Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 54 KAQ WILLAKÏ

Jehoväqa Jonaswan pacienciakurqanmi

Jehoväqa Jonaswan pacienciakurqanmi

Asiria nacionpa Nïnivi markanchö täraq nunakunaqa alläpa mana allikunata rurarmi kawakuyaq. Tsëmi Jehoväqa willakoqnin Jonasta kacharqan tsë nunakunata “cambiayänëkim” ninampaq. Peru Nïnivita ëwanampa rantinmi Jonasqa juk barcuman lloqarkur Tarsis nishqan markaman ëwar qallëkurqan.

Barcuwan karutana ëwëkäyaptinmi feyupa vientur y laqcheqsar qallëkurqan. Tsëmi barcuchö trabajaqkunaqa alläpa mantsakar diosninkunaman mañakuyarqan, y “¿imanirtaq kënö pasëkämantsik?” niyarqan. Tsënam Jonasqa kënö nirqan: “Noqapa culpämi. Jehoväta mana wiyakurmi escapar ëwakïkä. Tiempu altsakärinampaq lamarman jitarkayämë”. Peru manam tsëta rurëta munayarqantsu. Y kutin kutin niptinnam, pallarkur jitarkuyarqan. Tsëran tiempu altsakärirqan.

Jonasqa “wanurishaqchi” nirqanmi. Y mas y mas hundikëkarmi Jehoväman mañakurqan. Tsëmi Jehoväqa juk jatun pescäduta mandarqan mana wanutsishllapa entëruta ñoqtakurkunampaq. Tsë pescädupa pachanchö këkarmi Jonasqa Jehoväman kënö mañakurqan: “Kanampita patsëqa llapan mandamanqëkitam wiyakushaq”. Jehoväqa kima junaqmi pescädupa pachanchö katsirqan, nïkurmi tsaki patsaman jitaratsirqan.

Tsënömi Jehoväqa Jonasta salvarqan. Y tsëpitaqa, ¿mananaku Nïniviman ëwanan karqan? Jehoväqa yapëmi ëwanampaq nirqan, y tsë kaq kutichöqa ëwarqanmi. Y chärirqa llapan nunakunatam kënö nirqan:  “Kanampita 40 junaqtam Jehoväqa markëkikunata ushakätsinqa”. Tsënam Nïnivi nunakunaqa wiyakurnin cambiar qallëkuyarqan. Reyninkunam kënö nirqan: “Diosta rogakuyë y arrepentikuyë, tsëqa itsapis perdonëkamashwan”. Y arrepentikuyanqanta rikarmi Jehoväqa Nïnivi nunakunata ushakätsirqantsu.

Nïnivi nunakunata Jehovä mana ushakätsinqanta rikarmi Jonasqa alläpa cölerakurqan. Këman pensari: Jehoväqa pacienciawanmi Jonasta tratarqan y ankuparqanmi. Peru Jonasqa manam Nïnivi nunakunata ankuparqantsu. Tsëpa rantinmi tsë markapita yarqurir juk calabäzu plantapa jawanchö piñashqa tärarqan. Tsënö tëkaptinmi tsë planta tsakirirqan, tsëmi masraq piñakurqan. Peru Jehoväqa kënömi nirqan: “Qamqa Nïnivi nunakunapitapis masmi tsë plantata välitsinki. Noqaqa ankuparmi pëkunata ushakätsirqötsu”. Tsënö nirqa, ¿imata yachatsitataq Jehovä munarqan? Nïnivi nunakunaqa ima plantapitapis mas väleq kayanqantam.

“Jehoväqa [...] qamkunarëkurmi pacienciakïkan, porqui manam munantsu pipis ushakänanta; tsëpa rantinqa, llapankuna arrepentikuyänantam munan” (2 Pëdru 3:9).