Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 42 KAQ WILLAKÏ

Mana mantsakoq y mana jaqikoq Jonatan

Mana mantsakoq y mana jaqikoq Jonatan

Jonatanqa rey Saulpa mayor tsurinmi karqan, y cösam pelyëta yachaq. Tsëmi Davidqa, “pichakpitapis mas rasmi y leonpitapis mas kallpasapam” nirqan. Juk kutim juk jirka jananchö Filistëa soldädukuna këkäyarqan. Y rikëkurmi Jonatanqa armankunata puritseq soldäduta kënö nirqan: “Taqë Filistëa nunakunawanqa pelyashun juk señalta Jehovä qomashqaran. Tsë señalqa kanqa ‘witsäyämï’ nimanqantsikmi”. Filistëa nunakunaqa “¡pelyanapaq witsäyämï!” niyarqanmi. Tsëmi witsëkurnin 20 soldädukunata venciriyarqan.

Saul wanuriptinqa, mayor kaq tsurin Jonatanmi rey kanan karqan. Peru David rey kananta Jehovä munanqantam Jonatanqa musyarqan, y manam chikiparqantsu. Antis alli amïgum kayarqan. Y defendinakur y cuidanakur kayänampaqmi parlayarqan. Jonatanqa amïgu kayanqanta  rikätsirmi janan kaq röpanta, espädanta, flechakuna arcunta y wachakanta Davidta qarëkurqan.

Juk kutim Saulta mantsar David escapakunqan sitiuman Jonatan ëwarqan y kënö nirqan: “Sinchi y mana mantsakoqmi kanëki. Jehoväqa qamtam rey kanëkipaq akrashurqunki. Y tsëtaqa teytäpis alleqmi musyan”. Y qamqa, ¿munankimantsuraq Jonatannö amïguyoq këta?

Jonatanqa amïgun Davidrëkurmi atska kutichö kawëninta peligruman churarqan. Teytan wanutsita munanqanta musyarmi teytanta kënö nirqan: “Davidta wanutsirqa jatun jutsatam ruranki. Porqui pëqa manam ima mana allitapis rurashqatsu”. Tsënam Saulqa Jonatanwan alläpa piñakurqan. Juk ishkë watakuna pasariptinmi Saultawan Jonatantaqa juk guërrachö wanïkatsiyarqan.

Tsënam Davidqa Jonatanpa tsurin Mefiböset-ta ashirqan. Y taririrmi, “imëpis cuidashqëkim, porqui teytëkiwanmi alli amïgu kayarqä. Wayïchömi täranki y mikunqä mësachömi mikunki” nirqan. Awmi, Davidqa manam qonqëkurqantsu amïgun Jonatanta.

“Qamkunata noqa kuyayanqaqnöllam, qamkunapis jukniki juknikikuna kuyanakuyänëki. Manam ni pipis këpita mas kuyakoqqa kantsu: pipis amïgunkunarëkur kawëninta qoqpitaqa” (Juan 15:12, 13).