Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Rasumpëpaqa, ¿imatataq Biblia yachatsikun?

 CAPÍTULO 18

Bautismo y Dioswan alli kënintsik

Bautismo y Dioswan alli kënintsik
  • ¿Imanötaq rasumpëpa bautismoqa?

  • ¿Imakunataraq rurankiman bautizakunëkipaq?

  • ¿Imanötaq Diosman dedicakï?

  • ¿Imarëkurtaq bautizakïta munankiman?

1. ¿Imanirtaq Etiopía markapita huk autoridad bautizashqa këta munarqan?

“QUECHOMI yacu can. ¿Manacu canan juclla bautisecallämanquiman?”, nishpam nerqan, apostolkunapa tiemponchö Etiopía markapita huk autoridad. Jesus, Jehová änikonqan Mesias kanqantam Felipe shutiyoq cristiano Bibliawan alleq rikäratsishqa kanaq. Yachakonqan  shonqunyaq chärishqa kaptinmi, kikin bauticëkamë nishpa mañakorqan (Hechos 8:26-36).

2. ¿Imanirtaq bautismoman pensankiman?

2 Jehovapa testigonkunawan kë librota estudiashqa karqa, itsapis listona këkanki kënö tapukunëkipaq, ¿imaraqtaq pishin noqa bautizashqa kanapaq?, nishpa. Paraïsochö mana wanushpa nunakuna tärayänampaq Biblia änikonqanta yachakurerqonkinam (Lucas 23:43; Apocalipsis 21:3, 4). Hina, wanushqakuna imanö këkanqanta y kawariyämunantapis alleqnam musyarerqonki (Eclesiastés 9:5; Juan 5:28, 29). Itsapis Jehovapa testigonkuna rurayanqan reunionninkunaman ëwëkanki atska kutina y rasumpëpa Dios munanqannö adorayanqanta rikarqonki (Juan 13:35). Pero más alleqa shonqïkipita patsë Jehová Diosta kuyar qallanqëkim.

3. a) ¿Imatataq mandarqan Jesus qateqninkunata? b) ¿Imanötaq cristiano bautismoqa?

3 ¿Imanötaq rikätsikunkiman Dios servita munanqëkita? Jesusmi mandarqan qateqninkunata: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq, y creyicoq caqtana bautisayanqui” nishpa (Mateo 28:19). Kikin Jesus bautizakurmi yachatsikorqan tsënö rurayänampaq. Pero manam ichiklla yakuwantsu tsaqtsupäriyarqan ni peqanllamantsu winapäriyarqan (Mateo 3:16). Bautizar nishqan palabraqa griegu idiömapitam shamun, tsëqa “yaku rurinman tullpï” ninanmi. Tsëmi, rasumpëpa bautismoqa yakuman llapan cuerponta tullpï.

4. ¿Imatataq rikätsikuntsik bautizakurnin?

4 Jehová Diospa amïgon këta munaqkunaqa bautizakuyänanmi. Bautizakurnenqa rikätsikuyan shonqunkunapita patsë Jehová Diosllata servita munayanqantam y Pëpa voluntadninta rurar kushikuyanqantam (Salmo 40:7, 8). Y qateqnin pärrafokunachömi yachakushun bautizakunapaq rurëkunata.

 YACHËTAWAN FËTAM WANANTSIK

5. a) ¿Imatataq puntata rurashwan bautizakunapaq? b) ¿Imanirtaq alläpa preciso reunionkunaman ëwë?

5 Bautizakunapaq punta kaq rurëtaqa qallarerqonkinam. ¿Imanö? Itsapis Bibliapita estudio chaskenqëkiwanchi Jehová Diospita y Tsurin Jesucristupita yachakïkanki (leyi Juan 17:3). Hina mastaran yachakïta puëdenki. “Diospa boluntaninta” alleq musyanëkitam munayan cristianokunaqa (Colosenses 1:9). Këpaqqa Jehovapa testigonkunapa reunionninkunam yanapashunki. Tsëmi mana faltashpa ëwanëki (Hebreus 10:24, 25). Imëpis reunionkunaman ewarqa Diostam reqinki.

Diospa Palabrampita yachakïmi alläpa preciso bautismopaq

6. ¿Llapan Bibliataraqtsuraq yachanëki bautizakunëkipaqqa?

