Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 6 KAQ WILLAKÏ

Puwaqllam mushoq patsaman chäyarqan

Puwaqllam mushoq patsaman chäyarqan

Noëqa familianwan y animalkunawanmi arcaman yëkuyarqan. Y punkuta Jehovä wichqariptinmi tamyar qallëkurqan. Alläpa tamyaptinmi arcaqa yakuwan pallarikar qallëkurqan. Y ichikllapa ichikllapam patsata yaku tsaparirqan. Mana alli nunakunaqa manam arcaman yëkuyarqantsu, tsëmi llapankuna wanuyarqan. Peru Noëtawan familiantaqa manam ni imapis pasarqantsu. Pensari, ¡imanö kushishqaraq sientikuyarqan Jehoväta wiyakuyanqampita!

Alläpam tamyarqan. Y 40 junaq y 40 paqastaran pärarqan. Nïkurmi ichikllapa ichikllapa yaku wallkarqan. Y arcaqa juk jirka jananchömi quedarirqan. Peru waqtachöqa mëtsikaran yaku quedarqan, tsëmi Noëwan familianqa juk tiempuraq arcachö quedakuyarqan.

Peru junaqkuna pasanqanmannömi yakuqa tsakirirqan. Tamyar qallanqampita patsëqa juk watapitapis masran Noëwan familianqa arca rurinchö kayarqan. Tsëpitaran Jehoväqa nirqan arcapita yarquyänampaq. ¡Patsachöqa llapanmi mushoqnöna rikakurqan! Pëkunaqa alläpam kushikuyarqan Jehovä salvanqampita, tsëmi juk ofrendata rurayarqan.

Jehovätaqa alläpam tsë ofrenda gustarqan, tsëmi änikurqan tsënö apäkï tamyawanqa patsachö llapan kaqkunata manana imëpis ushakätsinampaq. Tsë änikunqanta nunakuna yarpäyänampaqmi juk turmanyëta yarqutsirqan. Y qamqa, ¿imëllapis juk turmanyëta rikarqunkiku?

Jinamampis wamrankuna kayäpunampaq y patsa juntanqanyaq mirayänampaqmi Jehoväqa Noëta y familianta nirqan.

“Hasta arcaman Noë yëkunqan junaqyaq, y manam wiyakuyarqantsu hasta Apäkï Tamya shamur llapankunata ushakäratsinqanyaq” (Mateu 24:38, 39).