Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Biblia willakunqampita shumaq yachatsikïkuna

 81 KAQ WILLAKÏ

Juk jirkachö Jesus yachatsikunqan

Juk jirkachö Jesus yachatsikunqan

Apostolninkuna kayänampaq 12 qateqninkunata akrarirqa, jirkapita urärirmi Jesusqa atska nunakuna këkäyanqanman ëwarqan. Galilëapita, Judëapita, Tïrupita, Sidonpita, Siriapita y Jordan mayupa tsimpampita nunakunam këkäyarqan. Y qeshyëkaqkunata y supëkuna sufritsinqan nunakunatam Jesusman apayarqan, y llapankunatam kachakätsirqan. Nïkurmi tëkurnin jirkapa pachanchö yachatsikur qallëkurqan. Tsëchömi nirqan Diospa amïgun kanapaqqa, Diosta kuyanantsik y dirigimänata permitinantsik precisanqanta. Jina Diosta kuyarqa nuna mayintsiktapis kuyanapaqmi nirqan. Hasta chikimaqnintsik nunakunawampis alli kanapaq y imëpis alli kaqta ruranapaqmi nirqan.

Jesusqa kënömi nirqan: “Manam amïguïki kaqllatatsu kuyanëki, sinöqa chikishoqnikitapis kuyanëkim y perdonanëkim. Pipis qamwan piñakuptinqa, rasmi perdonta mañakunëki. Imanömi tratayäshunëkita munanki, tsënöllam nuna mayikita tratanëki”.

 Jina cösaskunapaq y qellë asuntupaqpis Jesusqa shumaqmi consejakurqan. Kënömi nirqan: “Jehoväwan amïgu këqa atska qellëyoq këpitapis masmi precisan. Porqui qellënikitaqa pipis suwarinmanmi, peru Jehoväwan amïgu kënikitaqa manam. Tsëmi, amana yarpakachëtsu imata mikunëkipaq o upunëkipaq o vistikunëkipaq kaqman. Antis pishqukunaman pensë. Diosqa manam mikïninkuna faltatsintsu. Jinamampis yarpakachanqëkiwanqa manam mas tiemputsu kawanki. Këta yarpë: Jehoväqa musyanmi imakunata wananqëkita”.

Jesusnöqa manam pipis tsë nunakunata yachatsishqatsu karqan, ni religionninkunachö mandakoqkunapis. ¿Imanirtaq Jesusqa alläpa shumaq yachatsikoq? Jehovä yachatsinqanllata yachatsikurmi.

“Yügüta matankarkur apayë y noqapita yachakuyë, porqui noqaqa yachanëpaq geniuyoq y qollmi shonqum kä, tsënö rurarqa, ankash këtam [...] tariyanki” (Mateu 11:29).