Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 13 KAQ WILLAKÏ

Jacobwan Esaüqa amishtayarqanmi

Jacobwan Esaüqa amishtayarqanmi

Jehoväqa Abrahanta y Isaacta cuidanqannölla pëtapis cuidanampaqmi Jacobta änirqan. Jacobqa Haran nishqan sitiuchömi patsakarqan. Tsëchömi casakurqan y mëtsika wamrayoq tikrarqan. Jina kapoqyoqmi tikrarqan.

Tiempu pasariptinqa, Jehoväqa, “teytëkikunapa markanman kutikï” nirqanmi Jacobta. Tsëmi Jacobwan familianqa viajar qallëkuyarqan. Y nänita ëwëkäyaptinmi puntata ëwaq sirweqninkuna pëman kutirir kënö niyarqan: “Wawqiki Esaümi 400 nunakunawan shamïkan”. Tsënam Jacobqa pëtawan familianta ima mana allipis pasëkunanta mantsarqan. Tsëmi, “wawqïpita salvëkallämë” nishpa Jehoväman mañakurqan. Y waränin junaqqa, Esaüpaqmi qarënin apatsirqan: mëtsika üshakunata, chiwakunata, wäkakunata, camëllukunata y ashnukunata.

Tsë paqasmi Jacobqa japallan këkar juk angelta rikärirqan. Y tsë angelqa pëwan sinchipa tsaränakurmi qallëkurqan. Y patsa waranqanyaqmi tsënö kayarqan. Y nanatsikïkarpis Jacobqa tsarakurmi sïguirqan. Tsënam angelqa, “kachëkamë, ëwakunänam” nirqan. Peru Jacobqa kënömi nirqan: “Manam. Bendicimaptikiran kachashqëki”.

Tsënam angelqa Jacobta bendicirirqan. Tsënömi Jacobqa musyarqan wawqin Esaü imatapis rurananta Jehovä mana permitinampaq kaqta.

Waränin junaqqa 400 nunakunawan Esaü shamïkaqtam Jacobqa rikärirqan. Tsëmi familiampa puntanta ëwarqan  Esaüwan tinkuyänampaq, y rikëkurmi frentinchö qanchis kuti puktirqan. Tsënam Esaüqa ëqipa ëwarnin Jacobta waqukurkurqan (makallakurkurqan). Ishkanmi waqayarqan y amishtayarqan. Pensari, ¿Jehoväta gustarqantsuraq Jacob ruranqan?

Tsëpitaqa Esaüqa wayintam kutikurqan, y Jacobnam, viajar sïguirqan. Jacobqa 12 tsuriyoqmi karqan. Këmi jutinkuna karqan: Ruben, Simeon, Levï, Judä, Dan, Neftalï, Gad, Aser, Isacar, Zabulon, Josë y Benjamin. Tiempu pasariptinqa, Josëwanmi Jehoväqa markanta salvarqan. ¿Musyëta munankiku imanö salvanqanta? Tsëtam rikärishun.

“Chikiyäshoqnikikunata kuyarnin sïguiyë, y chikiyäshurniki sufritsiyäshoqnikikunapaq mañakuyë, tsënömi rikätsikuyanki ciëluchö këkaq Teytëkikunapa tsurinkuna kayanqëkita” (Mateu 5:44, 45).