Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 45 KAQ WILLAKÏ

Juk nacion ishkëman rurakärin

Juk nacion ishkëman rurakärin

Jehoväta Salomon adoranqan witsanqa shumaqmi Israel nacionchö kawakuyarqan. Peru Salomonqa imäginkunata adoraq juk nacion warmikunawanmi casakurqan. Y ichikllapa ichikllapam jukläya tikrakurirqan y imäginkunata adorar qallëkurqan. Tsëmi Jehoväqa piñarkurnin kënö nirqan: “Israel nacionta familiëkita qochirirmi, ishkë nacionman rurarishaq. Mas jatun kaq naciontam juk sirwishoqnikita qoykushaq, y familiëkiqa taksha kaq nacionllatanam gobernanqa”.

Tsënö ninqanta entiendiyänampaqmi kënö pasakunanta Jehovä permitirqan: Salomonpa Jeroboan jutiyoq sirweqninmi illashqa karqan, y nänichömi Diospa willakoqnin Ahïyawan tinkurirqan. Ahïyaqa aqshunanta chunka ishkëman rachirirmi Jeroboanta kënö nirqan: “Jehoväqa Israel nacionta Salomonpa familianta qochirirmi ishkë nacionman rurarinqa. Kë chunka ratashkunata quedatsikï, porqui chunka kastakunapa reyninmi kanki”. Tsëta musyarirmi rey Salomonqa alläpa piñakur Jeroboanta wanutsita tïrarqan. Tsëmi Jeroboanqa Egiptu nacionman escapakurqan. Salomon wanukïkuptinqa tsurin Rehoboamnam gobernarqan. Y Jeroboanqa peligru pasarishqana kanqanta rikarmi Israel nacionta kutikurqan.

 Israelchö respetashqa nunakunam Rehoboamta kënö niyarqan: “Nunakunata alli trataptikiqa, manam jaqiriyäshunkitsu”. Peru jövinllaraq amïgunkunaqa, “pëkunawanqa chukrum kanëki. Y masmi trabajatsinëki” niyarqanmi. Tsënam, pëkunata cäsur nunakunata mana allipa tratarqan. Tsëmi nunakunaqa contran churakäyarqan, y Jeroboantam churayarqan chunka kastakunapa reynin kanampaq. Tsë chunka kastakunatam Israel niyaq. Y ishkë kaq kastakunatanam Judä niyaq; pëkunallam Rehoboamta jaqiriyarqantsu. Tsënömi Israelchö chunka ishkë kastakuna rakikäriyarqan.

Jerusalenqa Rehoboam gobernanqan nacionpa mas precisaq markanmi karqan. Tsëmi Jeroboanqa munarqantsu nacionnimpita kaqkuna Jehoväta adoraq Jerusalenman ëwayänanta. Porqui Rehoboamman qaqäyänantam mantsarqan. Tsëmi örupita ishkë wishikunata (becërrukunata) ruraratsir kënö nirqan: “Jerusalenqa alläpa karum. Mejorqa këllachöna kë wishikunata adorayë”. Tsëmi pëta cäsukurnin Jehoväta yapë qonqariyarqan.

“Ama mana creikoqkunawan tsullan tsullan yügushqa kayëtsu. Porqui, ¿imanötaq alli kaqta rurëwan mana alli kaqta rurë juntu kayanman? [...] ¿O imachötaq juk creikoqwan juk mana creikoq igual kayan?” (2 Corintius 6:14, 15).