Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 26 KAQ WILLAKÏ

Chunka ishkë musyapakoqkuna

Chunka ishkë musyapakoqkuna

Israelïtakunaqa Sinaï jirkapita yarqurirmi Paran nishqan tsunyaq sitiupa pasayarqan, y Cades nishqan sitiumanmi chäriyarqan. Tsëchömi Moisesta Jehovä kënö nirqan: “Cada kastapita jukta akrëkur 12 nunakunata kachë Canaan nishqan sitiuman musyapakoq ëwayänampaq, porqui tsë sitiutam israelïtakunata qoshaq”. Tsënam Moisesqa 12 nunakunata akrarir kënö nirqan: “Canaanman ëwayë y musyapakayämï murunapaq tsë sitiu alli o mana alli kanqanta. Jina tsëchö nunakuna sinchi o dëbil kayanqanta, y carpakunachö o markakunachö täräyanqanta”. Tsënam tsë 12 musyapakoqkunaqa tsë sitiuman ëwayarqan, y tsë ëwaqkunachömi Josuëwan Calebpis kayarqan.

Tsë musyapakoqkunaqa 40 junaqtam kutiyarqan. Y hïguskunata, granadïllakunata y üvaskunatam chätsiyarqan, y kënömi niyarqan: “Canaan sitiuqa alli sitium, peru nunakunaqa alläpa mantsëpaqmi kayan, y markankunapis jatun perqakunayoqmi kayan”. Peru Calebqa kënömi nirqan: “¡Puëdishunmi vencita! ¡Aku ëwashun!”. ¿Imanirtaq Calebqa tsënö nirqan? Porqui pëwan Josuëqa Jehovämanmi confiakuyaq. Peru wakin kaq musyapakoqkunaqa kënömi niyarqan: “Ama ëwashuntsu. Tsëchö nunakunaqa mantsëpaq jatunmi kayan. Pëkunapa lädunkunachöqa pinteq kurukunanöllam kashun”.

Tsënam israelïtakunaqa ëwëta munayarqantsu, y quejakurmi kënö ninakuyarqan: “Juk pushakoqta akrashun y Egiptuman kutikushun.  ¿Imaqtaq Canaan sitiuman ëwashun? ¿Wanutsimänapaq?”. Peru Josuëwan Calebqa kënömi niyarqan: “Mas alliqa kanqa Jehoväta wiyakunqantsikmi. Pëqa tsapämäshunmi. Ama mantsayëtsu”. Peru israelïtakunaqa manam cäsuyarqantsu, antis wanuratsitam munayarqan.

Tsënam Jehoväqa Moisesta kënö nirqan: “Noqaqa imëkatam israelïtakunapaq rurarqö..., peru pëkunaqa mana wiyakurmi sïguiyan. Tsëmi wanuyänampaq 40 wata kë tsunyaqchö llapankunata jaqirishaq. Y wamrankuna, Josuë y Calebllam israelïtakunata äninqä sitiuman chäyanqa”.

“¿Imanirtaq alläpa mantsakäyanki markäkïnin pisheq nunakuna?” (Mateu 8:26).