Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 49 KAQ WILLAKÏ

Mana alli reinam castïguta chaskirqan

Mana alli reinam castïguta chaskirqan

Rey Acabqa, Jezreel markachö këkaq wayimpa ventänampitam Nabot jutiyoq nunapa üvas chakranta imëpis rikapaq. Y alläpam munarqan tsë chakrata rantita. Peru Nabotqa manam rantikïta munarqantsu, porqui Jehoväpa leyninmi mandakoq teytankunapita chaskiyanqan herenciata mana rantikuyänampaq. ¿Y Acabqa respetarqanku Nabot decidinqanta? Manam. Antis alläpam piñakurqan. Tsëmi ni cuartumpita yarqïta ni mikïtapis munarqantsu.

Acabpa warminqa mana alli reina Jezabelmi karqan. Pëqa kënömi nirqan: “Qamqa Israelpa reyninmi kanki, y llapan munanqëkitam katsita puëdinki. Noqam tsë chakrata qampaq logramushaq”. Nïkurmi tsë markachö precisaq nunakunaman kënö cartakurqan: “‘Diospa contranmi parlashqa’ nishpa Nabot-ta tumpayë, y nïkurnin rumiwan tsampir wanutsiyë”. Tsënam tsë nunakunaqa Jezabel ninqannölla rurayarqan. Nïkurmi Jezabelqa Acabta kënö nirqan: “Nabotqa wanushqanam këkan. Kananqa puëdinkinam chakranta katsita”.

Jezabelqa manam Nabotllatatsu mana culpayoqta wanutsirqan. Jehoväta kuyaq nunakunataqa mëtsikaqtam wanutsirqan. Jinamampis imäginkunatam adoraq y imëka mana allikunatam ruraq. Peru Jehoväqa llapan ruranqantam rikëkarqan. Tsëqa, ¿imataraq Jezabelta rurarqan?

Acab wanunqampita juk tiemputam tsurin Jehoramna gobernar qallëkurqan. Y Jehoväqa Jehü jutiyoq nunatam mandarqan Jezabelta y familianta castiganampaq.

Jehüqa carrëtanman lloqarkurmi Jezabelta ashir Jezreel markaman ëwarqan. Tsënam Jehoramqa carrëtanman lloqarkur Jehüta parlapaq ëwarqan. Y nänichö tinkurirmi “¿amïgum kantsik aw?” nishpa tapurirqan. Peru Jehüqa kënömi nirqan: “¿Imanöraq amïgu kashwan mamäniki Jezabel imëka  mana allikunata rurakïkaptinqa?”. Tsënam Jehoramqa carrëtanta tumaratsir escapakur qallëkurqan, peru Jehüqa wanoqpaqmi flechëkurqan.

Nïkurmi Jehüqa Jezabel gobernanqan wayiman ëwarqan. Tsëta musyarirmi Jezabelqa pintapäkurir y naqtsapäkurir altusninchö këkaq ventänampa qawachakur këkarqan. Y chäriptinmi ashipëpa parlaparqan. Tsëmi Jehüqa Jezabelpa lädunchö këkaq sirwipakoqkunata “¡urëpa jitarkayämï!” nirqan. Tsënam, wanoqpaq jitarkuyarqan.

Tsëpitaqa Acabpa 70 wamrankunatam Jehüqa wanutsirqan, y Baalta adoraqkunata y adorayänampaq utilizäyanqankunatam ushakätsirqan. ¿Rikarqunkiku? Jehoväqa llapantam rikëkan, y mana allita ruraqkunataqa imë karpis castiganmi.

“Ërayëpa munarnin lograyanqan fortünaqa, manam bendiciontsu kanqa” (Proverbius 20:21).