Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 29 KAQ WILLAKÏ

Jehoväqa Josuëtam akrarqan

Jehoväqa Josuëtam akrarqan

Moisesqa mëtsika watanam Israelta dirigishqa, peru kananqa wanukunqanam. Jehoväqa kënömi nirqan: “Manam qamtsu Änikunqä Patsaman israelïtakunata yëkatsinki. Peru karullapitaqa tsë patsata rikärinkim”. Tsënam Moisesqa Jehoväta nirqan israelïtakunata cuidanampaq juk dirigentita akranampaq. Y Jehoväqa kënömi nirqan: “Josuëwan parlë y pëta akrashqa kanqäta willë”.

Moisesqa wanukunampaqna kaqtam israelïtakunata willarqan, y Josuëna Jehovä Änikunqan Patsaman pëkunata pushanampaq kaqtam nirqan. Y Josuëtam kënö nirqan: “Ama mantsakëtsu. Jehovämi yanapashunki”. Tsëpita wallka tiempullatam Moisesqa Nëbu nishqan jirkaman witsarqan. Y tsëpita patsëmi Jehoväqa rikätsirqan Abrahanta, Isaacta y Jacobta äninqan patsata. Y 120 watayoq këkarmi Moisesqa wanukurqan.

Jehoväqa kënömi Josuëta nirqan: “Jordan mayuta tsimpë y Canaanman yëkï. Noqaqa Moisesta yanapanqänöllam qamtapis yanapashqëki. Leynïkunata mana qonqashpa llapan junaqkuna leyi. Ama mantsakëtsu, kallpata tsari. Ëwë y llapan mandanqaqta rurë”.

 Josuëqa ishkë musyapakoqkunatam Jericö markaman kacharqan. Qateqnin willakïchömi tsëchö ima pasakunqanta yachakushun. Jericöman kutirirqa, Canaanman yëkuyänampaq allina kanqantam tsë musyapakoqkunaqa niyarqan. Waränin junaqnam Josuëqa israelïtakunata nirqan carpa wayinkunata ëllupakur alistakuyänampaq. Y puntataqa conträtu babul apaq sacerdötikunatam nirqan Jordan mayuman yëkuyänampaq. Tsë mayuqa juntam ëwëkarqan, peru sacerdötikuna chakinkunata churayanqan höram yaku tsakirirqan. Tsënam sacerdötikunaqa tsakishqa mayupa tsimpar qallëkuyarqan. Y pullanman chärirmi, llapan israelïtakuna tsimpar ushayanqanyaq tsëchö shäräyarqan. Pensari, tsë milagruta rikëkurqa, ¿yarpäriyarqantsuraq puka lamarchö Jehovä ruranqanta?

Mëtsika wata tsunyaqchö karirmi israelïtakunaqa Jehovä Änikunqan Patsaman yëkuriyarqan. Yëkurirqa puëdiyarqannam wayinkuna y markankuna rurëta. Jina murupakïta, üvaskunata plantëta y huertakunata rurëtapis. Tsë ëwëchöqa lichiwan mielmi abundu kaq.

“Jehoväqa imëpis pushashunkim y tsaki sitiukunachömi llapan wananqëkita qoshunki” (Isaïas 58:11).