Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Wamrëkikunata yachatsinëkipaq

 13 KAQ YACHATSIKÏ

Timoteuqa nunakunatam yanapëta munarqan

Timoteuqa nunakunatam yanapëta munarqan

Timoteuqa juk jövinmi karqan y nunakunata (runakunata) yanaparmi alläpa kushikoq. Më tsëpam viajarqan yanapakunampaq. ¿Pëpita masta willarinaqta munankiku?. . .

Timoteutaqa maman y awilanmi Jehoväpita parlapäyarqan

Timoteuqa Listra markachömi winarqan. Mamampa jutinqa Eunïcim karqan y awilampanam Loida. Pëkunaqa, Jehoväpitam Timoteuta yachatsiyaq. Tsëmi, Timoteuqa wamra kanqampita patsë, Jehoväta reqiyänampaq nunakunata yanapëta munarqan.

Jövinna këkaptinmi Pablu nirqan: “Juk markakunapam yachatsikoq ëwashaq. ¿Yanaqämëta munankiku?”. Timoteuqa alläpa kushikurmi, “¡awmi, munämi!” nirqan. ¡Nunakunatam yanapëta munarqan!

 Pabluwanmi Greciachö këkaq Tesalönica markaman ëwayarqan. Alläpa karutam chakipa ëwayarqan y tsëpitam barcuwan viajayarqan. Chärirnam, mëtsikaq nunakunata Jehoväta reqiyänampaq yanapayarqan. Wakin nunakunaqa alläpam piñakuyarqan y chikiyarqan. Tsëmi Pabluwan Timoteuqa juk markata yachatsikoq ëwakuyarqan.

Timoteuqa kushishqam kawarqan

Tsëpita killakuna pasariptinnam, Pabluqa Timoteuta nirqan Tesalönicata kutinampaq. Cristiänukuna imanö këkäyanqantam musyëta munarqan. Peru Tesalönicachö wakin nunakunaqa alläpam chikiyashqa kayarqan. ¡Tsëmi Timoteuqa kutinampaq valorta tsarinan karqan! ¿Kutirqanku? Awmi, porqui cristiänukunapaqmi yarpachakoq. Y kutiramurqa alli noticiatam Pabluta willarqan. ¡Tesalönicachö cristiänukunaqa manam Jehoväta sirwita jaqishqatsu kayänaq!

Mëtsika watapam Timoteuqa Pabluwan Jehoväta sirwirqan. Tsëmi Pabluqa Timoteupaq kënö nirqan: “Timoteutam kachamushaq yanapayäshunëkipaq. Porqui pënöqa manam ni pï kantsu. Pëqa Jehoväta y nunakunatapis kuyanmi”.

¿Qampis nuna mayintsikta kuyankim aw? ¿Jehoväta reqiyänanta munankiku?. . . Tsëqa yanapanëkim, tsënöpam Timoteunö kushishqa kanki.