Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 CAPÍTULO 5

Diosnintsikpa huk valoryoq qarëninmi rescäteqa

Diosnintsikpa huk valoryoq qarëninmi rescäteqa
  • ¿Imataq rescate?

  • ¿Imanötaq Diosqa këta qomarqantsik?

  • ¿Imanötaq qamta yanapashunkiman?

  • ¿Imanötaq agradecido këkanqëkita rikätsikunkiman?

1, 2. a) ¿Imataq huk qarëtaqa más valoryoqta ruran? b) ¿Imanirtaq chaskenqantsik rescäteqa más valoryoq qarë?

¿IMATAQ más alli qarë chaskenqëki? Huk qarëqa manam chaniyoqraqtsu kanan valoryoq y alli kanampaq. Sinöqa, kushitsishuptiki o wananqëkita qoyäshonqëkim alli valoryoqta ruran.

2 Llapan qarëkunapitapis más valoryoqqa huk qarëmi kan. Llapan nunakunapaq Diospa qarënin. Awmi Dios Yayantsikllam imëkantsikpis qaramarqontsik, pero más alli kaq qarëqa rescätem: Wambran Jesucristu noqantsik-rëkur wanonqan (leyi Mateo 20:28). Kë capïtulochömi rikäshun rescäteqa llapan chaskenqantsik qarëpitapis más valoryoq kanqanta, tsërëkurmi tarintsik atska kushikïta, y rasumpa wananqantsikta. Këwanqa Dios Yayantsik rasumpëpa kuyamanqantsiktam rikätsimantsik.

¿IMATAQ RESCATE?

3. ¿Imataq rescate, y imatataq musyanantsik kë qarë alläpa preciso kanqanta rikänapaq?

3 Ichik parlakïchöqa, rescäteqa hutsapita y wanïpita  llapan nunakunata Jehová Dios salvanampaqmi (Efesios 1:7). Kë rescäteta más tanteanapaqqa, Edén huertachö pasakonqantam musyanantsik. Adán hutsata rurarnin imata oqranqantapis musyëmi yanapamäshun, kë rescate noqantsikpaq alläpa valoryoq kanqanta musyanapaq.

4. ¿Imanötaq Adanpaqqa karqan hutsannaq kawakï?

4 Adanta Jehová Diosnintsik kamarqa huk alli väleq qarëtam qorqan, mana hutsayoq kawakïta. Imanö kushikïpaqraq karqan pëpaq. Hutsannaq peqanwan y cuerponwanqa, manachi ni imëpis qeshyanmantsu, awkinyanmantsu, ni wanunmantsu karqan. Hinamampis kikin Jehová Dioswanmi alläpa kuyanakuyaq. Tsëmi Bibliaqa, ‘Dyospa tsurinmi’ Adanqa karqan nimantsik (Lucas 3:38). Alläpam kuyanakuyaq Adanwan Diosqa, huk kuyakoq Teyta tsurinwan kuyanakoqnömi. Rasumpam Kamakoqqa parlapaq patsachö tsurinta, kushishqa nenqanta ruranampaq, y pëpita shuyaranqantapis willapaqmi (Génesis 1:28-30; 2:16, 17).

5. Adantaqa “Dios rurarqan kikintanömi” ninmi Bibliachöqa, ¿ima ninanraq tsëqa?

5 Adantaqa “Dios rurarqan kikintanömi” (Génesis 1:27). Këqa manam kikin Diosnömi karqan ninantsu. Kë libropa qallanan capïtulonchö yachakonqantsiknöpis Jehová Diosqa huk Espïritum y manam rikëta puëdentsiktsu (Juan 4:24). Pëpa cuerponqa manam tulluyoqtsu ni ëtsayoqtsu. Pero Adantaqa kikintanö yachanëpaqtam rurarqan: kuyakoqta, alli yachaqta, justiciayoqta, kallpayoqta, y yachanëpaq kënintaqa mastapis qorqanran. Hinamampis, Teytannömi kikin akranan karqan ima ruranantapis. Imakunatapis ruranampaq rurashqa mäquinanöllatsu manam karqan. Allita o mana allita ruranampaqpis kikinmi akrëta puëdeq.  Dios Yaya wiyakïta akrashqa karqa, mana wanushpa Shumaq Patsachömi kawanman karqan.

6. ¿Imatataq oqrarerqan Adán Dios Yayata mana wiyakonqanchö, y kastankunataqa imaraq pasarqan?

