Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 30 KAQ WILLAKÏ

Rahabmi musyapakoqkunata pakarqan

Rahabmi musyapakoqkunata pakarqan

Musyapakoq ëwaq israelïtakunaqa Jericö markamanmi chäriyarqan, y Rahab jutiyoq warmipa wayinchömi quedakuyarqan. Tsëta musyarirmi Jericöpa reyninqa tsë wayiman soldädukunata kacharqan. Rahabqa tsë musyapakoqkunata wayimpa altusninman pakëkurmi, tsë soldädukunataqa nirqan juk sitiuta asheq ëwayänampaq. Nïkurnam Rahabqa tsë musyapakoqkunata kënö nirqan: “Musyämi qamkunataqa Jehovä yanapayäshunqëkita, y kë markaqa qamkunapa kanampaq kaqta, tsëmi qamkunata yanapëkäyaq. Peru familiäta salvayänëkipaq änïkayämë”.

Musyapakoqkunanam kënö niyarqan: “Ventänëkiman puka waskata wataptikiqa, manam ni imapis pasanqatsu wayiki rurinchö këkaqkunata. Tsënömi familiëki salvakunqa”.

Rahabqa wayin waqtampam tsë musyapakoqkunata juk waskapa bajatsirqan Jericöpita ëwakuyänampaq. Y tsë musyapakoqkunaqa jirkakunachö kima junaq karir-ran Josuëman kutiyarqan. Tsëpitaqa Jordan mayuta tsimparirmi israelïtakunaqa tsë markaman  yëkuyänampaq alistakuyarqan. Y tsë markatam puntata ushakätsiyänan karqan. Jehoväqa cada junaq tsë markapa jiruroqnin tumayänampaqmi nirqan. Y joqta junaqmi tsënö rurayarqan. Peru qanchis kaq junaqchöqa, qanchis kutim tumayarqan. Nïkurmi sacerdötikuna trompëtakunata waqatsiyarqan, y soldädukunam llapan kallpankunawan qapariyarqan. Tsënam, tsë markapa perqankuna juchurirqan. Peru Rahabpa wayinqa kikin perqachö këkarpis manam juchurqantsu. Rahabwan familianqa Jehoväman confiakushqa karmi salvakuyarqan.

“Rahabpis, musyapakoqkunata shumaq chaskirir juk nänipa kachanqanrëkur[mi] rurënimpita alli kaqta ruraqnö rikashqa karqan” (Santiägu 2:25).