Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 93 KAQ WILLAKÏ

Jesusqa ciëlutam kutikurqan

Jesusqa ciëlutam kutikurqan

Jesusqa Galilëachömi qateqninkunawan juntakarqan. Y kënö nishpam pëkunata mandarqan: “Ëwayë y qatimaqnïkuna tikrayänampaq llapan nacionkunapita nunakunata yachatsiyë. Y llapan mandayanqaqkunata yacharatsir bautizatsiyë”. Nïkurmi, “yarpäyë, noqaqa qamkunawanmi imëpis këkäshaq” nirqan.

Kawaririrqa 40 junaqpam Jesusqa Galilëachö y Jerusalenchö mëtsika qateqninkunata yuripurqan. Imëkatam shumaq yachatsirqan, y atska milagrukunatam rurarqan. Nïkurmi juk kuti masllana apostolninkunawan Olïvus jirkachö juntakäyarqan. Jesusqa kënömi nishqa karqan: “Ama Jerusalenpita ëwakuyankitsu. Antis Teyta äniyäshunqëkita shuyarnin sïguiyanki”.

Peru apostolninkunaqa manam entiendishqatsu kayarqan imanir tsënö ninqanta, tsëmi, “¿qallamunkinaku Israelta gobernarnin?” niyarqan. Tsënam Jesusqa kënö nirqan: “Jehoväqa manam munanraqtsu gobernar qallanäta, peru manam alläpanatsu pishin santu espïritu shamur poderta qoyäshunëkipaq, y testïgükuna kayänëkipaq. Tsëmi niyaq, ëwayë y Jerusalenchö, Judëachö, Samariachö y mas karu sitiukunachö willakuyë”.

Nïkurmi Jesusqa ciëluman witsar qallëkurqan, y juk pukutëmi tsaparirqan. Qateqninkuna ñukirkur rikarëkäyaptinmi illakärirqan.

Jesuspa qateqninkunaqa Jerusalenmanmi Olïvus jirkapita kutikuyarqan. Tsëchömi juk wayipa altusninchö këkaq cuartuchö imëpis ëllukäyaq y Diosman mañakuyaq. Y imakunata rurayänampaq kaqta Jesus musyatsinantam shuyaräyarqan.

“Llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa” (Mateu 24:14).