Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 85 KAQ WILLAKÏ

Juk nunatam säbaduchö kachakäratsirqan

Juk nunatam säbaduchö kachakäratsirqan

Fariseukunaqa alläpam Jesusta chikiyaq, y wanutsita munarmi imallapitapis acusëta ashiyaq. Tsëmi kënö niyaq: “Säbaduqa jamana junaqmi. Jesusqa manam tsë junaqchö pitapis kachakätsinmantsu”. Juk säbadum, cällichö limushnata mañakur këkaqta juk wisku nunata Jesus rikärirqan. Y qateqninkunatam, “rikäyë kë nunata Diospa podernin imanö yanapanqanta” nirqan. Nïkurmi toqaninwan mituta rurarir tsë nunapa nawinta llushirirqan y “Siloam kitaman paqakoq ëwë” nirqan. Y tsë nunaqa tsënömi rurarqan, y rikarmi qallëkurqan.

Nunakunaqa espantakurmi, “¿pëmi limushnata mañakur täraq aw? ¿O jukku?” niyarqan. Tsënam pëqa, “noqam kä tsë wisku yurikoq nuna” nirqan. Tsënam, “¿y imanirtaq kananqa rikankina?” niyarqan. Tsënam llapan pasakunqanta pëkunata willarqan. Y nunakunaqa fariseukunamanmi apayarqan.

Tsë nunaqa kënömi fariseukunata nirqan: “Jesusmi ishkan nawïman mituta llushimurqan, nïkurmi ‘paqakoq ëwë’ nimarqan. Y tsëta ruranqäpitam kananqa rikäna”. Tsënam fariseukunaqa kënö niyarqan: “Säbadu junaqchö pëta kachakätsinqanqa, Diospa poderninwan mana ruranqantam rikätsikun”. Peru wakinkunaqa kënömi niyarqan: “Diospa poderninwan mana karqa, ¿imanöraq pitapis kachakätsinman?”.

Tsënam fariseukunaqa tsë nunapa papäninta y mamäninta qayaratsir kënö niyarqan:  “¿Imanöpataq wamrëkikunaqa rikëta puëdinna?”. Tsënam, pëkunata mantsar, “manam musyayätsu. Kikinta tapuyë” niyarqan. Porqui fariseukunaqa Jesusman creikoqkunata Diosta adorayänan wayipita qarquyänampaqmi nishqa kayarqan. Fariseukunaqa yapëmi tsë nunata tapupäyarqan, y tsë nunaqa, “llapantanam willayarqoq. ¿Imanirtaq kutin kutin tapupäyämanki?” nirqanmi. Tsënö niptinmi fariseukunaqa alläpa piñakur qarquriyarqan.

Tsëpitam tsë nunaman Jesus ëwarqan. Nïkurmi, “¿Mesïasman markäkunkiku?” nishpa tapurqan. Tsë nunaqa, “Mesïas pï kanqanta musyarqa markäkümanmi” nirqanmi. Tsënam Jesusqa, “noqam Mesïas kä” nirqan. Clärum këkan, Jesusqa alli nuna karmi tsë nunata kachakätsirqan y pëman markäkunampaq yanaparqan.

“Qamkunaqa pantashqam këkäyanki, porqui manam Diospa Palabranta käyiyankitsu ni Diospa poderninta reqiyankitsu” (Mateu 22:29).