Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 53 KAQ WILLAKÏ

Jehoiadäqa valienti nunam karqan

Jehoiadäqa valienti nunam karqan

Jezabelpam Atalïa jutiyoq wamran kapurqan, y mamäninnö mana väleqmi pëpis karqan. Judäpa reyninwanmi casakurqan. Y qowan wanukïkuptinmi wamranna gobernar qallarqan. Y pëpis wanukïkuptinmi kikinna Judäta gobernarqan. Y tsë cargupita pipis mana jorqanampaqmi, reypa llapan tsurinkunata y tsë carguta chaskita puëdeqkunata wanutsita tïrarqan. ¡Hasta willkankunatam wanutsirqan! Tsëmi pï më mantsayaq.

Mandakoq kaq sacerdöti Jehoiadäwan warmin Jehosëbaqa musyayarqanmi imëka mana allikunata Atalïa ruranqanta. Tsëmi kawëninkunatapis peligruman churar Atalïapa llullu willkan Jehoasta pakarätsiyarqan. Templuchömi qeshpitsikuyarqan.

Jehoas qanchis watayoq këkaptinmi guardiakunapa mandaqninkunata y levïtakunata Jehoiadä qayatsirqan. Y kënömi nirqan: “Templupa punkunman ëwayë. Y ama jaqiyëtsu pipis yëkamunanta”. Nïkurmi Judäpa reynin kanampaq Jehoaspa peqanman juk corönata churarqan. Tsënam nunakunaqa “¡reynintsik unë kawakutsun!” niyarqan.

Templuchö büllëkäyaqta wiyëkurmi reina Atalïaqa ëqipa ëwarqan. Y mushoq reyta rikëkurmi, “¡conträmi sharkuyashqa! ¡Conträmi sharkuyashqa!” nirqan. Tsënam guardiakunapa mandaqninkuna tsarïkurnin juk sitiuman apëkur wanuratsiyarqan. Atalïaqa mana allikunatam israelïtakunata yachatsirqan. ¿Y imataq tsëpitaqa pasakurqan?

Jehoiadäqa Jehoväwan juk conträtuta rurayänampaqmi Judä nunakunata yanaparqan. Tsëchömi Jehovällata adorayänampaq änikuyarqan. Jehoiadäqa Baalpa templunta y tukï imäginkunatam  ushakätsirqan. Nïkurmi sacerdötikunata y levïtakunata nirqan templuchö yapë trabajayänampaq, tsënöpa nunakuna Diosta adoraq tsëman ëwayänampaq. Jina guardiakunatam churarqan rakcha nunakuna templuman mana yëkuyänampaq. Nïkurmi Jehoiadäwan guardiakunapa mandaqninkuna Jehoasta gobernar täkunaman tätsiyarqan. Y Judä nunakunaqa alläpam kushikuyarqan. Malafë Atalïa wanushqana kaptinmi Jehovällatana sirwiyarqan y manana Baaltanatsu. ¿Ima ninkitaq? ¿Jehoiadäqa valientiku karqan? ¿Cuenta qokurqunkiku valienti karnin mëtsika nunakunata yanapanqanta?

“Cuerputa wanutsirpis kawëta ushakätsita mana puëdeq kaqkunataqa ama mantsayëtsu; tsëpa rantinqa, cuerputawan kawëta Gehënachö ushakätsita puëdeq kaqta mantsayë” (Mateu 10:28).