Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 99 KAQ WILLAKÏ

Carcel täpaq nunam Diospita yachakurirqan

Carcel täpaq nunam Diospita yachakurirqan

Filïpus markachömi, supë yanapaptin juk sirwipakoq shipash imakuna pasakunampaq kaqta tantiyaq. Tsënömi patronninkunata mëtsika qellëta ganatseq. Y tsë markaman Pabluwan Sïlas chäriyaptinmi, atska junaqkunapa qepankunachö purirqan. Y supë parlatsiptinmi, “kë nunakunaqa Llapampa Janampa Këkaq Diospa sirweqninkunam kayan” neq. Tsënam Pabluqa, “¡Jesuspa jutinchömi pëpita yarqunëkipaq mandaq!” nirqan. Y tsë supëqa jinan höram tsë shipashpita yarqurirqan.

Tsë shipashpa patronninkunaqa qellëta manana ganayänampaq kaqta cuentata qokurirmi alläpa piñakuyarqan. Y mas precisaq autoridäkunamanmi Pablutawan Sïlasta qarachëpa apayarqan. Nïkurmi, “¡kë nunakunaqa markantsik nunakunapa yamë këninkunatam chipyëpa ushakëkätsiyan!” niyarqan. Tsënam tsë autoridäkunaqa mandakuyarqan Pablutawan Sïlasta alli buënu maqëkur carcelman llawiriyänampaq. Y carcel täpaq nunaqa mas ruri kaq y mas ampiraq sitiumanmi llawirirqan. Jinamampis, cëpu nishqanwanmi makinkunata y chakinkunata amutsirqan.

Pabluwan Sïlasqa carcelarëkarpis cantarmi Jehoväta alabayarqan, y llapan prësukunam wiyayarqan. Y pullan paqasmi illaqpita patsa feyupa kuyïkurqan. Tsëmi punkukuna kichakärirqan, cadënakuna kachakärirqan y cëpu nishqampis kichakärirqan. Tsënam carcel täpaq nunaqa mas ruri kaq sitiuyaq ëqipa ëwarqan. Y punkukuna kicharëkaqta rikëkurmi, llapan prësukuna escapakushqa kayanqanta pensar, juk espädata tsarïkur kikin wanutsikurita munarqan.

Tsë höram Pabluqa sinchipa kënö nirqan: “¡Ama ni imatapis rurakïtsu! ¡Llapäkunam këchö këkäyä!”. Tsënam carcel täpaqqa Pabluman y Sïlasman ëqïkur puntankunaman qonqurikïkurqan. Nïkurmi, “¿imatataq ruranä salvakunäpaq?” nirqan. Pëkunanam, “qam y familiëkim Jesusman creikuyänëki” niyarqan. Nïkurmi Pabluwan Sïlasqa Jehovä mandakunqankunata yachatsiyarqan. Tsënam carcel täpaqqa llapan wayimpita kaqkunawan bautizakurqan.

“Tsëkuna manaraq pasakuptinmi, tsariyäshunki y chikir sufritsiyäshunki, Diosta adorayänan wayikunaman juzgayäshunëkipaq apayäshurniki y carcelayäshurniki. Qamkunaqa reykunaman y gobernadorkunamanmi jutïrëkur apashqa kayanki. Tsënöpam jukkunatapis musyatsiyanki” (Lücas 21:12, 13).