6 Bautizakunëkipaqqa manam llapan Bibliataraqtsu yachakunëki. Yarpashqaqa Etiopía markapita autoridadpis wakin wakinllataqa Bibliapita musyarqannam, pero más yachapäratsiyänantam wanarqan (Hechos 8:30, 31). Tsënöllam hina qampis tiempowanqa mastaraq yachakunki. Awmi, Diospitaqa manam ni imëpis yachakur ushankitsu (Eclesiastés 3:11). Pero bautizakunëkipaqqa Bibliapa principal yachatsikïninkunallatapis yachakur ruranëkim (Hebreus 5:12). Wanushqakuna mëcho y imanö këkäyanqanta, Diospa shutin y Reinon preciso kanqantapis musyanëkim.

7. Bibliata estudiarqa, ¿imamantaq fëniki kanman?

7 Tsënö kaptimpis manam yachananllatsu, “Diosman mana marcäcurqa [fëta mana churarqa] manam imanopapis puedishuntsu pe munanqanno cawaquita” (Hebreus 11:6). Bibliachömi tarintsik unë Corinto markachö täraq nunakunaqa, cristianokuna Diospa Palabranta willapäyaptin “creyicurnin” bautizakuyanqanta (Hechos 18:8). Itsa qamtapis tsënölla pasashunkiman. Bibliata estudiarqa, rasumpëpa Diospa pensamienton Biblia kanqanmanmi fëta churankiman. Hinamampis Dios Yaya llapan änikonqanta cumplimunanman y Jesucristupa sacrificionrëkur  salvashunëkimanmi fëta churankiman (Josué 23:14; Hechos 4:12; 2 Timoteu 3:16, 17).

BIBLIA YACHATSIKONQANTA WILLAKÏ

8. ¿Imataq yanapashunki yachakonqëkikunapita parlanëkipaqqa?

8 Fëniki hatun kaptenqa, masmi valorniki kanqa Bibliapita yachakonqëkikunata willapäkunëkipaq (Jeremías 20:9). Awmi, kikikillanam shonqïkipita patsë Diospita y änikonqankunapita parlëta munarinki (leyi 2 Corintios 4:13).

Yachakonqëkipita parlanëkipaqqa fënikim yanapashunkiman

9, 10. a) ¿Pikunatataq Bibliapita yachakonqëkita willapar qallankiman? b) ¿Imataraq rurankiman Jehovapa testigonkunawan willapäkoq ewëta munarqa?

9 Shumaqllapam willapar qallanëki, kastëkikunata, yanasëkikunata, marka mayikikunata y trabajaq mayikikunatawan. Tiempowanqa, Jehovapa testigonkunawan willapäkoq ëwëtanam munarinki. Tsënö kaptenqa, mana mantsakushpa Bibliapita yachatsishoqniki Testigowan parlë. Willapäkoq yarqunëkipaq listona këkanqëkita rikarqa, congregacionpita ishkë ancianokunawan parlayänëkipaqmi willanakayämonqa.

10 Tsënöpam, Diospa üshankuna rikaq ancianokunata maslla reqinki (Hechos 20:28; 1 Pedru 5:2, 3). Pëkunam rikäyämonqa Bibliapa principal yachatsikïninkunata yachakonqëkita y creinqëkita, hina rikäyanqam Biblia yachatsikonqannö kawëkanqëkita y rasumpëpa Jehovapa testigon këta munanqëkitapis. Tsënö kaptenqa, congregacionwan willapäkoq yarqunëkipaq allina këkanqëkitam pëkuna willayäshunki.

11. ¿Ima mana alli rurëkunatataq haqiyänan congregacionwan willapäkoq yarquyänampaq?

11 Pero ancianokunaqa hina rikäyanmi willapäkoq ëwayänampaqqa kawëninchö ima pishenqanta y yachakonqannö kawanantapis. Itsapis pakëllapa ima mana allitapis rurëkanman y tsëtaqa haqinanmi. Tsëmi, congregacionwan willapäkoq yarqunëkipaqqa, kawënikichö  haqinëki, warmiwampis ollquwampis lluta purikïta, machakïta, cigarro shoqïta, coca chaqchëta y wakin drogakuna mikïtapis, kë llapan mana alli rurëkunapitam libre kanëki (leyi 1 Corintios 6:9, 10; Gálatas 5:19-21).

MANA ALLI RURËKUNA HAQI Y ALLI KAQ RURË

12. ¿Imanirtaq alläpa preciso arrepentikï?

