Josïasqa puwaq watayoq këkarmi Judäta gobernar qallarqan. Tsë witsanqa magiata rurar y imäginkunata adorarmi nunakuna kakuyaq. Y 16 watayoq këkarmi Josïasqa Jehoväta imanö adorana kanqanta musyëta munarqan. Tsëpitanam, 20 watayoq këkar imäginkunata y altarkunata entëru Judäpita ushakätsirqan. Y 26 watayoq këkarnam, Jehoväpa templunta altsatsinampaq imëkata alistarqan.

Mandakoq kaq sacerdöti Hilquïasmi templuchö taririrqan rölluchö qellqaraq Diospa leyninkunata. Itsachi tsëqa kikin Moises qellqanqan karqan. Tsë röllutaqa Josïasmanmi secretariun Safan apapurqan, nïkurmi sinchipa leyipurqan. Tsëchömi Josïasqa cuenta qokurirqan mëtsika unëna Jehoväta mana wiyakuyanqanta. Tsëmi Hilquïasta kënö nirqan: “Jehovätam alläpa piñatsirquntsik. Parlapäri imata ruranapaq kaqta willamänapaq”. Tsënam Jehoväqa Huldä jutiyoq willakoqnin warmita kënö nirqan: “Judä nunakunaqa jaqirayämashqam. Tsëmi pëkunata castigashaq, peru manam Josïas rey kanqan witsantsu, porqui pëqa humildi nunam”.

Tsëta wiyarirmi rey Josïasqa templuta ëwëkur Judä nunakunata qayatsirqan. Nïkurmi Jehoväpa leyninkunata sinchipa leyipurqan. Y Josïaswan Judä nunakunaqa llapan shonqunkunawan Jehoväta cäsukuyänampaqmi änikuyarqan.

Judä nunakunaqa atska watapam Pascua fiestata rurashqatsu kayarqan. Peru Leychöqa llapan watakuna rurayänampaqmi mandakoq.  Tsëmi Josïasqa Judä nunakunata kënö nirqan: “Jatun Pascua fiestatam Jehoväpaq rurashun”. Nïkurmi mëtsika ofrendakunata alistayänampaq y templuchö cantaqkuna kanampaq mandakurqan. Tsëpitam Pascua fiestata y nïkur Levadürannaq Tantata Mikuyänan fiestata qanchis junaqpa rurayarqan. Y tsënö Pascua fiestataqa Samuel kawanqan witsampitam rurashqatsu kayarqan. Josïasqa alläpam kuyaq Diospa leyninkunata. ¿Y qamtaqa? ¿Gustashunkiku Jehoväpita yachakï?

“Palabrëkiqa chakïpaq chiwchinömi y nänïpaq aktsinömi” (Salmus 119:105).