Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 48 KAQ WILLAKÏ

Juk viudapa wamranmi kawarimurqan

Juk viudapa wamranmi kawarimurqan

Alläpa usyanqan witsanmi Elïasta Jehovä kënö nirqan: “Sarepta markaman ëwë. Tsëchömi juk viuda pachëki qarashunki”. Tsënam, tsë markapa yëkunanman chärir yamtakur këkaqta juk viudata rikärirqan, y juk täza yakutam mañakurirqan. Y tsëta apamoq ëwëkaptinmi Elïasqa kënö nirqan: “Aksëqa kallëtsu, juk paki tantëkitawan qarëkallämë”. Tsënam viudaqa kënö nirqan: “Tantäqa manam kapamantsu, y manam imatapis qoynikita puëdïtsu. Juk aptë harinawan ichikllana aceitillam kapaman wamräpaqwan noqapaq imallatapis rurarinäpaq”. Elïasnam kënö nirqan: “Jehovämi nimashqa takshalla tantata noqapaq ruraramuptikiqa, tamya kutimunqan tiempuyaq aceitiki y harinëki mana ushakänampaq kaqta”.

Tsënam viudaqa wayinman ëwëkur Jehoväpa willakoqnin nunapaq tantan rurarapurqan. Y Jehovä ninqannöllam tsë viudapawan ollqu wamrampaqa usya witsan pasanqanyaq mikïninkuna pishirqantsu. Manam ni harinankuna ni aceitinkuna ushakarqantsu.

 Peru tsëpitaqa alläpa llakikïpaqmi pasakurqan. Tsë viudapa wamranmi alläpa qeshyakurkurqan y wanurirqan. Tsëmi imallatapis rurëkunampaq Elïasta rogakurqan. Elïasqa mamampa mellqanimpita wamrata tsarirkurmi wayipa altusninman aparqan, nïkurmi cäma jananman churarir kënö mañakurqan: “Rogakullaqmi Jehovä, kë wamrata kawënin qoykullë”. ¿Musyankiku Jehovä tsëta ruraptinqa imanir espantakïpaq kanampaq kaqta? Buënu, tsë witsanyaqqa manam pipis kawarishqaraqtsu karqan. Jinamampis tsë viudawan wamranqa manam israelïtatsu kayarqan.

Tsë wamraqa yapëmi shütar y kawar qallëkurqan. Tsënam Elïasqa viudata kënö nirqan: “¡Rikë! Wamrëki kawariramushqa”. Rikëkurqa alläpam kushikurqan y Elïastam kënö nirqan: “Kananmi sïqa musyari Diospa sirweqnin kanqëkita. Jehovä ninqanllatam qamqa parlanki, tsëmi parlanqëkiqa imëpis cumplikan”.

“Pensariyë cuervukunaman: pëkunaqa manam murukuyantsu ni segayantsu; [...] tsënö kaptimpis, Diosqa pacha juntatam katsin. ¿Manaku qamkunaqa pishqukunapitapis mas väleq kayanki?” (Lücas 12:24).