6 Diosta mana wiyakonqampitam Adanqa wanïta tarerqan. Tsë hutsampitam shumaq y perfecto kawëninta oqrarerqan (Génesis 3:17-19). Pero manam kikinllapaqtsu oqrarqan, sinöqa llapan kastankunapaqwanmi. Tsëmi Diospa Palabranqa kënö nimantsik: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Romanos 5:12). Y tsënöpam, noqantsikpis Adannö hutsasapa kantsik. Tsëmi, kikintawan rantikëkamarqontsik Adanqa, wanïpa y “jutsapa esclabun” tikrarinapaq, nishpam Bibliaqa willamantsik (Romanos 7:14). Tsëmi, Adán y Evapaqqa mana ni huk esperanzankuna karqannatsu, kikinkunapa munëninkunawan Dios Yayata mana wiyakuyäshqa kayaptin. Pero, ¿imaraq kastankunataqa pasamashwan karqan?

7, 8. ¿Ima ishkë cosaskunataq yanapamantsik rescätepita más musyanapaq?

7 Jehová Diosmi deciderqan huk rescätewan llapan nunakuna salvëta. ¿Imataq huk rescate? Huk nunata tsarirkur apakuyaptin o imatapis apakuyaptin kachayämunampaq chaninta pagakïmi huk rescate, tsenollam hina Bibiliachöpis willamantsik, ima däñotapis rurarirnin chaninta pagakipïs rescätem, nishpa. Tanteanapaq, huk nuna, nunamayinta dañarqa tsë däñupitam chaninta paganan karqan.

8 Rikanqantsiknömi, Adanqa alli kawakunantsikta oqratsimarqontsik. ¿Imanöraq, wanïpa y hutsapa esclavon këpita librakashwan? Rikärishun, Jehová Dios ima ruranqantapis.

 ¿IMANÖTAQ JEHOVÁ APAMORQAN SALVACIONTA?

9. ¿Imanö rescätetataq wanakarqan?

9 Huk perfecto kawëmi oqrakarqan. Tsëmi, lluta nunapa kawëninllatatsu wanarqan perfecto kaweta yapë tarinapaqqa (Salmo 49:7, 8). Tsë oqrakashqa perfecto kawëtanömi wanakarqan. Tsënömi, Dios Yayapa Palabranchö qellqarëkarqan justiciapaq parlarnin. Tsë nenqannömi ‘huk kawëtaqa [...] huk kawëraq’ rescatanan karqan (Deuteronomio 19:21). Tsënö karqa, ¿imanöraq Adán perfecto kawë oqranqantaqa yapë tarishwan karqan? Huk perfecto kawëta tarinapaqqa huk perfecto ‘rescätetam’ wanarqantsik (1 Timoteu 2:6).

10. ¿Imanötaq Jehová qomarqontsik salvacionta?

10 ¿Imanötaq Jehová Dios apamorqan rescäteta? Huk perfecto espiritual wambrantam kachamorqan. Pero manam lluta angel-llatatsu, sinöqa más kuyë punta kaq Wambrantam (leyi 1 Juan 4:9, 10). Pëqa kushishqam haqiramorqan ciëlochö wayinta (Filipenses 2:7). Punta kaq capïtulochö rikanqantsiknöpis Jehová Diosqa Mariapa pachanmanmi Tsurimpa kawëninta milagrosamente churëkamorqan. Dios Yayapa espíritu santon yanapaptinmi Jesus yurerqan hutsannaq (Lucas 1:35).

Jehová Diosqa hapallan Tsurintam kachamorqan noqantsik-rëkur wanunampaq

11. ¿Imanöraq huk nunalla waranqa kuti waranqëpayan nunakunata salvanman karqan?

11 ¿Imanöraq huk nunalla waranqa kuti waranqëpayan nunakunata salvanman karqan? Y ¿imanöraq llapan nunakunaqa hutsasapa tikrariyarqan? Yarpakurkï, alläpa väleq kapoqnintam Adanqa oqrarerqan hutsallakurirnin: manam tsurinkunata perfecto kawëninkuna pasëta puëderqannatsu. Sinöqa hutsatawan, wanïllatanam pasarqan. Bibliachöqa “qepa caq Adanqa” Jesusmi nimantsikmi, y pëqa hutsannaq, y perfectom karqan (1 Corintios 15:45). Tsëmi Adannö perfecto karnin Jesusqa hutsapita salvamënintsikta puëderqan. Y llapanchömi  Teytantapis wiyakorqan y perfecto kawënintapis sacrificarqan. Tsënöpam, Adán hutsallakurir oqranqanta pagakïkur, kastankunata qomarqontsik mana wanushpa kawakï shuyäkinintsik (Romanos 5:19; 1 Corintios 15:21, 22).

12. ¿Imatataq llapan hipanqanwan Jesus rikätsikorqan?

