Isaías 26:10 willamantsik: “Mana alli nunata kuyaptimpis manam justiciata  yachakuntsu. Alli patsachö këkarpis mana allillatam rurëkanqa, y manam rikanqatsu Jehovapa hatun këninta” nishpa. Kë Juicio Hunaqchöqa mana alli nunakunaqa chipyëpam ushakäyanqa y manam imëpis kawariyämonqanatsu (Isaías 65:20).

Tsë Juicio Hunaq ushariptenqa llapan kawëkaq nunakunam chaskiriyanqa “rasumpëpa kawëta”, o hutsannaqnam kayanqa (Apocalipsis 20:5). Tsëmi, Juicio Hunaq tiempochöqa llapan nunakuna qallananchöno hutsannaq këman chäyanqa (1 Corintios 15:24-28). Tsëpitanam shamonqa huk último kaq prueba. Satanasmi uchkuchö wichqaranqampita horqashqa kanqa, y llapan nunakunata pruëbaman churanantam Jehová permitenqa (Apocalipsis 20:3, 7-10). Diablopa contranman churakaq nunakunaqa rikäyanqam Dios änikonqan kë profecía cumplikaqta: “Patsachöqa alli nunakunallam tärayänqa, y mana wanushpam tsëchö kawayanqa” (Salmo 37:29). Awmi, kë Juicio Hunaqqa huk kushikïpaq bendicionmi kanqa llapan wiyakoq y fiel nunakunapaq.

^ par. 1 Armagedón nishqampita más yachatsikïkunataqa tarinki, Perspicacia para comprender las Escrituras, vol. 1 nishqampa 680, 681, 1086, 1087, päginankunachö, y Adoremos al único Dios verdadero nishqan libropa 20 capïtulonchömi, kë ishkan librokunataqa Jehovapa testigonkunam rurayämushqa.