Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 17 KAQ WILLAKÏ

Moisesqa Jehoväta sirwitam akrarqan

Moisesqa Jehoväta sirwitam akrarqan

Egiptuchö kawayanqan witsanmi Jacobpa familiankunataqa israelïtakuna nishpa reqir qallayarqan. Jacobwan Josë wanuriyaptinqa juk faraonnam gobernar qallëkurqan. Y israelïtakuna mirarnin Egiptu nunakunapita mas puëdeq tikrëkäyanqanta rikarmi mantsakarqan. Tsëmi esclävunkunaman tikraratsirqan. Ladrïllukunatam mälas ruratseq y chakrakunachömi alläpa trabajatseq. Peru alläpa mana alli tratëkaptimpis, israelïtakunaqa mirarmi sïguiyarqan. Tsëta mana gustarmi faraonqa mandakurqan tsëraq yuririshqa israelïta ollqu wamrakunata wanutsiyänampaq, peru warmi wamrakunataqa mana wanutsiyänampaqmi nirqan. Pensari, ¿imanöraq israelïtakuna sientikuyarqan?

Jokëbed jutishqa israelïta warmim juk shumaqllan llulluta qeshpikurqan. Tsëmi juk canastaman winarkurnin Nïlu mayuchö shoqush rurinman pakëkurqan. Y tsë llullupa panin Miriammi karullapita watiqar quedakurqan.

Tsënam faraonpa warmi wamran bañakoq chärir tsë canastata rikärirqan. Y waqëkaq  llulluta rikëkurmi kuyakurkurqan. Miriamnam kënö nirqan: “¿Munankiku chichir cuidapushunëkipaq juk warmita ashiramunäta?”. Y äniriptinmi, mamäninllata pusharirqan. Faraonpa wamranqa kënömi Jokëbedta nirqan: “Kë wamrata apakï y cuidapamë, pagashqëkim”.

Winarkuptinqa Jokëbedqa faraonpa wamrantam kutïkatsirqan. Tsënam Moises nishpa jutin churarqan y kikimpa wamrantanö wätakurqan. Moisesqa reypa wamran cuentam karqan y imëka jananchömi winarqan. Peru Jehovätaqa manam imëpis qonqarqantsu. Moisesqa musyarqanmi israelïta kasta kanqanta, tsëmi Jehoväta sirwita akrarqan.

Tsëpitanam, 40 watayoq këkarnin Moisesqa marka mayinkunata yanapanampaq decidirqan. Juk kutim juk israelïtata Egiptu nuna maqakïkaqta rikëkurqan. Tsënam Moisesqa wanunqanyaq maqëkurnin arënaman pampëkurqan. Tsëta musyarirmi faraonqa Moisesta wanuratsita munarqan, peru pëqa Madianmanmi escapar ëwakurqan. Y tsëchöqa Jehovämi cuidarqan.

“Markäkurmi Moisesqa [...] Egiptupa reynimpa warmi wamrampa wamrannö reqishqa këta munarqantsu, [...] Diospa markanwan allqutsashqa këta[m] akrarqan” (Hebrëus 11:24, 25).