Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 94 KAQ WILLAKÏ

Santu espïritutam chaskiyarqan

Santu espïritutam chaskiyarqan

Jesus ciëluta kutikunqampita chunka junaqllatam qateqninkunaqa santu espïrituta chaskiriyarqan. Tsëqa pasakurqan 33 wata Pentecostes fiestachömi. Tsë junaqqa më tsëpita nunakunam tsë fiestata celebrar Jerusalenchö këkäyarqan. Peru Jesuspa cientu veintinö qateqninkunaqa juk wayipa altusninchö këkaq cuartuchömi këkäyarqan, y illaqpitam mana creipaqnö pasakurqan. Rawrëkaq ninanö llapankunapa peqankunachö yuririptinmi, tukïläya idiömakunachö parlar qallëkuyarqan. Nïkurmi entëru wayichö vientu sinchipa pükaqnö wiyakarqan.

Juk nacionkunapita Jerusalenman ëwaq nunakunaqa, tsë büllata wiyarirmi ima pasakunqanta rikaq tsë wayiman ëwayarqan. Y Jesuspa qateqninkuna tukïläya idiömakunachö parlayaptinmi espantakuyarqan. Tsëmi, “¿imanirtaq kë nunakunaqa Galilëapita këkarnin idiömantsikchö parlapämantsik?” niyarqan.

Pëdruwan apostol mayinkunam nunakunapa puntanman shäkuriyarqan. Y Pëdrum kënö nirqan: “Qamkunam Jesusta wanutsiyarqunki, peru Jehoväqa kawaritsishqam. Kananqa ciëluchö  Diospa derëcha kaq lädunchönam këkan. Y änikunqan santu espïritutam qoyämashqa. Tsëmi kë milagruta rikëkäyanki y wiyëkäyanki”.

Tsënam llapan nunakuna upälla quedariyarqan. Porqui Pëdru ninqanmi shonqunkunaman chärirqan. Tsëmi, “¿imatataq rurayänä?” niyarqan. Pëdruqa kënömi nirqan: “Jutsëkikunapita arrepentikuyë y Jesuspa jutinchö bautizakuyë. Tsëqa qamkunapis santu espïritutam chaskiyanki”. Y tsë junaqqa 3.000 nunakunam bautizakuyarqan. Tsëpita patsëmi Jesusman creikoqkuna Jerusalenchö mirar qallëkuyarqan. Y apostolkunaqa santu espïritupa yanapakïninwanmi atska congregacionkunata patsätsiyarqan. Tsënömi Jesus mandakunqankunata llapan creikoqkunata yachatsiyarqan.

“Jesus Señor kanqanta nunakuna jananchö shimikiwan musyatsikurqa, y wanushqakunapita Dios sharkatsimushqa kanqanta shonqïkichö markäkurqa, salvashqam kanki” (Romänus 10:9).