Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 16 KAQ WILLAKÏ

¿Pitaq Jobqa karqan?

¿Pitaq Jobqa karqan?

Uz nishqan sitiuchömi Jehoväta adoraq juk nuna tärarqan. Jutinqa Jobmi karqan, y alläpa kapoqyoq y jatun familiayoqmi kaq. Jinamampis alläpa alli nunam karqan, porqui waktsakunata, viudakunata y papäninnaq y mamäninnaq wamrakunatam yanapaq. Peru ¿ima ninkitaq? Alli nuna këkarqa, ¿problëmannaqtsuraq kawakurqan?

Diabluqa mana mäkatsishllapam Jobta rikarëkarqan. Juk kutim Satanasta Jehovä kënö nirqan: “¿Rikarqunkiku sirwimaqnï Jobta? Patsachöqa manam pipis pënöqa kantsu. Pëqa wiyakunmi y allim portakun”. Satanasnam kënö nirqan: “Pëqa cuidaptiki, bendiciptiki, chakrankuna y animalninkuna qoptikillam cäsushunki. . . Peru maski llapanta qochirïkï, tsëqa mananam adorashunkinatsu”. Jehovänam kënö nirqan: “Mä pruëbaman churari, peru ama wanutsinkitsu”. Pensari, ¿imanirtaq Jehoväqa permitirqan Jobta Satanas probananta? Imapa pasarpis wiyakoq kanampaq kaqta musyarmi.

Satanasqa imëka mana allikunawanmi Jobta probarqan. Puntataqa sabeukuna niyanqan nunakunatam utilizarqan wäkankunata, törunkunata y ashnunkunata suwayänampaq. Tsëpitanam llapan üshankunata ninawan ushakäratsirqan. Nïkurnam, juk grüpu Caldëa nunakuna camëllunkunata suwar apakuyarqan. Jina animalninkunata mitseqkunapis wanuyarqanmi. Peru mas jatun desgraciaqa tsëpitaran pasakurqan: mikur juntarëkäyanqan wayi juchuptinmi llapan wamrankuna wanuyarqan. Jobqa alläpa llakikurmi waqarqan, peru Jehoväta adorëtaqa manam jaqirirqantsu.

Satanasqa Job masraq sufrinantam munarqan, tsëmi entëru cuerpunchö qerita yuritsirqan.  Y alläpam nanaq. Jobqa manam musyarqantsu imanir mana allikunapa pasanqanta, peru Jehoväta adorëtaqa manam jaqirirqantsu. Tsëta rikarmi Jehoväqa alläpa kushikurqan.

Tsëpitaqa Jobta probar sïguinampaqmi kimaq nunakunata Satanas kacharqan. Pëkunam Jobta kënö niyarqan: “Jutsata rurëkurmi qamqa pakëta munëkanki. Tsëmi Diosqa castiguëkäshunki”. Jobqa, “noqaqa manam ni ima mana allitapis rurarqötsu” nirqanmi. Peru tiempu pasariptinqa, pruëbakunapa Jehovä pasëkätsinqantam pensarirqan, y mana culpanchö sufrikätsinqantam nirqan.

Elihü jutiyoq jövinmi pëkuna parlayanqanta upälla wiyëkarqan. Peru parlëtam munarirqan, y kënömi nirqan: “Qamkunaqa llapëkim mana alli këkäyanki. Jehoväqa noqantsik pensanqantsikpitapis mas puëdeqmi, pëqa manachi ni imëpis mana allitaqa ruranmantsu. Pëqa llapantam rikëkan, y problëmakunapa pasaqkunataqa yanapanmi”.

Jina Jehoväpis parlaparqanmi. Kënömi nirqan: “¿Mëchötaq karqëki ciëluta y patsata ruranqä witsan? ¿Imanirtaq mana allita ruranqäta pensanki? Imatapis mana alleq musyëkarmi qamqa parlëkanki”. Tsënam Jobqa cuentata qokurirqan mana allita pensanqanta. Y kënömi nirqan: “Mana allitam pensarqö. Parlanqäpita perdonëkamë. Qampaqqa parlayaqtam wiyarqä, peru kananqa rasumpam reqeq y imëkatapis puëdinqëkitam cuentata qokü”.

Pruëbakuna pasariptinllam Jehoväqa Jobta kachakäratsirqan, y punta kapunqampita mastam imëkatapis qorqan. Jobqa unëran kushishqa kawakurqan. Sasa pruëbakunachö këkarpis wiyakoq kanqampitam Jehoväqa Jobta bendicirqan. ¿Y qamqa? ¿Jobnötsuraq kanki? ¿Ima pasakuptimpis sïguinkitsuraq Jehoväta adorarnin?

“Qamkunaqa wiyayarqunkim Job imanö alli tsarakunqanta, y rikäyarqunkim pëpaq Jehovä imata ruranqanta” (Santiägu 5:11).