Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Wamrëkikunata yachatsinëkipaq

 8 KAQ YACHATSIKÏ

Alli amïgukunatam Josïasqa akrarqan

Alli amïgukunatam Josïasqa akrarqan

¿Jehovä munanqanta rurëqa fäcilku?. . . Cäsi llapan nunakunam (runakunam) alläpa sasa (aja) kanqanta creiyan. Peru Bibliaqa manam tsëtatsu nin. Willamantsik jövin Josïas Jehoväta sirwinampaq alläpa sinchikunqantam. Tsëpaqqa yanaparqan alli amïgukunata akranqanmi. Josïaspita y alli amïgunkunapita masllata yachakurishun.

Josïaspa papäninqa Judäpa reynin Amonmi karqan. Amonqa malafë nunam karqan y mana väleq dioskunatam adoraq. Y Amon wanuriptinnam, Josïasqa Judäpa reynin tikrarirqan. ¿Ëka watayoq këkartaq rey tikrarirqan? ¡Puwaq watayoqllaraq këkarmi! ¿Papäninnöllaku mana alli karqan?. . . Manam.

Sofonïasmi nunakunata nirqan mana väleq dioskunata adorëqa mana alli kanqanta

Wamra kanqampita patsëmi Josïasqa Jehoväta sirwita munarqan. Tsëmi Diosta kuyaq amïgukunata akrarqan, y pëkunam yanapayarqan Jehoväta cäsukunampaq. ¿Pikunataq amïgunkuna kayarqan?

 Juk kaq amïgunqa Profëta Sofonïasmi karqan. Pëmi Judä nunakunata kënö nirqan: “Mana väleq dioskunata adorarlla kakurqa mana allichömi ushayanki”. ¿Imatataq Josïas rurarqan? ¿Wiyakurqanku Sofonïas ninqanta? Awmi. Tsëmi, Jehovällata imëpis adorarqan y mana alli dioskunataqa manam.

Josïaspa juknin kaq amïgunnam Jeremïas karqan. Winë mayim kayarqan, y jövin karninqa vecïnum kayarqan. Jeremïaswan Josïasqa Jehovällata adorayänampaqmi yanapanakuyaq. Alli amïgun kayarqan, tsëmi Josïas wanuriptinqa, alläpa llakikurnin juk cancionta Jeremïas qellqarqan.

Jeremïaswan Josïasqa Jehoväta sirwiyänampaqmi yanapanakuyarqan

¿Imatataq Josïaspita yachakuntsik?. . . Pëqa wamra kanqampitam Dios ninqanta wiyakurqan. Tsëmi Jehoväta kuyaq amïgukunata akrarqan. ¡Qampis Jehoväta sirwita puëdinkim! Peru tsëpaqqa, Jehoväta kuyaq amïgukunatam akranëki.

BIBLIACHÖ LEYIRISHUN:

  • 2 Crönicas 33:21-25; 34:1, 2; 35:25