Mëtsika israelïtakunam imäginkunata yapë adorar qallëkuyarqan. Tsëmi Jehoväqa permitirqan llapan israelïtakunata Filistëa nunakuna sufritsiyänanta. Peru wakin israelïtakunaqa Jehovätam kuyayaq. Tsënö israelïtam Manöahwan warmimpis kayarqan. Pëkunapaqa manam wamrankuna kayäpurqantsu. Juk kutim juk angelta Jehovä kacharqan Manöahpa warminta kënö ninampaq: “Wamrëkim kapushunki, y pëmi Filistëa nunakunapita israelïtakunata salvanqa. Pëqa nazareum kanqa”. ¿Y pikunatataq nazareu nishpa reqiyaq? Tsënöqa reqiyaq Jehoväta jukläya sirweq nunakunatam. Pëkunaqa manam aqtsankunata rutukuyaqtsu.

Tiempu pasariptinmi Manöahpa wamran yuririrqan, y Sanson nirmi jutin churayarqan. Jatunna këkaptinmi kallpasapata Jehovä tikraratsirqan. ¡Leontapis fäcil-llam wanuratseq! Juk kutichömi Filistëapita 30 nunakunata japallan wanuratsirqan. Tsëmi Filistëa nunakunaqa chikiyaq, y imanö wanutsiyänampaq kaqmanmi pensayarqan. Juk kutim Gäza nishqan markaman chärir juk wayichö punïkarqan. Tsëmi waränin qoya yarqoqta wanuratsiyänampaq tsë markapa punkunchö shuyëkäyarqan. Peru Sansonqa pullan paqasmi shärikurirqan, y tsë markapa yëkunanman ëwëkurmi punkunta jorqarirqan. Nïkurnam, katarkur Hebron markapa amänun jirka jananman chäratsirqan.

Tsënam Filistëa nunakunaqa Sansonpa novian Dalïlata kënö niyarqan: “Sanson imanir kallpasapa kanqantam musyëta munayä. Tsëta willayämaptikiqa atska qellëtam pagayashqëki. Porqui tsarita y carcelman llawirkïtam munayä”. Tsënam Dalïlaqa qellëpaqrëkur pëkunata änirirqan. Sansonqa manam Dalïlata willarqantsu imanir kallpasapa kanqanta. Peru kutin kutin tapupaptinmi utirirqan y willëkurqan. Kënömi nirqan: “Nazareu karmi ni imëpis aqtsäta rutukurqötsu. Aqtsäta ruturayämuptinqa kallpämi ushakärinman”. ¿Sansonqa mana allitam rurarqan Dalïlata tsëta willar aw?

 Tsënam Dalïlaqa Filistëa nunakunata kënö nirqan: “¡Musyarishqänam imanir kallpasapa kanqanta!”. Nïkurmi Sansonta mellqaninchö punukäratsir aqtsanta ruturatsirqan. Tsëpitanam sinchipa kënö nirqan: “¡Sanson, Filistëa nunakunam yëkarayämushqa!”. Y riyarkurqa (rikcharkurqa) kallpan ushakärishqa kanqantam cuentata qokurirqan. Tsënam Filistëa nunakunaqa Sansonta tsaririr nawinta jorqarayäpurqan y carcelman llawiriyarqan.

Juk kutim, mëtsika Filistëa nunakuna Dagon nishqan diosninkunata adorayänampaq juk templuchö ëllukäyarqan. Y sinchipam kënö niyaq: “Diosnintsikmi Sansonta makintsikman churamushqa. Jorqarayämï juk rätu asikurinapaq”. Y ishkë columnakunapa chowpinman churëkurmi pëpita asikur kayarqan. Tsënam Sansonqa sinchipa kënö nirqan: “Jehovä Diosllä, juk kuti masllana kallpä qoykallämë”. Tsë witsampaqqa aqtsanqa winarishqanam karqan, tsëmi templupa ishkan columnankunata sinchipa kumëkurqan. Tsënam janankunaman juchurirqan y llapankunata ushakäratsirqan. Y tsëchömi Sansonpis wanurqan.

“Dios kallpata qomaptinmi imëkapaq kallpä kan” (Filipensis 4:13).