12 Manaraq wanur Jesus llapan hipakïkuna pasanqantam Bibliaqa willamantsik. Pasëpam maqakïkuyarqan, y huk qerumampis clavëkuyarqanmi, tsënö hipatsipam wanïkatsiyarqan (Juan 19:1, 16-18, 30; “¿Rasumpëpa cristianokunaqa katsiyanmantsuraq cruzta adoracionninkunachö?” nishqan apendicichö këkaq yachatsikïta rikäri). ¿Imanir-raq tsëläyaqa hipëkunan karqan? Huk capïtulochönam yachakushun, ni huk nunallapis problëmakunata pasarqa manam Jehová Diosta fieltsu kanqa nishpa Satanás nenqanta. Y tsëläya hipëkarpis Jesusqa fielmi llapanta aguantarqan, tsënöpam Satanaspa calumnianta contestarqan. Hinamampis imata Diablu ruraptimpis, alli pensëyoq huk perfecto nunaqa Jehová Diosman fiel kanqantam rikätsikorqan. ¡Imaraq kuyë Tsurin fiel kanqanta rikar Jehová Dios kushïkorqan! (Proverbios 27:11.)

13. ¿Imanötaq tsë rescäteqa pagakarqan?

13 ¿Imanötaq tsë rescäteqa pagakarqan? Tsë 33 watachö 14 de nisán nishqan judío killa hunaqmi, Dios Yaya hutsannaq perfecto kuyë Tsurinta wanutsiyänanta permiterqan. Tsënöpam perfecto kawëninta Jesusqa “juc cutilla” sacrificarqan (Hebreus 10:10). Y wanonqampita kima hunaqllatam Jehová Diosqa huk espïritutanö tsurinta sharkatsimorqan. Y ciëlota kutirirnam Jesusqa perfecto nunanö kawënimpa valorninta presentarqan Teytanta, y tsë kawënintaqa Adanpa kastankunata salvanampaqmi sacrificashqa karqan (Hebreus 9:24). Jehová Diosqa chaskerqanmi Jesuspa sacrificiompa  valorninta, y tsënöpam kë sacrificioqa, llapan nunakunata hutsapita y wanïpita salvanampaq huk rescate karqan (leyi Romanos 3:23, 24).

¿IMANÖTAQ TSË RESCÄTEQA QAMTA YANAPASHUNKIMAN?

14, 15. ¿Imatataq rurashwan ‘jutsantsiccunapita perdonta’ chaskinapaq?

14 Tsë rescäterëkurmi hutsasapa këkarpis atska y shumaq bendicionkunata chaskikantsik. Tsëmi kananqa, kë tiempochö y shamoq tiempokunapaqpis ima bendicionkunatapis rescate apamunanta rikärishun.

15 Hutsakunapa perdonnin. Hutsasapa këta chaskishqa karmi, alli kaqllataqa rurëta puëdentsiktsu. Tsëmi parlënintsikchö y rurënintsikchöpis llapantsik hutsallakuntsik. Y Jesucristupa sacrificionrëkurmi ‘jutsantsiccunapita perdonta’ chaskintsik (Colosenses 1:13, 14). Pero tsëta chaskinapaqqa shonquntsikpita patsëmi arrepentikunantsik. Hinamampis Jesucristupa sacrificionman fëta churarmi humildadwan Jehová Diosta mañakunantsik hutsantsikkunapita perdonëkamänantsikpaq (leyi 1 Juan 1:8, 9).

16. ¿Imanöpataq limpio concienciayoq Dios Yaya adorëta puëdentsik y imanöraq limpio concienciayoq këqa yanapamantsik?

16 Diospa nöpanchö, limpio concienciayoq. Culpayoq concienciaqa, mana imapaqpis väleqtanömi katsimantsik. Pero tsë rescätewanmi Jehová Diosqa perdonamantsik y mana perfecto këkashqapis limpio concienciawan adoranatam permitimantsik (Hebreus 9:13, 14). Tsënöpanam, noqantsikqa pëwan parlëta o imë horapis mañakïta puëdentsik (Hebreus 4:14-16). Hinamampis limpio concienciayoq karqa, pensamientontsikkunachöpis yamë kakïtam tarishun, y kushishqam kakushun.

17. ¿Ima bendicionkunatataq chaskishun Jesucristu noqantsik-rëkur wanonqampita?

 17 Shumaq paraïsochö mana wanushpa kawë shuyarë. “Hutsapa pägunqa waniymi”, nishpam nimantsik Romanos 6:23, QKW. Hina tsë versïculollachömi: “Dyospa qareyninqa wiñey kaweymi Señornintsik kristu Jesuschow”, nishpa nimantsik. Kë libropa kima kaq capïtulonchömi, patsachö Paraïsoqa këllachöna kanqanta rikarqontsik (Apocalipsis 21:3, 4). Kë llapan bendicionkuna y alli saludyoq mana wanushpa kawëqa kanqa noqantsik-rëkur Jesucristu wanushqa kaptinmi. Kë llapanta chaskinapaqqa, Dios Yaya qaramanqantsik rescätepita alläpa agradecido kanqantsiktam rikätsikunantsik.

