Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 35 KAQ WILLAKÏ

Änaqa juk wamratam Diosta mañakurqan

Änaqa juk wamratam Diosta mañakurqan

Elcanäqa ishkë warmiyoq israelïtam karqan. Juknin warmimpam Äna jutin karqan, y juknimpanam, Peninä. Peru Änatam masqa kuyaq. Peninäpaqa atskam wamrankuna kapurqan, peru Änaqa qolloqmi kaq. Tsëmi Peninäqa Änapita burlakoq. Elcanäqa Jehoväta carpa wayinchö adorayänampaqmi Silöman wata wata familianta pushaq. Y juk kutim Änata alläpa llakishqata rikärirqan. Tsëmi kënö nirqan: “Ama waqëtsu Äna. Noqaqa lädïkichömi imëpis këkäshaq, y musyankim alläpa kuyanqaqta”.

Tsëpitanam Änaqa Diosman mañakoq japallan ëwarqan. Waqar waqarmi yanapëkunampaq Jehoväta rogakurqan. Kënömi nirqan: “Jehovä, wamrä këkunanta permitïkuptikiqa, llapan kawëninchö qamta sirwishunëkipaqmi qoykushqëki”.

Waqëkaqta y shiminlla kuyïkaqta rikëkurmi mandakoq kaq sacerdöti Elïqa machashqa këkanqanta pensarqan. Peru Änaqa kënömi nirqan: “Manam teytë. Manam machashqatsu këkä. Sinöqa alläpa llakishqa karmi Jehoväta parlapëkä”. Tsëran Elïqa pantanqanta cuentata qokurirqan y kënö nirqan: “Rogakunqëkita Jehovä qoykushï”. Tsënam Änaqa yamëna kutikurqan. Y manaraq juk wata cumpliptinmi wamran yuririrqan, y Samuel nirmi jutin churarqan. ¿Imaraq Änaqa kushikïkurqan aw?

 Änaqa yarparëkarqanllam Jehoväta äninqanta. Tsëmi Samuelta wasqirirlla Diospa carpa wayinman aparqan. Y kënömi Elïta nirqan: “Kë wamrayoq kanäpaqmi Jehoväta rogakurqä. Tsëmi pëta llapan kawëninchö sirwinampaq apëkämü”. Elcanäwan Änaqa mangasninnaq röpan aparkurmi wata wata Samuelta watukayaq. Tiempu pasariptinqa, Jehoväpa bendicionninwanmi Änapaqa kima (kimsa) ollqu wamrankuna y ishkë warmi wamrankuna kapurqan.

“Sïguiyë mañakurnin, y qoyäshunkim; sïguiyë ashirnin, y tariyankim” (Mateu 7:7).