12 Bautizakunëkipaqqa mastaran ruranëki. Tsëtam apóstol Pedru willamantsik: “Cananqa mana alli rureniquicunata dejarir, Diosman cutiquicuyänequi. Tsenam pe jutsequicunata qonqe[conqa]” nishpa (Hechos 3:19). Rasumpëpa arrepentikorqa, punta mana alli rurëninkunapitam alläpa llakïkun. Pero manam, mana allita rurar kawashqa nunallatsu arrepentikunan, sinöqa Jehová Dios adorë munaqkunaqa llapanmi arrepentikuyänan. ¿Imanir? Llapantsik hutsasapa karmi Diosnintsikpa perdonninta wanantsik (Romanos 3:23; 5:12). Manaraq Bibliata estudiarqa, manam qampita Dios shuyaranqanta musyarqëkiraqtsu. Y Dios munanqannö kawarqonkitsu, tsëmi alläpa preciso arrepentimientoqa.

13. ¿Imataq alli kaq ashiqa?

13 Arrepentikurerqa alli kaqtam ashinëki. Tsëpaqqa, manam llapan mana alli ruranqëkipita llakikïllatsu sinöqa chipyëpam tsë llapanta haqinëki. Tsëpita patsëqa allillata ruranëkipaqmi decidido kanëki. Manaraq bautizakurmi arrepentikunëki y alli kaqta rurar qallanëki.

KIKIKI DIOSMAN DEDICAKÏ

14. ¿Imataraqtaq ruranëki manaraq bautizakur?

14 Hina bautizakunëkipaqqa Jehová Diosmanran dedicakunëki.

¿Diosman dedicakunëkipaqqa orakorqonkinaku?

15, 16. ¿Ima ninantaq Diosman dedicakï y imaraq tsëta ruranapaqqa yanapamäshun?

15 Dedicakïqa, Jehová Diosman shonqupita patsë huk oracionchö qampa voluntadnikillatam ruramushaq nishpa  entregakïmi (Deuteronomio 6:15). Pero ¿imanir-raq tsënöqa pipis comprometikïkunman? Rikärishun: Huk nuna, huk warmita más reqitam munaq ninman. Reqenqanmannömi shonqumpita patsë más kuyanqa. Y tsëpita tiempowanqa, qamwanmi casakïta munä nirenqanam. Pero casakurerqa problëmakuna pasananta musyanmi. Tsënö kanan kaptimpis shonqumpita patsë kuyakïninmi yanapanqa casakunampaq.

16 Tsënöllam hina Jehová Diosta alleq reqirir y shonquntsikpita patsë kuyarqa, problëmakuna kaptimpis pëllata imëyaqpis servita munashun. Y Diospa tsurin Jesucristuta qati munaqqa, ‘quiquinpa muneninta jaqirirmi’ qatenqa (Marcos 8:34). Tsëtaqa tarintsik Dios Yayata wiyakur y kikintsikpa munënintsikkunata qepaman churarmi. Tsëmi manaraq bautizakur, Jehová Diospa voluntadnin rurëllata kawënikichö puntaman churashqana kankiman (leyi 1 Pedru 4:2).

¿IMANIRTAQ MANA ALLIMAN ISHKITA MANTSASHWANTSU?

17. ¿Imanirtaq wakinqa dedicakïta mantsayan?

17 Wakin nunakunaqa Diosman dedicakïta mantsayanmi. Itsa mantsayan dedicakushqa karqa Diosman cuentata qoyänantachi. Hutsaman ishkir Jehová llakitsita itsapis wakinqa pensayanman y tsënö pensarna mana munayantsu dedicakïta.

18. ¿Imaraq Jehová Diosman dedicakunëkipaq yanapëkushunki?

18 Jehová Diosta shonqïkipita patsë kuyënikim yanapashunki pëman dedicakunëkipaq y tsënöpa dedicacionnikita cumplinëkipaq (Eclesiastés 5:4). Dedicakurerqa, Jehová “munashqanno” llapanchö kushitsirmi purita munanki (Colosenses 1:10). Dios Yayata kuyënikim yanapashunki voluntadninta cumplinëkipaq. Tsëqa itsapis apóstol Juan nenqannö ninkiman: “Mandacushqancunata  cäsucurnenqa, Diosta[m] cuyantsic. Y mandacushqancunaqa manam allapa sasatsu” nishpa (1 Juan 5:3).

19. ¿Imanirtaq Diosman dedicakïta mantsankimantsu?

