Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 5 KAQ WILLAKÏ

Noëqa juk arcatam rurarqan

Noëqa juk arcatam rurarqan

Tiempu pasariptinqa mëtsika nunakunam patsachö kawayarqan. Peru cäsi llapanmi mana alli kayaq. Hasta wakin angelkunapis mana allim tikrakuriyarqan. Ciëluta jaqirïkurmi patsaman shayämurqan. ¿Musyankiku imaq shayämunqanta? Nunakunanö tikrayänampaq y warmikunawan casakuyänampaqmi.

Tsë warmikunachömi tsë angelkunapa wamrankuna yuriyarqan. Y jatunyärirqa alläpa kallpasapa y lïsum tsë wamrakunaqa kayaq. Y alläpam nunakunata sufritsiyaq. Peru Jehoväqa manam rikaräkurqantsu. Tsëmi llapan mana alli nunakunata Apäkï Tamyawan ushakätsinampaq decidirqan.

Peru juk nunaqa llapankunapita jukläyam karqan. Pëqa Jehovätam kuyaq. Jutinqa Noëmi karqan. Pëwan warminqa kima (kimsa) wamrayoqmi kayarqan. Sem, Cam y Jafetmi jutinkuna karqan. Y kimanmi warmiyoq kayaq. Jehoväqa juk arcata ruranampaqmi Noëta mandarqan, tsënöpa Apäkï Tamya chaptin pëwan familian tsëchö salvakuyänampaq. Tsë arcaqa qerupita rurashqa jatun cäjam karqan, y manam yakuchö hundikarqantsu. Jinamampis mëtsika animalkunata tsëman yëkatsinampaqmi Jehoväqa Noëta mandarqan, tsënöpa salvakuyänampaq.

Noëqa jinan höram tsë arcata rurar qallëkurqan. Familianwan yanapanakurmi 50 wata rurinta ushayarqan. Y Jehovä ninqannöllam rurayarqan. Tsë tiempuchömi Noëqa Apäkï Tamya kanampaq kaqta nunakunata willarqan, peru manam pipis creirqantsu.

Tsëpitaqa arcaman yëkuyänan tiempum chärirqan. ¿Musyëta munankiku tsëpita ima pasakunqanta?

“Imanömi Noëpa tiempunchö pasakurqan, tsënöllam nunapa Tsurin këkämunqan witsampis pasakunqa” (Mateu 24:37).