Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 44 KAQ WILLAKÏ

Jehoväpa templun

Jehoväpa templun

Israel nacionta gobernar qallanqan witsanmi, “¿imata qonaqtataq munanki?” nishpa Salomonta Jehovä tapurqan. Salomonqa kënömi nirqan: “Jövinllaran kä y manam yachäraqtsu imatapis alleq rurëta. Markëkita shumaq cuidanäpaq alli yachaqta tikrëkatsillämë”. Jehovänam kënö nirqan: “Yachaq këta mañamashqa kaptikim, pï mëpitapis mas yachaqta tikratsishqëki. Jina kapoqyoqmi kanki, y wiyakoq karqa alli unëmi kawakunki”.

Salomonqa templuta ruratsirmi qallëkurqan. Öruwan, pläta metalwan y shumaq rumikunawanmi ruratsirqan. Mas alli kaq materialkunatam utilizäyarqan. Tukï trabäju rurëta yachaq nunakuna y warmikunam waranqëpayan trabajayarqan. Y qanchis watallachömi ushariyarqan. Y Jehoväta entregayänan junaqmi ofrendakunata altarman churayarqan. Nïkurmi altar nöpanman qonqurikïkur Salomon kënö mañakurqan: “Jehovällä, qamqa këpitapis mas jatun y mas shumaq templuyoq kanëkipaqmi kanki. Peru adorayanqaqta y mañakïnïkunata chaskïkullë”. Y, ¿ima nirqantaq Jehoväqa? ¿Gustumpaqnöku templu karqan? ¿Chaskirqanku Salomon mañakunqanta? Salomon mañakur ushariptinllam ciëlupita nina urëkamur ofrendakunata usharirqan. Tsënömi Jehoväqa rikätsikurqan gustumpaqnö templu kanqanta. Y tsëta rikarmi israelïtakunaqa alläpa kushikuyarqan.

Alläpa yachaq kaptinmi rey Salomontaqa entëru Israelchö y karu markakunachöpis pï më reqiyaq. Problëmankunata altsëta yanapanampaqmi më tsëpita nunakuna ashiyaq. Sëbata gobernaq reinapis sasa tapukïkunawan probëta munarmi watukaq ëwarqan. Y Salomonta wiyarirmi kënö nirqan: “Qampaq niyämanqantaqa manam creirqätsu, peru kananqa niyämanqampitapis mas yachaq kanqëkitam cuentata qokü. Diosniki Jehoväqa alläpam bendicishurqunki”. Israel nacionchöqa shumaq y kushishqam nunakuna kawakuyaq. Peru ichikllachönam llapan cambiarinan karqan.

“¡Rikäyë!, Salomonpitapis mas precisaqmi këchö këkan” (Mateu 12:42).