Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 87 KAQ WILLAKÏ

Jesuspa ultimu cënan

Jesuspa ultimu cënan

Judïukunaqa wata watam 14 de nisan junaq Pascua fiestata celebrayaq. Tsënömi yarpäyaq Egiptuchö esclävu kayanqampita Jehovä libranqanta y Änikunqan Patsaman chätsinqanta. Jesuswan apostolninkunapis 33 watachömi Jerusalenchö juk wayipa altusninchö tsë Pascua fiestata celebrayarqan. Y cenar ushariyaptinmi Jesusqa, “juknikim traicionayämanki” nirqan. Y apostolninkunaqa mantsakarmi, “¿mëqäkunaraq?” niyarqan. Tsënam Jesusqa, “kë pakipi tantata qonqä kaqmi” nirqan. Y tsënö nirirmi Jüdas Iscariötita qorirqan. Tsënam Jüdasqa jinan höra sharkur ëwakurqan.

Tsëpitaqa Diosman mañakurirmi Jesusqa juk tantata pakirir 11 apostolninkunata qorqan. Y, “kë tantata mikuyë. Porqui qamkunarëkur entreganäpaq kaq cuerpü cuentam” nirqanmi. Jina tsënöllam vïnuwampis rurarqan. Mañakurirmi apostolninkunata qorqan, y kënömi nirqan: “Kë vïnuta upuyë. Porqui jutsëkikunapita perdonashqa kayänëkipaq entreganäpaq kaq yawarnï cuentam. Ciëluchö juntu gobernanapaqmi qamkunata äniyaq. Yarpäyämarnï kë ruranqantsikta wata wata rurayanki”. Kanan witsampis Jesusman llapan creikoqkunam wata wata tsë ampi ëllukäyan. Y nïkurmi Señorpa Cënan nishqanta celebrayan.

 Cenar usharirqa, pï mas precisaq kanqampaqmi apostolkunaqa discutir qallëkuyarqan. Peru Jesusqa, “mas precisaq kaqqa mana precisaqnömi portakunan” nirqanmi.

Jina Jesusqa kënömi nirqan: “Qamkunaqa amïgükunam kayanki. Tsëmi qamkunataqa willayaq Teytä llapan nimanqankunata. Ichikllachönam Teytä kaqta ciëluman kutikushaq. Peru qamkunaqa këchömi quedakuyanki, y kikikikunapura kuyanakuyanqëkipitam nunakunaqa musyayanqa qateqnïkuna kayanqëkita. Qamkunata kuyayanqaqnöllam, qamkunapis kuyanakuyänëki”.

Y usharinampaqmi Jesusqa Jehoväta mañakurqan qateqninkunata cuidanampaq y yanapakïninwan juntu y shumaq trabajayänampaq. Jina Jehoväpa jutin respetashqa kanampaqmi mañakurqan. Nïkurmi qateqninkunawan cantarnin Jehoväta alabarir tsë wayipita yarquyarqan. Y ichikllachönam Jesusta tsariyänan karqan.

“Ama mantsakäyëtsu wallkalla üshakuna, porqui Teytëkikunaqa Gobiernuta qoyäshunëkipaqmi churapukashqa” (Lücas 12:32).