¿IMANÖTAQ AGRADECIDO KANQËKITA RIKÄTSIKUNKIMAN?

18. ¿Imanirtaq rescätepitaqa Jehová Diosta alläpa agradecikushwan?

18 ¿Imanirtaq Jehová Diosta alläpa agradecikushwan rescätepita? Awmi, qaramaqnintsik tiemponta y qellëninta gastashqa kaptinmi huk qarëqa más valoryoq tikran. Hinamampis, alläpam kushintsik tsë llapantaqa  Jehová Dios kuyamarnintsik qomashqantsik kaptin. Tsëmi, Dios Yaya sacrificiota rurashqa kaptin, tsë rescäteqa llapan qarëkunapitapis más valoryoq. “Porqui que patsacho nunacunata allapa cuyarninmi, Dios jucllella tsurinta cachamorqan,” nishpam nin Juan 3:16. Y tsë rescätem Jehová Dios kuyamanqantsikta alleq rikätsimantsik. Tsënöllam hina Jesucristu kawëninta sacrificanqampis rikätsimantsik pëpis kuyamanqantsikta (leyi Juan 15:13). Awmi, Jehová Dios y tsurin Jesucristupis llapantsikta hukllëllapayan kuyamanqantsiktam tsë rescäteqa alleq rikätsimantsik (Gálatas 2:20).

Tsë rescätepita agradecido kanqëkitaqa rikätsikunki Jehová Diosta más alleq reqirmi

19, 20. ¿Imakunata rurartaq rescate qarëpita alläpa agradecido kanqëkita rikätsikunkiman?

19 Tsëpenqa, ¿imanöraq rescätepitaqa Jehová Diosta alläpa agradecikunkiman? Puntataqa tsë rescate qomaqnintsik Jehová Diostam alleq reqinëki (Juan 17:3). Bibliataqa alleq reqinki kë libropa yanapëninwan estudiarmi. Jehová Diosta más reqerqa, masllam kuyanki. Maslla kuyarnam, llapanchö wiyakur más kushitsita munanki (1 Juan 5:3).

20 Rescäteman fëniki katsun. Jesuspaqmi nin: “Pipis Diospa tsurinman marcäcurnenqa wiñe cawayoqmi kayanqa”, nishpa (Juan 3:36). ¿Imanötaq Jesusman fëta churashwan? Manam shimillawantsu. Santiagu 2:26QKW nenqannöpis ‘kreyikiypis mana rureyoqqa wanushqam keykan’. Awmi, rasumpëpa fëtaqa alli rurëkunawanmi rikätsikuntsik. Jesusman rasumpa fënintsik kanqantaqa ruranqantsikchöpis y parlanqantsikchöpis pëta qatirmi rikätsikushun (Juan 13:15).

21, 22. a) ¿Imanirtaq cada wata Santa Sena o Señorpa Cënan yarpëman ëwashwan? b) ¿Imataraq yachakushun capítulos 6 y 7 nishqanchö?

21 Cada wata Señorpa cënanman ëwë. Tsë 33 wata 14 de nisán ampim, Jesus patsätserqan huk especial cënata,  tsëtam Bibliaqa “Santa Sena” o Señorpa cënan nin (1 Corintios 11:20; Mateo 26:26-28). Hina Jesucristupa wanïnin Yarpë hunaq nishpapis reqintsikmi. Këtaqa Jesucristu patsätserqan, llapan apostolninkuna y wakin cristianokunapis, perfecto kawëninta rescätetanö qoykonqanta, yarpäyänampaqmi. Kikin Jesusmi: “Queno imepis rurayanqui noqata yarpäyämarnï” nerqan (Lucas 22:19). Jesucristupa wanïnin Yarpëqa, Jehová Dios y kikin Jesus kuyamarnintsik rescatamanqantsiktam yarpätsimantsik. Cada wata kë yarpëman ëwarnenqa rescätepita alläpa agradecido kanqantsiktam rikätsikuntsik. *

22 Rescäteqa Jehová Diospa alläpa väleq qarëninmi (2 Corintios 9:14, 15). Kë rescäteqa wanushqakunatapis yanapanmi, y capítulos 6 y 7 nishqanchömi masllata yachakurishun.

^ par. 21 Señorpa Cënanpita mas yachatsikïtaqa “Señorpa Cënan celebrëqa Jehová Diostam kushitsin” nishqan apendicichö këkaq yachatsikïchömi tarinki.