Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

 25 KAQ WILLAKÏ

Diosta adorayänan carpa wayi

Diosta adorayänan carpa wayi

Sinaï jirkachömi Moisesta Jehovä nirqan juk carpa wayita rurayänampaq. Tsë precisaq carpa wayiqa israelïtakuna Diosta adorayänampaqmi kanan karqan. Y puritsinallam kanan karqan.

Jehoväqa kënömi nirqan: “Israelïtakunata nï, carpa wayi rurakänampaq puëdiyanqanwan yanapakuyänampaq”. Tsënam israelïtakunaqa öruta, pläta nishqan metalta, cobrita, alläpa shumaq rumikunata y aläjakunata apayarqan. Jina millwata, lïnu tëlata, animalkunapa qarankunata y maskunatam qoyarqan. Manam michatsu kayarqan, antis imëkatam apayarqan, tsëmi Moisesqa, “tsëllapaqnam. Amana mastaqa apayämïnatsu” nirqan.

Tukï oficiuyoq ollqukuna y warmikunam carpa rurëchö yanapakuyarqan. Jehovämi yanaparqan trabäjunkuna alli yarqunampaq. Putskar, awar y bordarmi yanapakuyarqan. Wakinnam örupita tukïta rurar, shumaq rumikunapita adornukunata rurar y qeruta llaqllar yanapakuyarqan.

Jehovä munanqantanömi tsë carpataqa rurayarqan. Tsëchö ishkë cuartukuna kanampaqmi chowpiman juk shumaq cortïnata churayarqan. Juk cuartupam Santu Sitiu jutin karqan, y juknimpanam, Alläpa Santu. Tsë Alläpa Santu nishqan cuartuchömi acacia qerupita y örupita rurashqa babul karqan, tsëtam conträtu babul nishpa reqiyarqan. Y Santu Sitiu nishqanchönam, örupita rurashqa candelabru, juk mësa y inciensu rupatsiyänan altar karqan. Patiuchönam, cobripita rurashqa pelor o payla, y jatun altar karqan. Israelïtakunaqa conträtu babulta rikärirmi  Diosta wiyakuyänampaq änikuyanqanta yarpäriyaq. ¿Musyankiku conträtu ima kanqanta? Tsëqa juk precisaq äninakïmi.

Jehoväqa Aarontawan tsurinkunatam akrarqan sacerdöti kayänampaq y tsë carpachö trabajayänampaq. Cuidar y Jehoväpaq ofrendakunata rurarmi trabajayaq. Y Alläpa Santu cuartumanqa Aaronllam yëkïta puëdeq. Watachö juk kutillam yëkoq, kikimpa jutsampita, familiampa jutsampita y israelïtakunapa jutsankunapita ofrendata qonampaq.

Israelïtakunaqa Egiptupita ëwakuyanqampita juk watatam tsë carpata rurar ushariyarqan. Y tsëpita patsëqa kayäpurqannam Jehoväta adorayänan sitiu.

Jehoväqa pukutëtam tsë carpapa jananchö yuritsirqan y carpachömi aktsinta chipapätsirqan. Tsënömi kushikunqanta rikätsikurqan. Tsëpitaqa, carpa jananta ëwaq pukutë pärarinqan sitiuchömi israelïtakunapis quedakuyaq. Peru pukutë pallarikaptinqa, yarquyänampaqna kaqtam musyayaq. Y tsë carpata shoqllirirmi pukutë qepanta ëwayaq.

“Tsënam gobernar täkunapita [...] sinchipa kënö neqta wiyarqä: ‘¡Rikë! Diospa carpa wayinmi nunakunawan këkan, pëmi pëkunawan täranqa, y pëkunam markan kayanqa. Y kikin Diosmi pëkunawan këkanqa’” (Revelacion 21:3).