Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

Jehoväpa Testïgunkunata Pushaqkunapa cartan

Jehoväpa Testïgunkunata Pushaqkunapa cartan

Kuyashqa wawqikuna y panikuna:

Jehoväta adoraqkunaqa alläpam kuyantsik Palabran Bibliata. Alleqmi musyantsik Bibliaqa rasumpa pasakunqanta, yanapakoq consëjukunata, y llapan nunakunata Jehovä alläpa kuyamanqantsikta willakunqanta (Salmus 119:105; Lücas 1:3; 1 Juan 4:19). Noqakunaqa shonqupita patsëmi munayä Diospa Palabranchö këkaq alläpa väleq yachatsikïkunata pipis mëpis yachakuyänanta. Tsëmi alläpa kushishqa willariyaq, Biblia willakunqampita shumaq yachatsikïkuna neq libruta jorqayämunqäta. Kananqa kë librupita masllata musyaratsiyashqëki.

Kë librutaqa jorqayämurqö wamrakunata yanapanampaqmi. Peru Bibliapita maslla yachakïta munaq mayorkunatapis yanapëta puëdinmi. Y musyanqantsiknöpis, Bibliaqa llapan nunakunapaq rurashqa librum, tsëmi shumaq yachatsikïninkunata yachakushqaqa llapantsiktapis kushishqa kawakunapaq yanapamäshun.

Kë libruqa Biblia willakunqanmannömi patsata Dios kamanqampita patsë nunakuna imanö kawayanqanta willakun. Kë libru willakunqankunaqa cläru, fäcil entiendinanlla y qatinallaman pasakunqanmannö kanantam procurayämurqö.

Kë libruchöqa unë pasakunqankunata imëka rikëkaq cuenta leyinapaq y unë nunakuna imanö sientikuyanqanta entiendinapaqmi tukïläya dibüjukuna kan.

Jina kë libruqa rikätsikun, Bibliaqa Jehoväta cäsukoq y mana cäsukoq nunakunapaq parlanqantam. Y pëkunapita imata yachakunqantsikta cuentata qokunapaqmi yanapakun (Romänus 15:4; 1 Corintius 10:6). Kë libruchöqa 14 grüpuman rakishqa  willakïkunam kan. Y cada grüpupa qallananchömi musyatsikun tsë grüpu willakïkunachö imakunapita yachatsikunqanta.

Wamrëkikuna kaptinqa, cada willakïta pëkunawan juntu leyiyë y dibüjukunapita llapëki parlakuriyë. Tsëpitaqa itsa leyiriyankiman tsë willakïta willakoq textukunata. Nïkurnin wamrëkikunata yanapë tsë textukuna willakunqampita imakunata yachakïta puëdiyanqanta cuentata qokuyänampaq. Jina mayorkunawan estudiarpis tsënöllam rurëta puëdintsik Bibliapa precisaq yachatsikïninkunata yachatsinapaq.

Alläpam munayä, alli shonquyoq jövinkuna y mayorkuna kë libruta leyirnin Bibliapita shumaq yachakuyänanta y yachakuyanqankuna kawëninkunachö yanapananta. Tsënöpa pëkunapis Jehoväta adorayänampaq y Jehoväpa familiampita kayänampaq.

Wawqikikuna y turikikuna,

Jehoväpa Testïgunkunata Pushaqkuna