Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 100 KAQ WILLAKÏ

Pabluwan Timoteu

Pabluwan Timoteu

Timoteuqa Listra congregacionchö Jehoväta sirweq jövinmi karqan. Teytanqa Grecia nunam karqan, y mamäninnam, judïa warmi karqan. Mamänimpa jutinqa Eunïcim karqan, y awilampanam, Loida. Y ishkanmi llullu kanqampita Jehoväpita yachatsiyarqan.

Ishkë kaq viäjinchö Listraman yapë chanqanchömi Pabluqa cuentata qokurqan Timoteuqa creikoq mayinkunata rasumpa kuyanqanta y yanapëta procuranqanta. Tsëmi Timoteuta nirqan viäjinchö yanaqänampaq. Nïkurmi ichikllapa ichikllapa yanaparqan alli yachatsikoq kanampaq y Diospa alli willakïninkunata musyatsikunampaq.

Pablutawan Timoteutaqa mëta ëwayänampaqpis santu espïritum dirigeq. Juk ampim juk visionchö Pablu rikarqan juk nuna, “yanapayämaq Macedoniaman shamï” neqta. Tsëmi Pabluqa Timoteuwan, Sïlaswan y Lücaswan ëwayarqan tsëchö yachatsikuyänampaq y congregacionkunata patsätsiyänampaq.

Tesalönicachö këkaq Macedonia markachöqa mëtsika ollqukuna y warmikunam creikoq tikrayarqan. Tsëmi wakin judïu nunakunaqa Pablutawan yanaqinkunata chikipäyarqan. Y tsë markachö gobernadorkunamanmi wakin creikoqkunata qarachëpa apayarqan. Nïkurmi, “¡kë nunakunaqa Römata gobernaqpa contranmi kayan!” nirnin büllayarqan. Y Pablutawan Timoteutam wanutsita munayarqan, tsëmi ampillapa Berëa markaman ishkan escapakuyarqan.

Berëa nunakunaqa kushishqam wiyakuyarqan Diospa alli willakïninkunata, y mëtsikaq Grecia nunakuna y judïukunam creikoq tikrayarqan. Peru Tesalönicachö täraq wakin judïukunaqa tsëmampis problëmata ruraqmi chäkïkuyarqan. Tsëmi Pabluqa Atënasta ëwakurqan. Peru Timoteuwan Sïlasqa tsë markachömi quedakuyarqan creikoq mayinkunata yanaparnin. Y tiempu pasariptinqa Pabluqa yapëmi Tesalönicaman Timoteuta kacharqan, porqui tsëchö creikoqkunaqa chikir sufritsiyaptinmi  pipis yanapananta wanayarqan. Tsëpitaqa mas congregacionkunamanmi Pabluqa creikoqkunata valorta qonampaq Timoteuta kacharqan.

Pabluqa kënömi Timoteuta nirqan: “Diosta sirwita munaqkunaqa, chikishqa y sufritsishqam kayanqa”. Y tsënömi pasakurqan, kikin Timoteutapis chikirmi sufritsiyarqan y carcelarmi ushayarqan. Peru pëqa kushishqam sientikurqan, porqui tsëchömi rikätsikurqan Jehoväta rasumpa kuyanqanta.

Pabluqa kënömi Filïpuschö creikoqkunata nirqan: “Timoteutam qamkunaman kachamushaq. Pëmi yachatsiyäshunki rasumpa kaq yachatsikïkunata wiyakur sïguiyänëkipaq y imanö yachatsikuyänëkipaq kaqta”. Pabluqa alläpam Timoteuman confiakoq. Mëtsika watapam ishkankuna juntu Diosta sirwiyarqan, y alli amïgum kayarqan.

“Pënö yanapakïta munaqqa manam pipis kantsu, pëqa shonqupita patsëmi qamkunapa biennikikunapaq yarpachakun. Porqui wakinkunaqa llapampis kikinkunapa bienninkunallatam ashiyan, y manam Jesucristupa kaqtatsu” (Filipensis 2:20, 21).