Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 28 KAQ WILLAKÏ

Juk china ashnum parlarirqan

Juk china ashnum parlarirqan

Israelïtakunaqa cäsi 40 watam tsunyaqchö kayashqa. Y puëdeq markakunatam venciyashqa. Kananqa Jordan mayupa tsimpan Moab nacionpa juk jatun pampanchönam këkäyan. Y ichikllachönam Jehovä Änikunqan Patsaman yëkuriyanqa. Tsëmi Moabpa reynin Balacqa markankunata israelïtakuna qochiriyänanta mantsarqan. Tsënöpam Balaam jutiyoq nunata Moabman qayatsirqan israelïtakunata maldecinampaq, o juk parlakïchöqa, pëkunaman ima mana allipis ratëkunampaq sinchipa parlanampaq.

Peru Jehoväqa kënömi Balaamta nirqan: “Ama israelïtakunata maldecitsu”. Tsëmi Balaamqa munarqantsu Moabman ëwëta. Peru Moabpa reynin Balacqa yapëmi qayatsirqan, y imatapis munanqanta qonampaqmi änirqan. Peru Balaamqa manam munarqantsu. Tsënam Diosqa kënö nirqan: “Ëwë. Peru noqa ninqaqllata parlanki”.

Balaamqa china ashnunta montarkurmi ura lädupa këkaq Moabman ëwarqan. Y Jehovä michashqa këkaptimpis israelïtakunata maldecitam munarqan. Tsëmi Jehoväpa angelnin nänichö kima (kimsa) kuti yuripurqan. Balaamqa manam rikarqantsu, peru ashnunmi sïqa. Tsëmi punta kaq kutichöqa nänipita yaqäratsir juk chakraman yëkukïkurqan. Juk kaq kutichönam, näni kuchun perqaman laqakar Balaampa chakinta lapiratsirqan. Y ultimutanam, näniman jitakakïkurqan. Peru llapan kutichömi Balaamqa ashnunta maqar usharqan.

Tsënam Jehoväqa tsë ashnuta parlaratsirqan. “¿Imanirtaq maqamanki?” nirmi Balaamta tapurqan. Balaamnam kënö nirqan: “Upakunatanö imëkata ruramaptikim. Espädä kaptinqa kanan höram wanuratseqman”. Tsënam ashnunqa kënö nirqan: “Mëtsika watakunanam qamta puritseq. ¿Acäsu imëllapis kanannö rurarqoqku?”.

Tsënam Jehovä permitiptin Balaamqa angelta rikärirqan. Y angelqa kënömi nirqan: “Israelta maldiceq mana ëwanëkipaqtaq Jehoväqa  nishurqëki”. Y Balaamnam kënö nirqan: “Mana allitam rurarqö. Wayïtam kutikushaq”. Peru tsë angelqa kënömi nirqan: “Ëwëlla Moabta, peru Dios nishunqëkillata parlanki”.

¿Y Balaamqa yachakurqantsuraq? Manam. Antis kima kutim Israelta maldecita tïrarqan. Peru kiman kutichömi Jehoväqa bendicitsirqan. ¿Y imachötaq llapan usharqan? Israelïtakunaqa guërratam Moab nacionwan rurayarqan, y tsëchömi Balaamqa wanurqan. Pensari, llapan kutichö Jehoväta wiyakurqa, ¿allitachi ruranman karqan aw?

“Cuidakuyë imëkatapis ërayëpa munëpita, porqui pipapis imëkan kapuptimpis, kawëninqa manam imëkan kapunqampitatsu” (Lücas 12:15).