19 Dios Yayaqa, pëman dedicakoq nuna perfecto kanantatsu manam munan. Jehová Diosqa musyanmi mëyaq puëdenqantsiktapis, y mana puëdenqantsiktaqa manam mañamantsiktsu (Salmo 103:14). Jehová Diosqa yanapashunkim, kushishqa kawanëkitam pëqa munan (leyi Isaías 41:10). Llapan shonquntsikwan Jehová Diosllaman markäkuptikeqa, “llapan nänikitam altsaramonqa” (Proverbios 3:5, 6).

 RIKÄTSIKÏ DEDICACIONNIKITA BAUTIZAKURNIN

20. Diosman dedicakurirnenqa, ¿imanirtaq willakunkiman?

20 Kë llapan yachakonqantsikman yarpakurkorqa, itsa huk oracionchö Jehová Diosman dedicakïta munanki. Pero Jehová Diosta shonqupita patsë kuyaqkunaqa, mastaran rurayänan: ‘Willakuyanan’ dedicacionninkunata llapan nunakuna musyayänampaqmi (Romanos 10:10NM). ¿Imanötaq tsëtaqa rurantsik?

Bautismoqa “wanïnömi”, unë mana alli kawëta chipyëpa haqim, y tsëpita patsëqa Diospa voluntadninta ruranallapaqnam kawantsik

21, 22. ¿Imata rurartaq fëniki kanqanta rikätsikunkiman?

 21 Congregacionnikichö ancianopura rurayänanta rikaq wawqita willë bautizakï munanqëkita. Pëmi willanqa wakin ancianokuna Bibliapita principal yachatsikïninkunata tapuyäshunëkipaq. Listona këkaptikeqa kë ancianokunam willayäshunki shamoq kaq asambleachö bautizakunëkipaq. * Bautizakuyänan hunaqqa huk discursochömi wiyayan tsë bautismo ima significanqantapis. Tsë discursopa ushananchönam bautizakoqkunata ishkë tapukïkunata ruran discursaq, tsëtanam sinchipa contestayänan. Tsënöpam fëninkunata rikätsikuyan llapan tsëchö këkaqkunata.

22 Bautismoqa rikätsikun Diosman dedicakushqëkita y tsëpita patsë Jehovapa testigon tikranqëkitam. Bautizakoqkunataqa chipyëpam yakuman tullpurkuyan, Jehová Diosman dedicakushqa kanqanta llapan rikäyänampaq.

BAUTISMÏKIPA SIGNIFICÄDON

23. ¿Ima ninantaq “Dios Yayapa, Tsurin Jesucristupa y Santu Espiritupa jutincho” bautizakï?

23 “Dios Yayapa, Tsurin Jesucristupa y Santu Espiritupa jutincho” Bautizakuyänampaqmi Jesus qateqninkunata nerqan (Mateo 28:19). Kënö bautizakorqa Jehová Diosta y Jesucristuta autoridadninkunatanö rikäyanqantam rikätsikuyan (Salmo 83:18; Mateo 28:18). Tsënöllam hina Diospa santo espïritun o kallpampa rurëninman creiyanqantapis rikätsikuyan (Gálatas 5:22, 23; 2 Pedru 1:21).

24, 25. a) ¿Ima ninantaq bautismoqa? b) ¿Ima tapukïpa respuestantataq musyanantsik?

24 Bautizakïqa manam yakuman tullpukëllatsu yakuman tullpukanqëkiqa “wanonqëkitam” rikätsikonqa, tsëqa unë mana alli kawëta chipyëpa haqi ninanmi.  Y yakupita yarqaramonqëkiqa tsëpita patsë Diosllapaqna kawanëkitam rikätsikonqa. Jehová Diosman dedicakonqëkitaqa manam ni imëpis qonqanëkitsu, manam huk nunamantsu, manam huk trabäjomantsu, ni huk emprësamantsu dedikakorqonki. Dedicacionniki y bautismïkiqa Dioswan alli kë y amïgon kë qallëmi (Salmo 25:14).

25 Pero manam bautizakurirllatsu salvashqana kanki. Tsëmi apóstol Pablu qellqarqan: “Diosnintsicta mantsacurninna y respetarninna shumaq cawaquita procurecuyë”, nishpa (Filipenses 2:12). Bautismoqa qallananllam. Pero kanran huk tapukï, ¿imanöraq Dioswan junto y kuyakïninchö këkashwan? Kë libropa qateqnin capïtulom këtaqa willamäshun.

^ par. 21 Jehovapa testigonkuna cada wata asambleakuna rurayanqanchömi bautizakuyan.